കേന്ദ്ര സര്‍ക്കാരിന്റെ നാഷണല്‍ ഓവര്‍സീസ് സ്‌കോളര്‍ഷിപ്പ് സ്‌കീം/പാസേജ് ഗ്രാന്റ് സ്‌കീം പ്രകാരമുള്ള സ്‌കോളര്‍ഷിപ്പുകള്‍ക്ക് അപേക്ഷിക്കാം.

വിദേശത്ത് മാസ്റ്റേഴ്‌സ്, പിഎച്ച്.ഡി., പോസ്റ്റ് ഡോക്ടറല്‍ പഠനങ്ങള്‍ക്ക് പട്ടികവര്‍ഗ വിദ്യാര്‍ഥികള്‍ക്ക് സാമ്പത്തികസഹായം നല്‍കുന്ന പദ്ധതിയായ നാഷണല്‍ ഓവര്‍സീസ് സ്‌കോളര്‍ഷിപ്പ് സ്‌കീം പ്രകാരം 17 സ്‌കോളര്‍ഷിപ്പുകള്‍ പട്ടികവര്‍ഗ വിദ്യാര്‍ഥികള്‍ക്കും മൂന്നെണ്ണം പര്‍ട്ടിക്കുലര്‍ ലി വള്‍നറബിള്‍ ട്രൈബല്‍ ഗ്രൂപ്പ്‌സ് വിഭാഗക്കാര്‍ക്കും നല്‍കും. ഇവയില്‍ ആറെണ്ണം പെണ്‍കുട്ടികള്‍ക്കാണ്.

പ്രവേശന ഓഫര്‍/പ്രാഥമിക കത്ത് ലഭിച്ചവര്‍ക്ക് മുന്‍ഗണനയുണ്ട്. എന്‍ജിനിയറിങ്, മാനേജ്‌മെന്റ്, ഇക്കണോമിക്‌സ്/ഫൈനാന്‍സ് (മൊത്തം ഏഴെണ്ണം), പ്യുവര്‍/അപ്ലൈഡ് സയന്‍സ് (മൂന്ന്), അഗ്രിക്കള്‍ചര്‍/മെഡിസിന്‍ (അഞ്ച്), ഹ്യുമാനിറ്റീസ്, സോഷ്യല്‍ സയന്‍സസ് (അഞ്ച്) എന്നിങ്ങനെ വിവിധ മേഖലകള്‍ക്ക് സ്‌കോളര്‍ഷിപ്പ് അനുവദിക്കും.

കാലാവധി: പോസ്റ്റ് ഡോക്ടറല്‍  ഒന്നര വര്‍ഷം, പിഎച്ച്.ഡി.  നാല് വര്‍ഷം, മാസ്റ്റേഴ്‌സ്  1/2/3 (പ്രോഗ്രാം ദൈര്‍ഘ്യമനുസരിച്ച്)

സഹായം: പ്രതിവര്‍ഷ മെയിന്റനന്‍സ് അലവന്‍സ് 15,400 യു.എസ്. ഡോളര്‍/9900 പൗണ്ട്; പ്രതിവര്‍ഷ കണ്ടിന്‍ജന്‍സി/എക്വിപ്‌മെന്റ് അലവന്‍സ്  1532 യു.എസ്. ഡോളര്‍/1116 പൗണ്ട്. മറ്റാനുകൂല്യങ്ങളും ഉണ്ട്.

വിദ്യാഭ്യാസ യോഗ്യത, പ്രായം, കുടുംബവരുമാന പരിധി, മറ്റു വ്യവസ്ഥകള്‍ക്കും ഓണ്‍ലൈന്‍ അപേക്ഷയ്ക്കും https://overseas.tribal.gov.in/ കാണുക.

വിദേശ സര്‍ക്കാര്‍/ഓര്‍ഗനൈസേഷന്‍ എന്നിവയില്‍ നിന്നും അല്ലെങ്കില്‍ മറ്റേതെങ്കിലും പദ്ധതിപ്രകാരം വിദേശത്ത് പി.ജി. പഠനം, ഗവേഷണം, പരിശീലനം എന്നിവയ്ക്ക് സ്‌കോളര്‍ഷിപ്പ് ലഭിച്ച, എന്നാല്‍ യാത്രാചെലവ് ലഭിക്കാത്ത പട്ടികവര്‍ഗ വിഭാഗക്കാര്‍ക്ക് നാല് പാസെജ് ഗ്രാന്റിലേക്കും മന്ത്രാലയം അപേക്ഷ ക്ഷണിച്ചിട്ടുണ്ട്. അപേക്ഷ ഡിസംബര്‍ 31ന് വൈകീട്ട് അഞ്ചുവരെ നല്‍കാം.