ഉദ്ഘാടനം കഴിഞ്ഞ്‌ ആറാം നാള്‍ ബെംഗളൂരു-മൈസൂരു അതിവേഗപാതയില്‍ വെള്ളക്കെട്ട്
ബെംഗളൂരു: ആറു ദിവസം മുന്‍പ് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്ത ബെംഗളൂരു-മൈസൂരു അതിവേഗ പാത വെള്ളത്തിനടിയില്‍. വെള്ളിയാഴ്ച രാത്രി പെയ്ത കനത്ത മഴയിലാണ് പാതയില്‍ വെള്ളം കയറിയത്. ബെംഗളൂരുവിന് സമീപം രാമനഗര ജില്ലയിലാണ് സംഭവം.
വെള്ളക്കെട്ടില്‍ മുങ്ങിയതോടെ കാര്‍ ഓഫായി. തുടര്‍ന്ന് പുറകിലുണ്ടായ ലോറി കാറിലിടിച്ചതായി യാത്രക്കാരിലൊരാള്‍ ആരോപിച്ചു. തന്റെ കാര്‍ നന്നാക്കി നല്‍കുവാന്‍ മുഖ്യമന്ത്രിയോട് ആവശ്യപ്പെടുന്നു.പ്രധാനമന്ത്രി നരേന്ദ്ര മോദിയും ഗതാഗത മന്ത്രാലയവും ഉദ്ഘാടനത്തിന് മുമ്പ് ഈ പാത പരിശോധിച്ചിരുന്നോ എന്നും അദ്ദേഹം ചോദിച്ചു.
പ്രധാനമന്ത്രി സ്ഥലത്തെത്തിയിരുന്നെങ്കില്‍ പത്ത് മിനിറ്റിനകം വെള്ളക്കെട്ട് നീക്കുമായിരുന്നുവെന്ന് മറ്റൊരു യാത്രക്കാരനും അഭിപ്രായപ്പെട്ടു. യാത്രക്കാരുടെ പ്രതിഷേധത്തെത്തുടർന്ന് എൻ.എച്ച്.എ.ഐഉദ്യോഗസ്ഥർ സ്ഥലത്തെത്തി വെള്ളക്കെട്ട് പരിഹരിക്കാനുള്ള നടപടികളെടുത്തു.
