പാപ്പിനിശേരി : ദേശീയപാത വികസനത്തിനായി കീച്ചേരിയിലെ കൂറ്റൻ ആൽമര മുത്തശ്ശിയും വഴിമാറി. തളിപ്പറമ്പിനും പാപ്പിനിശേരിക്കുമിടയിൽ പാതക്കരികിൽ നിരവധി ആൽമരങ്ങൾ ഉണ്ടായിരുന്നു. പലതും മുറിച്ചുമാറ്റിയപ്പോൾ ചിലത് സ്വാഭാവികമായി നശിച്ചു. അവശേഷിച്ച ഏറ്റവും വലിയ ആൽമരമാണ് കീച്ചേരിയിലേത്. ഈ മരമാണ്‌ ഞായറാഴ്ച മുറിച്ചുതുടങ്ങിയത്‌. നിലവിൽ കീച്ചേരിയിൽ ഓട്ടോ ടാക്സി സ്റ്റാൻഡും വഴിയോര വാണിഭവും നടക്കുന്ന പ്രധാന കേന്ദ്രവും ഈ മരച്ചുവട്ടിലായിരുന്നു. സ്വാതന്ത്ര്യ സമരത്തിന്റെ ഭാഗമായി ഒട്ടേറെ സമരങ്ങൾക്ക്‌ തുടക്കമിട്ടതും ജനക്കൂട്ടം ഒത്തുകൂടിയതും ഇവിടെയായിരുന്നു. മോറാഴ സംഭവം, ഉപ്പ് സത്യഗ്രഹം ഉൾപ്പെടെ നിരവധി പ്രക്ഷോഭങ്ങൾക്ക്‌ സാക്ഷിയാണ്. ഒന്നര നൂറ്റാണ്ടിലേറെ പ്രായമുണ്ടാകുമെന്നാണ്‌ കണക്കാക്കുന്നത്‌. 

1920– 1947 കാലത്ത്‌ നിരവധി ചരിത്ര മുഹൂർത്തങ്ങൾക്കും മഹാരഥൻന്മാരായ സ്വാതന്ത്ര്യ സമര നേതാക്കളുടെ കൂടിച്ചേരലുകളുടെയും കേന്ദ്രമായിരുന്നു ഈ മരചുവട്. ബ്രിട്ടീഷ് സാമ്രാജ്യത്വം രണ്ടാംലോക മഹായുദ്ധത്തിൽ ഇന്ത്യയെ പങ്കാളിയാക്കിയതിൽ പ്രതിഷേധിച്ച് കേരള പ്രദേശ്‌ കോൺഗ്രസ്‌ കമ്മിറ്റിയുടെ ആഹ്വാന പ്രകാരം 1940 സെപ്തംബർ 15ന് സാമ്രാജ്യത്വവിരുദ്ധ ദിനമായി ആചരിക്കാൻ തീരുമാനിച്ചു. എന്നാൽ, അന്നത്തെ സർക്കാർ അത് നിരോധിച്ചു. ഇത്‌ ലംഘിച്ച്‌ കീച്ചേരിയിൽ കെ.പി.ആർ ഗോപാലന്റെ. നേതൃത്വത്തിൽ ഒരു വൻ പൊതുയോഗം ചേരാൻ തീരുമാനിച്ചു. യോഗം നിരോധിച്ചതിനാൽ അഞ്ചാം പിടികയിലേക്ക് പൊതുയോഗം മാറ്റിയെങ്കിലും സമര ഭടന്മാർ കീച്ചേരിയിലെ ഈ ആൽമരച്ചുവട്ടിൽ സംഗമിച്ചാണ് അഞ്ചാംപീടികയിലേക്ക് നീങ്ങിയത്.
പയ്യന്നൂരിൽ നടന്ന ഉപ്പ് നിയമ ലംഘന പരിപാടിയിൽ പങ്കെടുക്കാൻ തിരിച്ച കെ കേളപ്പന്റെ നേതൃത്യത്തിലുള്ള സത്യഗ്രഹികളുടെ സംഘം വിശ്രമിച്ചതും ഈ മരച്ചുവട്ടിലാണ്. ചരിത്രങ്ങളുടെ ഒട്ടേറെ അടയാളപ്പെടുത്തലുകൾക്ക് സാക്ഷിയായ മരമുത്തശ്ശി നാടിന്റെ ഹൃദയവികാരമായി മനസിൽ തലയെടുപ്പോടെ നിലനിൽക്കും.