ആസ്പത്രി മോഷ്ടാവ് പിടിയിൽ
തളിപ്പറമ്പ്: ആസ്പത്രികൾ കേന്ദ്രീകരിച്ച് മോഷണം നടത്തുന്നയാൾ പൊലീസ് പിടിയിൽ. രോഗികളുടെയും കൂട്ടിരിപ്പുകാരുടെയും പണം മോഷ്ടിക്കുന്ന പാപ്പിനിശേരി വെസ്റ്റിലെ പി.ടി. ഷൗക്കത്തലി(34)യെയാണ് ആസ്പത്രി അധികൃതർ പിടികൂടി പൊലീസിലേൽപ്പിച്ചത്.
ഒരാഴ്ച മുമ്പ് തളിപ്പറമ്പ് സഹകരണ ആസ്പത്രിയിൽ അഡ്മിറ്റായിരുന്ന രണ്ടുപേരുടെ നാലായിരം രൂപയും പതിനഞ്ചായിരം രൂപയും വീതം മോഷണം പോയിരുന്നു.
രോഗികൾ പരാതിപ്പെട്ടതിനെ തുടർന്ന് സി.സി.ടിവി പരിശോധിച്ചപ്പോഴാണ് രോഗികളുടെ മുറിയിൽ നിന്ന് പണം മോഷ്ടിക്കുന്നതിന്റെ ദൃശ്യം ലഭിച്ചത്.
ശനിയാഴ്ച 220ാം നമ്പർ മുറിയിൽ മോഷണത്തിന് എത്തിയപ്പോൾ സുരക്ഷാ ജീവനക്കാരാണ് ഇയാളെ തിരിച്ചറിഞ്ഞ് പിടികൂടിയത്.
ഒന്നര വർഷം മുമ്പ് ഇതേ ആസ്പത്രിയിൽ രോഗികളുടെ പണം മോഷ്ടിച്ചതിന് ഷൗക്കത്തലിയെ പിടികൂടിയിരുന്നങ്കിലും പണം ലഭിച്ചതിനാൽ താക്കീത് ചെയ്ത് വിട്ടയയ്ക്കുകയായിരുന്നു
