ഇരിട്ടി:അഭിഭാഷകന്റെ വ്യാജ ഒപ്പും സീലും ഉപയോഗിച്ച് പവര്‍ ഓഫ് അറ്റോര്‍ണി വ്യാജമായുണ്ടാക്കി സ്ഥലം വില്‍പന നടത്തിയ സംഭവത്തില്‍ രണ്ട് പേര്‍ അറസ്റ്റില്‍.ഉളിയില്‍ സ്വദേശി അക്കരമ്മല്‍ ഹൗസില്‍ കെ.വി മായന്‍,ഇരിട്ടിയിലെ ആധാരം എഴുത്തുകാരന്‍ കോയ്യോടന്‍ മനോഹരന്‍ എന്നിവരെയാണ് കണ്ണൂര്‍ ടൗണ്‍ സി.ഐ ശ്രീജിത്ത് കൊടേരിയുടെ നേതൃത്വത്തിലുള്ള സംഘം അറസ്റ്റ് ചെയ്തത്. അഡ്വ. സി കെ രത്‌നാകരന്റെ പരാതിയിലാണ് പോലീസ് കേസെടുത്തത്. 2023 ഡിസംബര്‍ 12 നാണ് കേസിനാസ്പദമായ സംഭവം. ഇരിട്ടി താലുക്കിലെ ഉളിയില്‍ എന്ന സ്ഥലത്തെ 0.1872 ഹെക്ടര്‍ ഭൂമി വില്‍പന നടത്തുന്നതിനായാണ് വ്യാജ പവര്‍ ഓഫ് അറ്റോര്‍ണി ഉണ്ടാക്കിയത്. അഡ്വ.സി കെ രത്‌നാകരന്റെ രജിസ്‌ട്രേഷന്‍ നമ്പറും സീലും ഉപയോഗിച്ച് കൃത്രിമ ഒപ്പിട്ട് നോട്ടറി അറ്റസ്റ്റ് ചെയ്തതായി കാണിച്ചു.തുടര്‍ന്ന് പവര്‍ ഓഫ് അറ്റോര്‍ണി അസ്സല്‍ എന്ന രീതിയില്‍ ഉളിയില്‍ സബ് രജിസ്ട്രാര്‍ ഓഫീസില്‍ ഹാജരാക്കുകയായിരുന്നു.തുടര്‍ന്ന് സ്ഥലം വീരാജ് പേട്ട സ്വദേശിക്ക് രജിസ്റ്റര്‍ ചെയ്യുകയും ചെയ്യുകയായിരുന്നു. സംഭവം വിവാദമായതോടെ രജിസ്റ്റര്‍ ചെയ്ത ആധാരം റദ്ദാധാരമായി വീണ്ടും രജിസ്റ്റര്‍ ചെയ്യാനും ശ്രമം ഉണ്ടായി. ഇതിനിടയില്‍ ജില്ലാ രജിസ്റ്റര്‍ക്ക് കിട്ടിയ പരാതിയില്‍ വിശദമായ പരിശോധനയുണ്ടായി. ആര്‍ക്കും പവര്‍ ഓഫ് അറ്റോണി അറ്റസ്റ്റ് ചെയ്ത് നല്‍കിയിട്ടില്ലെന്ന് അഡ്വ.സി.കെ രത്‌നാകരന്‍ ജില്ലാ റജിസ്ട്രാറെ അറിയിച്ചു.വ്യാജ ഓപ്പും സീലും ഉണ്ടാക്കിയതിന്റെ പേരില്‍ സി.കെ രത്‌നാകരന്റെ പരാതിയില്‍ മായനെ അറസ്റ്റു ചെയ്ത് ചോദ്യം ചെയ്തപ്പോഴാണ് ആധാരം എഴുത്തുകാരനായ മനോഹരനാണ് ഇത് ഉണ്ടാക്കിയതെന്ന് മനസിലായതെന്ന് പോലീസ് പറഞ്ഞു. മനോഹരനെ ശനിയാഴ്ച കണ്ണൂര്‍ ടൗണ്‍ സി.ഐ ശ്രീജിത്ത് കൊടേരിയുടെ നേതൃത്വത്തില്‍ അറസ്റ്റുചെയ്യുകയായിരുന്നു. കോടതിയില്‍ ഹാജരാക്കി റിമാണ്ട് ചെയ്തു.

കോളയാട് : സി.പി.എം പേരാവൂർ ഏരിയ സെക്രട്ടറി സ്ഥാനത്തേക്ക് പേരാവൂർ ബ്ലോക്ക് പഞ്ചായത്ത് പ്രസിഡന്റ് കെ.സുധാകരനെ പരിഗണിക്കുന്നതായി സൂചന. നിലവിൽ ബ്ലോക്ക്‌ പഞ്ചായത്ത്‌ പ്രസിഡന്റാണെങ്കിലും തെരഞ്ഞെടുപ്പ് അടുത്ത സാഹചര്യത്തിൽ ഏരിയ സെക്രട്ടറി സ്ഥാനത്തേക്ക് നിശ്ചയിക്കുന്നതിൽ തടസ്സമില്ലെന്നാണ് നേതൃത്വത്തിന്റെ വിലയിരുത്തൽ.ഔദ്യോഗിക വിഭാഗവുമായി പൂർണമായും സഹകരിച്ചു പ്രവർത്തിക്കുന്ന ആളെന്ന നിലയിൽ സുധാകരനോടാണ് ജില്ലാ നേതൃത്വത്തിനും താല്പര്യം.അതേസമയം,മണത്തണ ലോക്കൽ മുൻ സെക്രട്ടറി ടി. വിജയൻ, പേരാവൂർ ലോക്കൽ മുൻ സെക്രട്ടറി കെ. എ. രജീഷ് എന്നിവരും ഏരിയ സെക്രട്ടറി സ്ഥാനത്തേക്ക് പരിഗണിക്കപ്പെടുന്നുണ്ട് എന്നാണറിയുന്നത്.

