പയ്യന്നൂർ :നഗരസഭ ട്രാഫിക് കമ്മിറ്റി തീരുമാനം ഒന്നര മാസം കഴിഞ്ഞിട്ടും നടപ്പാക്കാനായില്ല. ഓണത്തിനു മുന്നോടിയായി ഓഗസ്റ്റ് 30നാണു നഗരസഭ അധ്യക്ഷ കെ.വി.ലളിതയുടെ അധ്യക്ഷതയിൽ ട്രാഫിക് കമ്മിറ്റി അവലോകന യോഗം നടത്തി ഗതാഗത പരിഷ്കരണ തീരുമാനങ്ങൾ എടുത്തത്. 

യോഗം ചേർന്നെടുത്ത തീരുമാനങ്ങൾ നടപ്പിൽവരുത്താറില്ലെന്ന വിമർശനമായിരുന്നു അന്നത്തെ യോഗത്തിൽ പ്രധാനമായും ഉയർന്നുവന്നത്. എന്നാൽ, ഇനി അങ്ങനെ ഉണ്ടാകില്ലെന്നും തീരുമാനങ്ങൾ കൃത്യമായി നടപ്പാക്കുമെന്നും അധ്യക്ഷ പ്രഖ്യാപിച്ചിരുന്നു. യോഗത്തിൽ നഗരസഭയുടെ ഭാഗത്തു നിന്നു വന്ന നിർദേശമായിരുന്നു പഴയ ബസ് സ്റ്റാൻഡ് മുതൽ സെൻട്രൽ ബസാർ വരെ റോഡിനു നടുവിൽ ഡിവൈഡർ സ്ഥാപിക്കാം എന്നത്. നഗരസഭ തന്നെ നിർദേശിച്ച കാര്യമായതിനാൽ അതു നടപ്പാക്കുമെന്ന പ്രതീക്ഷയായിരുന്നു ട്രാഫിക് കമ്മിറ്റി അംഗങ്ങൾക്ക് ഉണ്ടായിരുന്നത്. 

എന്നാൽ, സുരക്ഷാ നടപടിയുടെ ഭാഗമായി അതു നടപ്പാക്കാൻ ബന്ധപ്പെട്ടവർ അനുവദിച്ചില്ല. ബൈപാസ്, മുനിസിപ്പൽ സ്റ്റേഡിയം റോഡുകളിൽ അടിയന്തരമായി അറ്റകുറ്റപ്പണി നടത്തി യാത്രാസൗകര്യമൊരുക്കുമെന്ന പ്രഖ്യാപനവും ഒന്നര മാസമായിട്ടും നടപ്പിലായില്ല. ഗാന്ധി പാർക്ക് റോഡ്, സിഐടിയു ഓഫിസ് റോഡ് എന്നിവയിലേക്കു മെയിൻ റോഡിൽ നിന്നു മാത്രമേ പ്രവേശനം അനുവദിക്കൂ എന്ന തീരുമാനവും നടപ്പായില്ല. മെയിൻ റോഡിൽ കരിഞ്ചാമുണ്ഡി ക്ഷേത്രം മുതൽ പഴയ ബസ് സ്റ്റാൻഡ് വരെ വടക്കു ഭാഗത്തു മാത്രം പാർക്കിങ്ങും യാഥാർഥ്യമായില്ല.

ടൗണിലെ ഗതാഗതക്കുരുക്കു പരിഹരിക്കുന്നതിനായി എം.വിജിൻ എംഎൽഎയുടെ നേതൃത്വത്തിൽ ഗതാഗത പരിഷ്കരണം നടപ്പിലാക്കി. മാതമംഗലം റോഡ്, ദേശീയപാത എന്നിവിടങ്ങളിൽ ഉളള അനധികൃത വാഹന പാർക്കിങ് ഒഴിവാക്കി നോ പാർക്കിങ് ബോർഡുകൾ സ്ഥാപിച്ചു. പേ പാർക്കിങ് സംവിധാനം ദിവസങ്ങൾക്കുളളിൽ ഒരുക്കും. ചെറുതാഴം ബാങ്കിനു മുന്നിലുളള റോഡിനു സമാന്തരമായ സ്ഥലം പാർക്കിങ്ങിനായി പ്രയോജനപ്പെടുത്തും. ഓട്ടോറിക്ഷ പാർക്കിങ്ങിൽ മാറ്റം വരുത്തി. ഇതിന്റെ ഭാഗമായി മാതമംഗലം റോഡിൽ ഇടതു വശത്തും ബസ് സ്റ്റാൻഡിനു സമീപം ദേശീയപാത സർവീസ് റോഡിനു സമാന്തരമായും  ഓട്ടോറിക്ഷകൾ പാർക്ക് ചെയ്യാം. 

ടാക്സി വാഹനങ്ങൾക്ക് ബസ് സ്റ്റാൻ‍ഡിനു സമീപത്തു പാർക്ക് ചെയ്യുന്നതിനും സൗകര്യം ഒരുക്കി.  ബസ് സ്റ്റാൻഡിൽ പ്രവേശിക്കുന്ന ബസുകൾക്ക് ഒരുക്കിയ പാർക്കിങ് സൗകര്യം ഉപയോഗപ്പെടുത്തി യാത്രക്കാരെ കയറ്റുകയും ഇറക്കുകയും വേണം. പഞ്ചായത്ത് പ്രസിഡന്റ് എം.ശ്രീധരൻ, ആസൂത്രണ സമിതി ഉപാധ്യക്ഷൻ എം.വി.രാജീവൻ, പഞ്ചായത്ത് സ്ഥിരം സമിതി അധ്യക്ഷൻ ടി.വി.ഉണ്ണിക്കൃഷ്ണൻ, പരിയാരം എസ്ഐ എം.ശശി എന്നിവർ എംഎൽഎയ്ക്കൊപ്പം ഉണ്ടായിരുന്നു.