അതേസമയം, ക്രെഡിറ്റ് കാര്‍ഡ് ഉപയോഗിച്ച് നടത്തുന്ന യുപിഐ ഇടപാടുകള്‍ക്ക് മര്‍ച്ചന്റ് ഡിസ്‌കൗണ്ട് നിരക്ക്(എം.ഡി.ആര്‍)എങ്ങനെ ബാധകമാക്കുമെന്നകാര്യത്തില്‍ ഇനിയും വ്യക്തത വന്നിട്ടില്ല. ഓരോ ഇടപാടിനും കച്ചവടക്കാരന്‍ നല്‍കുന്ന തുകയുടെ നിശ്ചിത ശതമാനംവീതം ബാങ്കുകള്‍ക്കും പണമിടപാട് സേവന ദാതാക്കള്‍ക്കും വിഭജിച്ചുനല്‍കുകയാണ് ഇപ്പോള്‍ ചെയ്യുന്നത്.

നിലവില്‍ റൂപെ കാര്‍ഡുകള്‍ വഴിയുള്ള ഇടപാടുകള്‍ക്ക് ഇത്തരത്തിലുള്ള നിരക്കുകളൊന്നും കച്ചവടക്കാരില്‍നിന്ന് ഈടാക്കുന്നില്ല. യു.പി.ഐ വ്യാപകമായി അതിവേഗം പ്രചാരത്തിലായത് അതുകൊണ്ടാണ്.

ആര്‍.ബി.ഐ പുറത്തുവിട്ട കണക്കുപ്രകാരം രാജ്യത്തെ കാര്‍ഡ് വിപണിയുടെ 60ശതമാനത്തിലധികം വിഹിതം നേടാന്‍, നാഷണല്‍ പെയ്‌മെന്റ് കോര്‍പറേഷന്‍ ഓഫ് ഇന്ത്യ(എന്‍.പി.സി.ഐ)യുടെ കാര്‍ഡ് ശൃംഖലയായ റൂപെയ്ക്ക് കഴിഞ്ഞിട്ടുണ്ട്. ഡെബിറ്റ് കാര്‍ഡ് മേഖലയിലാണ് ഈ മേധാവിത്തം. ക്രെഡിറ്റ് കാര്‍ഡ് വിഭാഗത്തില്‍ വിസയ്ക്കും മാസ്റ്റര്‍ കാര്‍ഡിനുമാണ് ആധിപത്യമുള്ളത്. 2022 മെയ് മാസത്തില്‍ 10.40 ലക്ഷം കോടിയുടെ 594.63 കോടി ഇടപാടുകളാണ് യു.പി.ഐ വഴി നടന്നത്. ഏപ്രിലിലാകട്ടെ 558 കോടി ഇടപാടുകളും. ഇടപാട് മൂല്യം 10 ലക്ഷം കോടി കടന്നത് ഇതാദ്യമായാണ്.