പൂക്കോട്‌: സംസ്ഥാനത്തെ ആദ്യ ഗോത്ര പൈതൃക ഗ്രാമം ‘എൻ ഊര്‌’ സഞ്ചാരികളുടെ ഇഷ്ടകേന്ദ്രമായി മാറുന്നു. അവധി ദിവസങ്ങളിൽ രണ്ടായിരത്തിലധികം ആളുകളാണ്‌ പൂക്കോട്‌ വെറ്ററിനറി സർവകലാശാല ക്യാമ്പസിനോട്‌ ചേർന്നുള്ള എൻ ഊരിൽ എത്തുന്നത്‌. മറ്റു ദിവസങ്ങളിൽ ശരാശരി ആയിരത്തോളം പേർ ഇവിടെയെത്തുന്നുണ്ട്‌. ജൂൺ നാലിന്‌ പ്രവർത്തനം തുടങ്ങിയശേഷം ഒരു ലക്ഷത്തോളം ആളുകൾ ഇവിടെ സന്ദർശിച്ചു. മഴക്കാലത്ത്‌ 20 ദിവസത്തോളം അടച്ചിട്ടതൊഴിച്ചാൽ മിക്ക ദിവസങ്ങളിലും തിരക്കാണ്‌.
സഞ്ചാരികൾ കൂടിയതോടെ പ്രവേശന കവാടത്തിനിരുവശവും ദേശീയപാതയിൽ വാഹനത്തിരക്കുമേറി. ഇരുവശത്തും വാഹനങ്ങൾ നിർത്തിയിടുന്നതിനാൽ രാവിലെ ഒമ്പതുമുതൽ ദേശീയപാതയിലൂടെ വാഹനങ്ങൾ കൽപ്പറ്റ ഭാഗത്തേക്കും കോഴിക്കോട്‌ ഭാഗത്തേക്കും പോകാൻ പ്രയാസപ്പെടുന്നത്‌ പതിവായി. സർവകലാശാല ക്യാമ്പസിനോട്‌ ചേർന്ന്‌ നാമമാത്രമായ പാർക്കിങ്‌ സൗകര്യമാണ്‌ നിലവിലുള്ളത്‌. തിരക്ക്‌ വർധിച്ചതോടെ ഇത്‌ അപര്യാപ്തമാണെന്ന്‌ നാട്ടുകാരും വൈത്തിരി പഞ്ചായത്ത്‌ അധികൃതരും പറയുന്നു.
മുതിർന്നവർക്ക്‌ 50, കുട്ടികൾക്ക്‌ 20 എന്നിങ്ങനെയാണ്‌ പ്രവേശന ഫീസ്‌. പ്രധാന റോഡിൽനിന്ന്‌ എൻ ഊരിലേക്ക്‌ ജീപ്പ്‌ സർവീസിന്‌ 20 രൂപ വേറെയും നൽകണം.
ശാന്തമായ അന്തരീക്ഷവും തണുത്തകാറ്റും ഗോത്ര ഉൽപ്പന്നങ്ങളുടെ സ്റ്റാളുകളും സഞ്ചാരികളെ ആകർഷിക്കുകയാണ്‌. എൻ ഊരിൽ കയറുന്നവർ മണിക്കൂറുകൾ ഇവിടെ ചെലവഴിച്ചാണ്‌ തിരികെയെത്തുന്നത്‌. ഇത്രയും സമയം വാഹനങ്ങൾ റോഡിന്‌ ഇരുവശങ്ങളിലും നിർത്തിയിടുന്നതാണ്‌ ഗതാഗതക്കുരുക്കിന്‌ കാരണമെന്നാണ്‌ നാട്ടുകാരുടെ ആരോപണം.
വയനാട്‌ ടൂറിസത്തിന്റെ പ്രവേശന കവാടമായി ഇതിനോടകം എൻ ഊര്‌ മാറി. ഇതിനനുസരിച്ചുള്ള സൗകര്യങ്ങൾ ഒരുക്കാൻ ബന്ധപ്പെട്ടവർ തയ്യാറാകണമെന്ന്‌ നാട്ടുകാർ ആവശ്യപ്പെട്ടു. സബ്‌ കലക്ടർ അധ്യക്ഷനായ എൻ ഊര്‌ ചാരിറ്റബിൾ സൊസൈറ്റിക്കാണ്‌ നടത്തിപ്പ്‌ ചുമതല. ഈ സൊസൈറ്റിയാണ്‌ പാർക്കിങ്‌ ഉൾപ്പെടെയുള്ള സൗകര്യങ്ങൾ ഒരുക്കേണ്ടത്‌. കേന്ദ്രത്തിന്റെ പ്രവർത്തനത്തിന്‌ ആവശ്യമായ ജീവനക്കാരില്ലാത്തതും പ്രതിസന്ധിയാണ്‌.
പൂക്കോട്‌
എൻ ഊരിലേക്ക്‌ സഞ്ചാരികളുമായെത്തുന്ന വാഹനങ്ങൾ പാർക്ക്‌ ചെയ്യാൻ സ്വകാര്യ വ്യക്തിയുടെ സ്ഥലത്ത്‌ സൗകര്യം ഒരുങ്ങുന്നു. എൻ ഊര്‌ പ്രവേശന കവാടത്തിനടുത്തുനിന്ന്‌ കോഴിക്കോട്‌ ഭാഗത്തേക്ക്‌ 500 മീറ്റർ മാറിയാണ്‌ പാർക്കിങ്‌ സൗകര്യം. സൊസൈറ്റിക്ക്‌ ഇതിൽ നേരിട്ട്‌ ബന്ധമുണ്ടാകില്ല. പാർക്കിങ്‌ ഫീസ്‌ ഉൾപ്പെടെ സ്ഥലം നൽകുന്നവർ നേരിട്ട്‌ ശേഖരിക്കും. സ്ഥലം നിരപ്പാക്കുന്നതിനുള്ള പ്രവൃത്തി ഉടൻ തുടങ്ങും.
ഇത്‌ തുറന്നാൽ ദേശീയപാതയിലെ ഗതാഗതക്കുരുക്ക്‌ ഒരുപരിധിവരെ കുറയ്ക്കാനാവുമെന്ന്‌ സൊസൈറ്റി സെക്രട്ടറി വി ബാലകൃഷ്ണൻ പറഞ്ഞു. ഗോത്ര പൈതൃക ഗ്രാമത്തിന്റെ നടത്തിപ്പിനാവശ്യമായ ജീവനക്കാരുടെ കുറവ്‌ ഒരുമാസത്തിനകം പരിഹരിക്കും. പദ്ധതി പ്രദേശം ഉൾപ്പെടുന്ന വൈത്തിരി പഞ്ചായത്ത്‌ പ്രതിനിധികളെക്കൂടി ഉൾപ്പെടുത്തി സൊസൈറ്റി ഭരണസമിതി വിപുലീകരിക്കുന്നത്‌ പരിഗണനയിലാണെന്നും അദ്ദേഹം പറഞ്ഞു.