തിരുവനന്തപുരം: സംസ്ഥാനത്തെ വനമേഖലയിൽനിന്ന്‌ അധിനിവേശ സസ്യങ്ങളെയും ജീവജാലങ്ങളെയും ഒഴിവാക്കി സ്വാഭാവിക വനവത്‌കരണം ലക്ഷ്യമിട്ട വനനയത്തിന് മന്ത്രിസഭ അംഗീകാരം നൽകി. വിദേശമരങ്ങൾ നിൽക്കുന്ന 27,000 ഹെക്ടർ പ്രദേശം സ്വഭാവിക വനമാക്കുകയാണ് ലക്ഷ്യം. ഓരോ പ്രദേശത്തെയും ഘടനയ്ക്ക് അനുസരിച്ച് അനുയോജ്യമായ തദ്ദേശീയ വൃക്ഷങ്ങൾ വെച്ചുപിടിപ്പിക്കും. യൂക്കാലിപ്റ്റസ്, അക്കേഷ്യ, മാഞ്ചിയം, വാറ്റിൽ തുടങ്ങിയവ ഘട്ടംഘട്ടമായി ഒഴിവാക്കും. പകരം ഇരൂൾ, കരിമരുത്, മാവ്, പ്ലാവ്, ഞാവൽ, കാഞ്ഞിരം, അത്തി, ആൽ എന്നിവ വെച്ചുപിടിപ്പിക്കും. അതീവ പരിസ്ഥിതിലോല പ്രദേശങ്ങളിലെ തോട്ടങ്ങൾ സ്വാഭാവിക വനങ്ങളാക്കും. സ്വകാര്യ എസ്റ്റേറ്റുകളും കണ്ടൽക്കാടുകളും സർക്കാർ ഏറ്റെടുക്കും.

സർക്കാർ ഉടമസ്ഥതയിലുള്ള തേക്കുതോട്ടങ്ങളിൽ ഗുണകരമല്ലാത്തവ ഒഴിവാക്കി തദ്ദേശീയ മരങ്ങൾ വെച്ചുപിടിപ്പിക്കും. എക്കൽ നിറഞ്ഞ സമുദ്രതീരങ്ങളിൽ പൂവരശ്, വാക, തെങ്ങ്, വേലിപ്പരുത്തി, നോനി, കുടംപുളി എന്നിവയും പുഴ, നദി തീരങ്ങളിൽ നാങ്ക്, വെൺകട്ട, വെട്ടി, പുന്ന, കാര, അമ്പയം, വെൺതേക്ക്, കിളിമരം, അത്തി, പൂവം, ആറ്റുവഞ്ചി എന്നിവയും നടുന്നതോടെ മണ്ണൊലിപ്പ് തടയാനാകും. സമതല പ്രദേശങ്ങളിൽ അശോകം, ആര്യവേപ്പ്, കുടംപുളി, പതിമുഖം, മന്ദാരം, കണിക്കൊന്ന, മുള, പേര, അയണി, ചരൽപ്പഴം. എബണി, കുടപ്പന, കിളിനാങ്ക് എന്നിവയും വെള്ളക്കെട്ടുള്ള താഴ്ന്നപ്രദേശങ്ങളിൽ മണിമരുത്, നീർമരുത്, ഒങ്ങ്, ചോലവേങ്ങ, ഞാവൽ, പരമ്പരകുമ്പിൾ, കടമ്പ്‌, ഉയരം കൂടിയ പ്രദേശങ്ങളിൽ മഴുകാഞ്ഞിരം, ഈട്ടി, കുളമാവ്, വാലി, മരോട്ടി, വയണ, ചോലപ്പൂവം, പൂശിപ്പഴം, വലിയവെള്ളപ്പൻ, ചെങ്കുറിഞ്ഞി, കുന്തിരിക്കം, നിറമ്പാലി, കൊണ്ടപ്പന എന്നിവയും നടും. ആദിവാസി സമൂഹത്തിന് ഇതുവഴി തൊഴിൽ നൽകാനാകും. ആഫ്രിക്കൻ ഒച്ച്, ആഫ്രിക്കൻ മുഷി തുടങ്ങിയവയെ വനമേഖലകളിൽനിന്ന്‌ ഒഴിവാക്കും. കൈയേറ്റം ഒഴിവാക്കാൻ വനാതിർത്തികൾ തിരിക്കും.