കതിരൂർ : പ്ലാസ്റ്റിക് മാലിന്യം വിറ്റ് ലഭിക്കുന്ന പണത്തിൽ ഒരുവിഹിതം കാൻസർ ചികിത്സയ്ക്ക് നൽകുന്ന ‘കതിരൂർ കെയർ’ പദ്ധതിക്ക് ലോക കാൻസർദിനത്തിൽ തുടക്കം. ഇന്ന്‌ (വെള്ളിയാഴ്ച) വൈകീട്ട് ജില്ലാ പഞ്ചായത്ത് പ്രസിഡന്റ് പി.പി. ദിവ്യ പഞ്ചായത്ത് ഹാളിൽ പദ്ധതി ഉദ്ഘാടനം ചെയ്യും.

മണ്ണ്, വായു, ജലം എന്നിവ സംരക്ഷിക്കുക എന്ന മുദ്രാവാക്യം മുൻനിർത്തി പത്തുവർഷമായി പ്രവർത്തിക്കുന്ന സംഘടനയാണ് ‘കതിരൂർ കെയർ’. പഞ്ചായത്തിൽനിന്ന് ശേഖരിക്കുന്ന പ്ലാസ്റ്റിക് മാലിന്യമാണ്‌ ഇതിനായി പ്രയോജനപ്പെടുത്തുക. പഞ്ചായത്തിലെ ഹരിതകർമസേനാ വൊളന്റിയർമാരുടെ കൺസോർഷ്യമാണ് ഇത്തരം ഒരു തീരുമാനമെടുത്തതെന്ന് കതിരൂർ പഞ്ചായത്ത് പ്രസിഡന്റ് പി.പി.സനിൽ പറഞ്ഞു.

18 വാർഡുകളിലെ 24 വനിതാ കർമസേന വൊളന്റിയർമാർ കൂറ്റേരിച്ചാലിലെ സംസ്കരണപ്ലാന്റിൽ എത്തിക്കുകയും ക്ലീൻകേരള കമ്പനിക്ക് കൈമാറുകയും ചെയ്യുന്നു. പുനരുത്പാദനം ചെയ്യാൻ സാധിക്കാത്ത പ്ലാസ്റ്റിക്കുകൾ പ്രത്യേക യന്ത്രം ഉപയോഗിച്ച് പൊടിച്ച്‌ അവ റോഡ് ടാറിങ്ങിനായി ഉപയോഗിക്കും.

2021-22 സാമ്പത്തികവർഷം ലഭിച്ച തുകയുടെ വിഹിതമാണ് രോഗികൾക്ക് കൈമാറുക. 18,826 കിലോഗ്രാം പ്ലാസ്റ്റിക് മാലിന്യം ക്ലീൻകേരള കമ്പനിക്ക് നൽകിയ ഇനത്തിൽ 2,56,579 രൂപയും 8350 കിലോഗ്രാം പ്ലാസ്റ്റിക് മാലിന്യം പൊടിച്ച് റോഡ് ടാറിങ്ങിന് കൈമാറിയ വകയിൽ 1,25,000 രൂപയും ലഭിച്ചു.

ആറുമാസമായി ചെരുപ്പ്, ബാഗ്, തുണിമാലിന്യം കുപ്പിച്ചില്ല്, ഇലക്‌ട്രോണിക്സ് മാലിന്യം എന്നിവ ശേഖരിച്ച് കയറ്റി അയക്കുന്നു. ഇത്തരം മാലിന്യം കയറ്റി അയക്കുന്നതിന് ക്ലീൻകേരള കമ്പനിക്ക് നിശ്ചിത തുക നൽകണം. ഈ തുക വീടുകളിൽനിന്ന് ലഭിക്കുന്ന യൂസർഫീ വഴിയാണ് കണ്ടെത്തുന്നത്. ഒരു വീട്ടിൽനിന്ന് 50 രൂപയാണ് യൂസർഫീയായി വാങ്ങിക്കുന്നത്.

കതിരൂർ പഞ്ചായത്ത് പരിധിയിലെ സ്ഥിരതാമസക്കാരെയാണ് സഹായം നൽകുന്നതിന് പരിഗണിക്കുക. കാൻസറിന് ചികിത്സ നടത്തിക്കൊണ്ടിരിക്കുന്നവരെയും സാമ്പത്തിക ബുദ്ധിമുട്ട് അനുഭവിക്കുന്നവരെയും കണ്ടെത്തി പഞ്ചായത്ത് തലത്തിൽ മുൻഗണനാ ലിസ്റ്റ് തയ്യാറാക്കും.