അവധി ആഘോഷിക്കാനെത്തി; 17കാരി മുങ്ങിമരിച്ചു
വയനാട് : അവധി ആഘോഷിക്കാനെത്തിയ പതിനേഴുകാരി മുങ്ങിമരിച്ചു. വയനാട് നീലഗിരി എരുമാടിലെ കുടുംബവീട്ടിലെത്തിയ തിരുനെല്ലി കൊല്ലമാവുടി സ്വദേശിനി അനുപ്രിയയാണ് (17) മരിച്ചത്.
വീടിനു സമീപമുള്ള പുഴയില്‍ കുളിക്കാനിറങ്ങിയപ്പോള്‍ കാലുതെറ്റി വീഴുകയായിരുന്നു. മുട്ടറ്റം വെള്ളം മാത്രമേ പുഴയിലുണ്ടായിരുന്നുള്ളൂവെങ്കിലും ചെളിയില്‍ പുതഞ്ഞു പോയതാണ് അപകടമുണ്ടാകാന്‍ കാരണം.ഒപ്പമുണ്ടായിരുന്നത് കുട്ടികളായതിനാല്‍ ചെളിയില്‍ താണുപോയ അനുപ്രിയയെ പുറത്തെത്തിക്കാനായില്ല.
മുതിര്‍ന്നവരെത്തി ചെളിയില്‍ നിന്ന് പുറത്തെടുത്തപ്പോഴേക്കും ക്ഷീണിതയായിരുന്നു. ഉടന്‍ തന്നെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹം പോസ്റ്റുമോര്‍ട്ടത്തിനു ശേഷം നാളെ സംസ്‌കരിക്കും. പ്രജി-സിന്ധു ദമ്പതികളുടെ മകളാണ്. ഷെയ്ന്‍ ബേസില്‍ സഹോദരനാണ്.
