കാഞ്ഞങ്ങാട്: സഞ്ചരിക്കുന്ന മൃഗാശുപത്രിവരെയുണ്ടായിട്ടും കറവപ്പശുക്കൾ ഒന്നിനു പിറകെ ഒന്നായി ചത്തുവീഴുന്നതിൽ ക്ഷീരകർഷകർക്ക് ആശങ്ക. മരണകാരണം അറിയാത്തതും നഷ്ടപരിഹാരം കിട്ടാത്തതും ക്ഷീരകർഷകരുടെ ദുരിതം ഇരട്ടിപ്പിക്കുകയാണ്.

മടിക്കൈ പഞ്ചായത്തിലെ കാലിച്ചാംപൊതി ക്ഷീരോത്പാദക സഹകരണ സംഘത്തിനു കീഴിലെ കർഷകരുടെ പശുക്കളാണ് ചത്തുവീഴുന്നത്. കാലിച്ചാംപൊതിയിലെ പനക്കൂൽ കൃഷ്ണന്റെ ഒരു പശു ഇക്കഴിഞ്ഞ ശനിയാഴ്ച ചത്തു.  നാലു പശുക്കളാണ് ഒന്നരവർഷത്തിനിടയിൽ ചത്തത്. 22 ലിറ്റർ വരെ പാൽകിട്ടുന്ന പശുവാണ് ശനിയാഴ്ച ചത്തത്.  ഇൻഷൂർ ആനുകൂല്യം കിട്ടുന്നതിന് അപേക്ഷിച്ചെങ്കിലും കാലിച്ചാംപൊതി മൃഗാശുപത്രിയിലെ വെറ്ററിനറി സർജന്മാരുടെ ജാഗ്രതക്കുറവിൽ നഷ്ടപരിഹാരം കിട്ടാതെ പോയി.

ക്ഷീരോത്പാദക സഹകരണ സംഘം പ്രസിഡന്റ് കൃഷ്ണൻ ചാളക്കടവിന്റെ പശു ഇക്കഴിഞ്ഞ ഒക്ടോബറിലാണ് ചത്തത്. പ്രസവിച്ച് 10 ദിവസം കഴിഞ്ഞപ്പോഴായിരുന്നു മരണമെന്ന് കൃഷ്ണൻ പറഞ്ഞു. കാലിച്ചാംപൊതിയിലെ എൻ. കൃഷ്ണന്റെ അനുഭവവും വ്യത്യസ്തമല്ല. 80,000രൂപ വിലവരുന്ന പശുവാണ് ചത്തത്. ഇതിന് നഷ്ടപരിഹാരമായി കിട്ടിയത് 10,000 രൂപയും.