കണ്ണൂർ: കോട്ടയം ഗവ. മെഡിക്കൽ കോളേജ് ആസ്പത്രിക്ക് പിന്നാലെ സംസ്ഥാനത്തെ പ്രധാന ഗവ. മെഡിക്കൽ കോളേജുകളിലും കരൾ മാറ്റിവെക്കൽ ശസ്ത്രക്രിയയ്ക്ക് സംവിധാനമൊരുക്കുന്നു.

തിരുവനന്തപുരം ഗവ. മെഡിക്കൽ കോളേജ് ആസ്പത്രിയിൽ ഇതിനായി കർമപദ്ധതി തയ്യാറാക്കിത്തുടങ്ങി. കരൾ മാറ്റിവെക്കൽ ശസ്ത്രക്രിയ പരമാവധി വേഗത്തിൽ സാധ്യമാക്കുകയാണ് ലക്ഷ്യം. കോഴിക്കോട് മെഡിക്കൽ കോളേജ് ആസ്പത്രിയിലും ഇതിനായി പ്രത്യേക സംവിധാനങ്ങൾ ഉടൻ സജ്ജമാക്കും. ആരോഗ്യമന്ത്രി വീണാ ജോർജിന്‍റെ പ്രത്യേക നിർദേശപ്രകാരമാണ് നടപടി. സ്വകാര്യ ആസ്‌പത്രികളിൽ ലക്ഷക്കണക്കിന് രൂപ ചെലവുവരുന്നതാണ് കരൾ മാറ്റിവെക്കൽ ശസ്ത്രക്രിയ. 20 ലക്ഷംമുതൽ 40 ലക്ഷം രൂപവരെയോ അതിലുമേറെയോ ചെലവ് പ്രതീക്ഷിക്കണം. ഇത്രയും ചെലവേറിയതും സങ്കീർണവുമായ ചികിത്സയാണ് ഗവ. മെഡിക്കൽ കോളേജ് ആസ്പത്രികളിൽ സൗജന്യമായി ചെയ്യുന്നത്. സർക്കാർമേഖലയിൽ ഒരിടത്തും കരൾ മാറ്റിവെക്കൽ ശസ്ത്രക്രിയ നടക്കുന്നില്ലെന്ന അവസ്ഥയിലാണ് ആരോഗ്യവകുപ്പ് ഇടപെട്ടത്.

കോട്ടയം ഗവ. മെഡിക്കൽ കോളേജ് ആസ്പത്രിയിൽ കുറച്ചുദിവസം മുൻപ് സർക്കാർമേഖലയിലെ ആദ്യ കരൾ മാറ്റിവെക്കൽ ശസ്ത്രക്രിയ വിജയകരമായി നടന്നു. തിരുവനന്തപുരം, കോഴിക്കോട് മെഡിക്കൽ കോളേജ് ആസ്പത്രികളിൽ കരൾമാറ്റിവെക്കൽ ശസ്ത്രക്രിയകൾക്കായുള്ള ഓപ്പറേഷൻ തിയേറ്റർ, ലിവർ ട്രാൻസ്‌പ്ലാന്റ് ഐ.സി.യു., അത്യാധുനിക ഉപകരണങ്ങൾ തുടങ്ങിയവ സജ്ജീകരിക്കുന്നുണ്ട്. ദാതാവിനും സ്വീകർത്താവിനും വെവ്വേറെ ഐ.സി.യു.കൾ, പ്രത്യേക പരിശീലനം നേടിയ സ്റ്റാഫ് തുടങ്ങിയ സജ്ജീകരണങ്ങളുമുണ്ടാകും. വിവിധ വിഭാഗം ജീവനക്കാർക്ക് പരിശീലനവും നൽകും.

സ്വകാര്യമേഖലയിലെ അവയവ മാറ്റിവെക്കൽ ശസ്ത്രക്രിയ വ്യക്തികൾക്കും കുടുംബങ്ങൾക്കും വലിയ സാമ്പത്തിക ബാധ്യതയാണുണ്ടാക്കുന്നത്. ഈ സാഹചര്യത്തിലാണ് സർക്കാർമേഖലയിൽ ഇത് സാധ്യമാക്കാൻ തീരുമാനിച്ചത്. ആരോഗ്യമേഖലയിൽ ഇത് വലിയ നേട്ടത്തിന് വഴിതെളിക്കും. തിരുവനന്തപുരം ഗവ. മെഡിക്കൽ കോളേജ് ആസ്പത്രിയിൽ കരൾ മാറ്റിവെക്കലിന് മാത്രമായി പ്രത്യേക യൂണിറ്റ് സജ്ജമാക്കുകയാണ് ലക്ഷ്യം.