തിരുവനന്തപുരം: പഞ്ചായത്തുകളിൽനിന്ന് പദ്ധതിവിഹിതം ലഭിക്കാൻ ഗുണഭോക്താക്കൾ തിരിച്ചറിയൽ രേഖയായി ഇനി ആധാർ സമർപ്പിക്കണം. ആടും കോഴിയും പശുവും പച്ചക്കറിവിത്തും ചെടികളും സാധനങ്ങളും പണവും ഉൾപ്പെടെ ഏത് വിഹിതത്തിനുള്ള ഗുണഭോക്തൃപ്പട്ടികയിൽ ഉൾപ്പെട്ടാലും ആധാർ ആധികാരിക രേഖയാകും. തദ്ദേശ വകുപ്പിന്റെ ഓൺലൈനായുള്ള പരാതിപരിഹാര സംവിധാനത്തിൽ അപേക്ഷകരെ തിരിച്ചറിയാനും ആധാർ ഉപയോഗിക്കും. ഇതുസംബന്ധിച്ച് തദ്ദേശ വകുപ്പ് വിജ്ഞാപനം പുറത്തിറക്കി. ആധാർ സമർപ്പിക്കാനായി കേന്ദ്ര നിയമപ്രകാരം അപേക്ഷകന്റെ സമ്മതപത്രം വാങ്ങും.

ഇന്റഗ്രേറ്റഡ് ലോക്കൽ ഗവൺമെന്റ് മാനേജ്മെന്റ് സിസ്റ്റം (ഐ.എൽ.ജി.എം.എസ്) എന്ന ഓൺലൈൻ സേവന സംവിധാനം നടപ്പാക്കിയ 309 പഞ്ചായത്തുകളിലാണ് പരിഷ്കാരം ആദ്യം നടപ്പാക്കുക. ഏപ്രിൽ മുതൽ ഐ.എൽ.ജി.എം.എസ് സേവനം ബാക്കിയുള്ള 632 പഞ്ചായത്തുകളിലും വ്യാപിപ്പിക്കുമ്പോൾ പഞ്ചായത്തുതലത്തിൽ പരിഷ്കാരം പൂർണമാകും. നിലവിൽ തദ്ദേശസ്ഥാപനങ്ങൾ വഴി വിതരണം ചെയ്യുന്ന 5 തരം ക്ഷേമപെൻഷൻ വാങ്ങുന്നവർ നിർബന്ധമായും ആധാർ വിവരങ്ങൾ നൽകണം. ഈ വി‍ജ്ഞാപനത്തോടെ, വിധവകളുടെ മക്കൾക്കുള്ള വിവാഹ ധനസഹായ വിതരണത്തിന് കൂടി ആധാർ സമർപ്പിക്കേണ്ടി വരുമെന്ന് പഞ്ചായത്ത് ഡയറക്ടറേറ്റ് അധികൃതർ വ്യക്തമാക്കി. ഒരാൾക്ക് ഒന്നിൽ കൂടുതൽ തവണ ഈ വിഹിതം നൽകാൻ നിയമം അനുവദിക്കുന്നില്ല.

പദ്ധതിവിഹിതം ഇപ്പോൾ പട്ടികയിലെ പേരു നോക്കി

പഞ്ചായത്തുകളിലെ പദ്ധതിവിഹിതത്തിനായി ഗ്രാമസഭകൾ അംഗീകരിച്ച ഗുണഭോക്തൃപ്പട്ടികയാണ്‌ മാനദണ്ഡം. ഇതിലെ പേരുകൾ അടിസ്ഥാനമാക്കിയാണ് ഇപ്പോൾ വിഹിതം നൽകുന്നത്. പഞ്ചായത്തുകളുമായി ബന്ധപ്പെട്ടുള്ള കൃഷി, മൃഗസംരക്ഷണം, ക്ഷീരവികസനം, പൊതുവിദ്യാഭ്യാസം, ഫിഷറീസ്, ആരോഗ്യം, പട്ടികവിഭാഗ വികസനം, വ്യവസായം, സഹകരണം തുടങ്ങിയ 18 വകുപ്പുകളിലായാണ്‌ ഗുണഭോക്തൃ വിഹിതം ലഭിക്കുന്നത്.

എല്ലാ പഞ്ചായത്തിലും ഏപ്രിൽ മുതൽ ഐഎൽജിഎംഎസ്

‘എല്ലാ ഗ്രാമപ്പഞ്ചായത്തുകളിലും ഏപ്രിൽ 1 മുതൽ ഐ.എൽ.ജി.എം.എസ് സേവനം ഉറപ്പാക്കും. പീക്ക് സമയങ്ങളിൽ പ്രവർത്തനവേഗം കുറയുന്നത് സെന്റർ സെർവറിന്റെ പോരായ്മയാണ്. ഇത് പരിഹരിക്കാൻ സി ഡിറ്റിന്റെ നിയന്ത്രണത്തിലുള്ള ക്ലൗഡ് സർവീസ് ഉപയോഗപ്പെടുത്തും.’ – മന്ത്രി എം.വി.ഗോവിന്ദൻ