ഭാവിയിൽ ഇ-ഡിസ്ട്രിക്ട്‌ വഴി ലഭിക്കുന്ന സർട്ടിഫിക്കറ്റുകളും മറ്റു സർക്കാർ സേവനങ്ങളുമെല്ലാം ഇതുവഴി നൽകാനാകും. ആൻഡ്രോയ്ഡ് ഫോണിലെ പ്ലേസ്റ്റോറിൽനിന്ന് പേരും മൊബൈൽനമ്പറും നൽകിയാൽ സന്ദേശ് ആപ്പ് ഡൗൺലോഡ് ചെയ്യാം. ഇതുവഴി വാട്‌സാപ്പ്‌ വഴിയെന്നപോലെ സന്ദേശങ്ങളും ചിത്രങ്ങളും വീഡിയോകളുമെല്ലാം അയക്കാം.

സർക്കാർ സേവനങ്ങളും ഉത്തരവുകളും വാട്‌സാപ്പ് വഴി കൈമാറുന്നത് സുരക്ഷിതമല്ലാത്തതിനാലാണ് സർക്കാർതന്നെ ആപ്പ് തയ്യാറാക്കിയത്. ഒ.ടി.പി.യും മറ്റും അയക്കേണ്ടിവരുമ്പോൾ മറ്റു സേവനദാതാവിനെ ആശ്രയിക്കേണ്ടിവരുന്നതും ഫീസ് നൽകേണ്ടിവരുന്നതുമെല്ലാം പുതിയ ആപ്പ് തയ്യാറാക്കാൻ സർക്കാരിനെ പ്രേരിപ്പിച്ചു.

സർക്കാർ ജീവനക്കാരെല്ലാം സന്ദേശ് ഡൗൺലോഡ് ചെയ്ത് പരസ്‌പരം ആശയവിനിമയം നടത്താനാണ് നിർദേശം. ജീവനക്കാരുടെ സ്‌പാർക്ക് വിവരങ്ങൾ, ഹാജർ വിവരങ്ങൾ, നിയമനവിവരങ്ങൾ, വ്യക്തിവിവരങ്ങൾ, ശമ്പളവിവരം, അവധികൾ എന്നിവയെല്ലാം ഇതുവഴി അറിയാം. ഇതിനുപുറമെയാണ് ഇപ്പോൾ നികുതി രസീതടക്കമുള്ളവയും സന്ദേശ് വഴിയെത്തിച്ച് സാധാരണക്കാരെ ആകർഷിക്കാനുള്ള ശ്രമം.