19 അംഗ കമ്മറ്റി 21 അംഗ കമ്മിറ്റിയാക്കാനും സാധ്യതയുണ്ട്. കമ്മിറ്റിയിൽ നിന്ന് ഒഴിവായ എം. എസ് അമലിന് പകരം ടി. രഗിലാഷോ ശ്രീജിത്ത് കാരായിയോ വന്നേക്കും. പ്രായാധിക്യം കാരണം രണ്ട് അംഗങ്ങളെ കമ്മിറ്റിയിൽ നിന്ന് ഒഴിവാക്കാൻ സാധ്യതയുണ്ട്. ഇവർക്ക് പകരം കൊട്ടിയൂർ ലോക്കലിൽ നിന്നും കോളയാട് ലോക്കലിൽ നിന്നുമായി രണ്ട് പേരെ ഉൾപ്പെടുത്തും. മുൻ കോളയാട് പഞ്ചായത്ത് പ്രസിഡന്റ് കെ. പി. സുരേഷ് കുമാർ ഇത്തവണ ഏരിയ കമ്മിറ്റിയിൽ മടങ്ങിയെത്തുമെന്ന് സൂചന ഉണ്ടായിരുന്നെങ്കിലും പ്രതിനിധി സമ്മേളനത്തിൽ അദ്ദേഹം പങ്കെടുക്കാത്തത് സുരേഷ്‌കുമാറിന് തിരിച്ചടിയാവും. പേരാവൂർ ക്ഷീര വ്യവസായ സഹകരണ സംഘത്തിലെ ക്രമക്കേട് ശനിയാഴ്ച നടന്ന പ്രതിനിധി സമ്മേളനത്തിൽ പ്രധാന ചർച്ചയായി. സംഘം ക്രമക്കേടിൽ ആരോപണ വിധേയനായ ഏരിയ കമ്മിറ്റിയംഗം കെ. ശശീന്ദ്രനെതിരെ സമ്മേളനത്തിൽ രൂക്ഷ വിമർശനമാണുണ്ടായത്.

കോളയാട്: സി.പി.എം പേരാവൂർ ഏരിയാ സമ്മേളനത്തിന്റെ ഭാഗമായുള്ള പ്രതിനിധി സമ്മേളനം കോളയാടിൽ തുടങ്ങി. മുതിർന്ന പാർട്ടി അംഗം പി.തങ്കപ്പൻ പതാക ഉയർത്തി. സംസ്ഥാന കമ്മിറ്റി അംഗംഎൻ. ചന്ദ്രൻ ഉദ്ഘാടനം ചെയ്തു. സി. ടി . അനീഷ് അധ്യക്ഷനായി.സംസ്ഥാന കമ്മിറ്റിയംഗം ഡോ.വി.ശിവദാസൻ എം.പി , ജില്ലാ സെക്രട്ടറിയേറ്റംഗങ്ങളായ പി.ഹരീന്ദ്രൻ, കാരായി രാജൻ, പി.പുരുഷോത്തമൻ, ജില്ലാ കമ്മിറ്റിയംഗങ്ങളായ കെ .ശ്രീധരൻ , എൻ .വി .ചന്ദ്രബാബു, ബിനോയ് കുര്യൻ, വി. ജി. പദ്മനാഭൻ, അഡ്വ.എം രാജൻ എന്നിവർ സംസാരിച്ചു. തങ്കമ്മ സ്‌കറിയരക്തസാക്ഷി പ്രമേയവും അഡ്വ. ജാഫർ നല്ലൂർ അനുശോചന പ്രമേയവും അവതരിപ്പിച്ചു.പ്രതിനിധി സമ്മേളനം ഞായറാഴ്ച വൈകിട്ട് നാലിന് സമാപിക്കും. തുടർന്ന് വളണ്ടിയർ മാർച്ചും ബഹുജനറാലിയും. പൊതുസമ്മേളനം സംസ്ഥാന സെക്രട്ടറിയേറ്റംഗം പി.കെ.ബിജു ഉദ്ഘാടനം ചെയ്യും. പട്ടികജാതി-പട്ടികവർഗ വകുപ്പ് മന്ത്രി ഒ.ആർ.കേളു മുഖ്യപ്രഭാഷണം നടത്തും. 11 ലോക്കലുകളിൽ നിന്നായി 140 പ്രതിനിധികളാണ് സമ്മേളനത്തിൽ പങ്കെടുക്കുന്നത്.