കണ്ണൂർ : കുട്ടിക്കാലത്ത് കൂട്ടുകാർ വിവിധ കളികളിൽ വ്യാപൃതരാകുമ്പോൾ കടലിലും പുഴയിലും ഓളങ്ങൾ തീർക്കാനായിരുന്നു സ്വാലിഹയ്ക്ക് കമ്പം. സാഹസികമെങ്കിലും മകളുടെ ഇഷ്ടത്തിനൊപ്പം മാതാപിതാക്കളും തുഴയെറിഞ്ഞു. ദീർഘദൂര നീന്തലിലൂടെയും ദീർഘദൂര കയാക്കിങ്, റോളർ സ്കേറ്റിങ്, യൂണി സൈക്കിൾ എന്നിവയിലൂടെയും നാടിന് അഭിമാനമായി മാറിയ സ്വാലിഹ മറ്റൊരു സാഹസത്തിന് മുതിരുകയാണ്. പ്രസിദ്ധമായ സുൽത്താൻതോടിന്റെ കിഴക്കേയറ്റമായ വാടിക്കൽക്കടവിൽനിന്നുള്ള കയാക്കിങ് യാത്രയ്ക്ക്. ശനിയാഴ്ചയാണ് യാത്ര. താര വാടിക്കൽ കലാസാംസ്കാരികവേദി വായനശാലാ ആൻഡ്‌ ഗ്രന്ഥാലയമാണ് സാഹസികയാത്രയുടെ സംഘാടകർ.

15 മണിക്കൂറോളം നീളുന്നതാണ് യാത്ര. വാടിക്കൽക്കടവിൽനിന്ന്‌ പഴയങ്ങാടി പുഴയിലൂടെ മാട്ടൂൽ ഭാഗത്തേക്ക് തുഴയും. തുടർന്ന് അഴീക്കൽ അഴിമുഖം മുറിച്ചുകടന്ന് അഴിക്കോട് കടലിലൂടെ 10 കിലോമീറ്ററോളം ചൂട്ടാട് ഭാഗത്തേക്ക് നീങ്ങും.

അവിടെനിന്ന് പാലക്കോട് അഴിമുഖം മുറിച്ച് ഏഴിമല-മുട്ടം വഴി സുൽത്താൻതോടിൽ പ്രവേശിച്ച് മാട്ടൂലിനെയും പുതിയങ്ങാടിയെയും വലംവെച്ച് വാടിക്കൽക്കടവിൽതന്നെ തിരിച്ചെത്തുന്ന രീതിയിലാണ് യാത്ര വിഭാവനം ചെയ്തിട്ടുള്ളത്. നീന്തൽപരിശീലകനായ അനിൽ ഫ്രാൻസിസും ശിഷ്യനും കായികാധ്യാപകനുമായ ഫെബിനും സ്വാലിഹയുടെ യാത്രയ്ക്കുള്ള സുരക്ഷയുമായി മറ്റൊരു കയാക്കിൽ അനുഗമിക്കും.

വാദിഹുദ ഹയർ സെക്കൻഡറി സ്കൂളിലെ ഒൻപതാം ക്ലാസുകാരിയായ സ്വാലിഹ പരിശീലിച്ച സാഹസികവിനോദങ്ങളൊക്കെ പ്രകൃതിസംരക്ഷണ ബോധവത്‌കരണത്തിന് വേണ്ടിയാണ് ഉപയോഗിക്കുന്നത്. പ്രവർത്തനങ്ങൾക്കുള്ള അംഗീകാരമെന്നോണം സംസ്ഥാനസർക്കാരിന്റെ ഉജ്ജ്വലബാല്യം പുരസ്കാരവും സ്വാലിഹയെത്തേടിയെത്തിയിട്ടുണ്ട്. നീന്തലിലും റോളർ സ്കേറ്റിങ് മത്സരങ്ങളിലും നിരവധി സമ്മാനങ്ങൾ നേടിയ സ്വാലിഹയുടെ ചെറുപ്രായത്തിലെ സാഹസികപ്രകടനങ്ങൾ സി.ബി.എസ്.ഇ. സിലബസിലെ അഞ്ചാംതരം വിദ്യാർഥികൾക്ക് പഠിക്കാനുള്ള എൻവയോൺമെന്റ് സ്റ്റഡീസിൽ ‘ചലഞ്ചേഴ്സ്’ എന്ന തലക്കെട്ടോടെ പാഠമായി വന്നിട്ടുണ്ട്.

സാങ്കേതികവിദ്യാഭ്യാസ ജീവനക്കാരനായ പുതിയങ്ങാടിയിലെ ഏണ്ടിയിൽ റഫീഖിന്റെയും ജാസ്മിന്റെയും മൂത്ത മകളാണ് സ്വാലിഹ. സഹോദരങ്ങൾ: സമീഹ, മുഹമ്മദ് സ്വബാഹ്.