ഒറ്റദിവസം കളക്ഷന്‍ 18,000 രൂപ; ടിക്കറ്റ് കീറി സുമംഗലി നേടിയത് സമാനതകളില്ലാത്ത അംഗീകാരം
മണ്ണഞ്ചേരി: ഡബിള്‍ ബെല്ലടിക്കാന്‍ മാത്രമല്ല, എത്ര തിരക്കായാലും യാത്രക്കാരന് കൃത്യമായി ടിക്കറ്റ് നല്‍കി പണം വാങ്ങാനുമറിയാം സുമംഗലിക്ക്. കൂടുതല്‍ യാത്രക്കാരെ കയറ്റുന്നതിനും മിടുക്കുണ്ട്. ഇതിനുള്ള അംഗീകാരമാണ് ഇപ്പോള്‍ തേടിയെത്തിയിരിക്കുന്നത്.
ആലപ്പുഴ- വൈക്കം റൂട്ടില്‍ രണ്ടു സര്‍വീസും ആലപ്പുഴ- മങ്കൊമ്പ് റൂട്ടില്‍ ഒരു സര്‍വീസും നടത്തി യാത്രക്കാരില്‍നിന്നു പിരിച്ചെടുത്തത് 18,000 രൂപ. ഇത്രയധികം തുക കളക്ഷനെടുക്കുന്ന സംസ്ഥാനത്തെ ഏക വനിതാ കണ്ടക്ടര്‍ എന്ന ബഹുമതിയും ഇതിലൂടെ സുമംഗലി സ്വന്തമാക്കി. സംസ്ഥാന തലത്തിലും ജില്ലാ തലത്തിലും സമ്മാനം പ്രഖ്യാപിച്ചിട്ടുണ്ട്. എല്ലാ വിഭാഗങ്ങളിലുമായി വനിതയായി സുമംഗലി മാത്രമേയുള്ളൂ.
13 വര്‍ഷമായി ആലപ്പുഴ ഡിപ്പോയില്‍ കണ്ടക്ടറാണ് സുമംഗലി. വടകര ജോയിന്റ് ബി.ഡി.ഒ. മണ്ണഞ്ചേരി ഞാണ്ടിരിക്കല്‍ ലക്ഷ്മിഭവനില്‍ ജി. ഹരികുമാറിന്റെ ഭാര്യയാണ്. കീര്‍ത്തന, ലക്ഷ്മി എന്നീ രണ്ടു മക്കളും ഇവര്‍ക്കുണ്ട്. റെക്കോഡ് കളക്ഷന്‍ നേടിയതിനുള്ള അവാര്‍ഡ് കെ.എസ്.ആര്‍.ടി.സി. എം.ഡി. ബിജു പ്രഭാകറില്‍നിന്ന് ഏറ്റുവാങ്ങി.
