ദോഹ : താൽക്കാലിക തൊഴിൽ വിസകൾക്കുള്ള റിക്രൂട്ട്‌മെന്റ് അപേക്ഷകൾ ഉൾപ്പെടെ 4 പുതിയ ഇ-സേവനങ്ങൾ കൂടി ലഭ്യമാക്കി തൊഴിൽ മന്ത്രാലയം. 4 തരത്തിലുള്ള തൊഴിലാളി റിക്രൂട്ട്‌മെന്റ് അപേക്ഷകൾ ഓൺലൈൻ വഴി നൽകാം. ഓട്ടോമേഷൻ വ്യവസ്ഥകൾ പാലിക്കുന്നവയാണെങ്കിൽ സർക്കാർ ഏജൻസികളുടെ റിക്രൂട്ട്‌മെന്റ് അപേക്ഷകൾക്ക് ഓട്ടോമാറ്റിക്കായി അനുമതി ലഭിക്കും.

നടപടി ക്രമങ്ങളിലും കുറവു വരും. സേവന ഇടപാടുകൾ വേഗത്തിലാക്കാനും പ്രവർത്തനകാര്യക്ഷമത ഉറപ്പാക്കാനുമുള്ള ഡിജിറ്റൽ പരിവർത്തനത്തിന്റെ ഭാഗമായാണിത്. വരും നാളിലായി കൂടുതൽ ഇ-സേവനങ്ങൾ ആരംഭിക്കാനുള്ള തയാറെടുപ്പിലാണ് മന്ത്രാലയം. മന്ത്രാലയത്തിന്റെ വെബ്‌സൈറ്റിലൂടെ നിലവിൽ 47 ഇ-സേവനങ്ങളാണ് പൊതുജനങ്ങൾക്ക് ലഭിക്കുന്നത്.

തൊഴിൽ മന്ത്രാലയത്തിന്റെ പുതിയ ഇ-സേവനങ്ങൾ

1.താൽക്കാലിക തൊഴിൽ വിസകൾക്കുള്ള റിക്രൂട്ട്‌മെന്റ് അപേക്ഷകൾ 

∙ രാജ്യത്തിനകത്ത് ജോലി ചെയ്യാൻ തൊഴിലാളികളുടെ താൽക്കാലിക റിക്രൂട്ട്‌മെന്റ് നടത്താനുള്ള അനുമതിക്കായി കമ്പനികൾക്കും സ്ഥാപനങ്ങൾക്കും താൽക്കാലിക തൊഴിൽ വീസകൾക്കുള്ള അപേക്ഷ സമർപ്പിക്കുന്നതിനാണിത്. 

2.സർക്കാർ കരാർ സേവനം

∙ ഒരു പ്രൊജക്ടിന്റെ ഉടമസ്ഥതയുള്ള സർക്കാർ സ്ഥാപനവുമായി കരാർ രേഖപ്പെടുത്തുന്നതിന് കമ്പനികളെ അനുവദിക്കുന്നതാണിത്. കമ്പനികളുടെ എസ്റ്റാബ്ലിഷ്‌മെന്റ് റജിസ്ട്രിയിലേക്ക് സർക്കാർ കരാർ കൂട്ടിചേർക്കുന്നതിനുള്ള സേവനമാണിത്. 

3.സർക്കാർ-അർധസർക്കാർ സ്ഥാപനങ്ങൾക്കുള്ള ലേബർ റിക്രൂട്ട്‌മെന്റ് അപേക്ഷകൾ 

∙ ഖത്തറിൽ ജോലി ചെയ്യുന്നതിനായി വിദേശ രാജ്യങ്ങളിൽ നിന്ന് തൊഴിലാളികളെ റിക്രൂട്ട് ചെയ്യാൻ സർക്കാർ-അർധസർക്കാർ സ്ഥാപനങ്ങൾക്ക് റിക്രൂട്ട്‌മെന്റിനുള്ള അനുമതി തേടാം. 

4.ഖത്തർ ഫിനാൻഷ്യൽ സെന്റർ കമ്പനികൾക്കുള്ള് ലേബർ റിക്രൂട്ട്‌മെന്റ് 

∙ ഖത്തർ ഫിനാൻഷ്യൽ ഗ്രൂപ്പ് കമ്പനികൾക്ക് തങ്ങളുടെ അനുബന്ധ കമ്പനികളിലേക്ക് പ്രൈവറ്റ് തൊഴിലാളികളെ റിക്രൂട്ട്‌ചെയ്യുന്നതിനുള്ള അനുമതി അപേക്ഷകൾ നൽകുന്നതിനാണിത്.