കണ്ണൂർ: സംസ്ഥാനത്ത് വനംവകുപ്പിന്റെ പകുതിയിലധികം വാഹനങ്ങളും ഓടിക്കുന്നത് താത്‌കാലിക ഡ്രൈവർമാർ. പി.എസ്.സി. റാങ്ക് പട്ടികയിലുള്ള ഉദ്യോഗാർഥികൾ അവസരം കാത്തുനിൽക്കുമ്പോഴാണിത്. ആവശ്യത്തിന്‌ തസ്തിക സൃഷ്ടിക്കാത്തതാണ് ഇതിനു കാരണം. ആകെ 587 വാഹനങ്ങളാണ് വനംവകുപ്പിനുള്ളത്. ഇതിൽ 328 എണ്ണവും താത്‍കാലിക ഡ്രൈവർമാരാണ് ഓടിക്കുന്നത്. സ്ഥിരം ഡ്രൈവർ തസ്തിക സൃഷ്ടിക്കുകയോ അല്ലെങ്കിൽ എംപ്ലോയ്‌മെന്റ് എക്സ്ചേഞ്ച് മുഖേന നിയമനം നടത്തുകയോ വേണമെന്ന സർക്കാർ ഉത്തരവ് മറികടന്നാണ് കരാറടിസ്ഥാനത്തിലും മറ്റുമുള്ള നിയമനമെന്ന് ഉദ്യോഗാർഥികൾ ആരോപിക്കുന്നു.

വനംവകുപ്പ് 2014-ലെ ചട്ടം ഭേദഗതി ചെയ്ത് ഡ്രൈവർ തസ്തിക സേനയുടെ ഭാഗമാക്കി മാറ്റിയിരുന്നു. ഇതിനുശേഷം ഫോറസ്റ്റ് ഡ്രൈവർ തസ്തികയിലേക്ക് ആദ്യമായിട്ടാണ് 2017-ൽ പി.എസ്.സി. അപേക്ഷ ക്ഷണിച്ചത്. 2018 ഏപ്രിലിൽ എഴുത്തുപരീക്ഷയും 2020 നവംബറിൽ ശാരീരികക്ഷമാതാപരീക്ഷയും പൂർത്തിയാക്കി.

കണ്ണൂരിൽ പാതിയുംതാത്‌കാലികക്കാർ : കണ്ണൂർ ജില്ലയിൽ 18 വാഹനങ്ങളാണ് വനംവകുപ്പിലുള്ളത്. ഇതിൽ ഒൻപത്‌ വാഹനങ്ങൾ മാത്രമാണ് പി.എസ്.സി. വഴി നിയമനം നേടിയവർ ഓടിക്കുന്നത്. ജില്ലയിൽ ഏഴുപേരടങ്ങുന്ന മുഖ്യപട്ടികയാണ് 2021 ജൂൺ എട്ടിനു പി.എസ്.സി. പ്രസിദ്ധീകരിച്ചത്. ഇതിൽ ഇതുവരെ മൂന്നുപേർക്ക് മാത്രമാണ് നിയമനം ലഭിച്ചത്.

പട്ടികയിലെത്തുന്നത് വലിയ കടമ്പ കടന്ന് : ഹെവി വാഹനങ്ങൾ ഓടിച്ച് മൂന്നുവർഷത്തെ പരിചയമുള്ളവർക്കാണ് പി.എസ്.സി.യുടെ ഡ്രൈവർ പരീക്ഷയ്ക്ക് അപേക്ഷിക്കാൻ സാധിക്കുക. താത്‌കാലികക്കാരെ സ്ഥിരമായി നിയമിക്കുന്നതിനാൽ റാങ്ക് പട്ടികയിൽ ഉൾപ്പെട്ടവർക്ക് അവസരം നഷ്ടമാകുകയാണ്. ഇനിയൊരു പരീക്ഷ എഴുതാൻ സാധിക്കാത്ത നിരവധിപ്പേർ പട്ടികയിലുണ്ട്. മലപ്പുറം, പത്തനംതിട്ട, തിരുവനന്തപുരം ജില്ലകളിൽ മുഖ്യപട്ടികയിലുള്ള മുഴുവൻ പേർക്കും നിയമനം ലഭിച്ചിട്ടുണ്ട്.