കേരളം ഉൾപ്പെടെ ഏഴു സംസ്ഥാനങ്ങളിൽ കോവിഡ് നിരക്കുകൾ ഉയരുന്നു- കേന്ദ്രആരോ​ഗ്യമന്ത്രി

ന്യൂഡൽഹി: കേരളം ഉൾപ്പെടെ ഏഴു സംസ്ഥാനങ്ങളിൽ കോവിഡ് കേസുകൾ ഉയരുകയാണെന്ന് കേന്ദ്ര ആരോ​ഗ്യമന്ത്രി മൻസൂഖ് മാണ്ഡവ്യ. മഹാരാഷ്ട്ര, ഡൽഹി, കർണാടക, ​ഹിമാചൽപ്രദേശ്, തമിഴ്നാട്, ഹരിയാന തുടങ്ങിയ സംസ്ഥാനങ്ങളിലാണ് കോവിഡ് കേസുകൾ വർധിക്കുന്നത്.

സംസ്ഥാനങ്ങളിലേയും കേന്ദ്രഭരണപ്രദേശങ്ങളിലേയും ആരോഗ്യമന്ത്രിമാര്‍ പങ്കെടുത്ത കോവിഡ് ഉന്നതതല അവലോകന യോഗത്തിലാണ് മന്ത്രി ഇക്കാര്യം പറഞ്ഞത്.

രോ​ഗവ്യാപനം സംബന്ധിച്ച് കൃത്യമായ അവബോധം സൃഷ്ടിക്കാനുള്ള നടപടികൾ കൈക്കൊള്ളണമെന്നും അദ്ദേഹം ആരോ​ഗ്യമന്ത്രിമാരോട് പറഞ്ഞു.

ആസ്പത്രികളിലെ ബെഡുകൾ, അവശ്യ മരുന്നുകൾ തുടങ്ങിയവ ഉറപ്പുവരുത്തണം. കോവിഡ് പോർട്ടലിൽ രോ​ഗനിരക്ക് സംബന്ധിച്ച് കൃത്യമായ വിവരം രേഖപ്പെടുത്തണമെന്നും മന്ത്രി വ്യക്തമാക്കി.

മുതിർന്നവർക്കും അനുബന്ധ രോ​ഗങ്ങൾ ഉള്ളവർക്കും വാക്സിനേഷൻ നിർദേശിക്കണമെന്നും മന്ത്രി പറഞ്ഞു. ഹോട്ട്സ്പോട്ടുകൾ രൂപപ്പെടുന്നുണ്ടെങ്കിൽ അവ നിരീക്ഷിക്കാനും ടെസ്റ്റുകൾ വർധിപ്പിക്കാനും നിർദേശമുണ്ട്.

പൊതുയിടങ്ങളിൽ മാസ്ക് ധരിക്കൽ, കൈകഴുകൽ ഉൾപ്പെടെയുള്ള വ്യക്തിശുചിത്വത്തെക്കുറിച്ച് അവബോധം നൽകണം. ഒപ്പം ഇൻഫ്ളുവൻസ രോ​ഗങ്ങളുടെയും ശ്വാസകോശ രോ​ഗങ്ങളുടെയും വ്യാപനവും നിരീക്ഷണമെന്ന് മന്ത്രി അറിയിച്ചു.

ലോകാരോ​ഗ്യസംഘടന, XBB.1.5 വകഭേദത്തെ ട്രാക്ക് ചെയ്യുന്നതിനൊപ്പം BQ.1, BA.2.75, CH.1.1, XBB, XBF and XBB.1.16. എന്നീ വകഭേദങ്ങളെ നിരീക്ഷിച്ചുവരികയാണെന്നും മന്ത്രി പറഞ്ഞു. മിക്ക വകഭേദങ്ങൾക്കും രോ​ഗതീവ്രത കുറവാണ്.

XBB.1.16 വകഭേദം ഫെബ്രുവരിയിൽ 21.6% ആയിരുന്നത് മാർച്ചിൽ 35.8% ആയിട്ടുണ്ട്. ആശുപത്രിയിൽ പ്രവേശിപ്പിക്കുന്നവരുടെ എണ്ണമോ മരണനിരക്കോ നിലവിൽ കൂടുന്നില്ലെന്നും മൻസൂഖ് മാണ്ഡവ്യ പറഞ്ഞു.

6,155 പുതിയ കോവിഡ് കേസുകളാണ് രാജ്യത്ത് റിപ്പോർട്ട് ചെയ്തിരിക്കുന്നത്. വെള്ളിയാഴ്ച്ചത്തെ നിരക്കുകൾ 6,050 ആയിരുന്നു. കഴിഞ്ഞ വർഷം സെപ്തംബറിനു ശേഷമാണ് വീണ്ടും കോവിഡ് കേസുകൾ ആറായിരം കടക്കുന്നത്.