തിരുവനന്തപുരം: ഇക്കൊല്ലവും ആഘോഷത്തോടെയുള്ള ക്ഷേത്രോത്സവങ്ങൾ പ്രതിസന്ധിയിൽ. സ്റ്റേജ് പരിപാടികൾക്ക് ജില്ലാ കളക്ടറുടെ അനുമതി വാങ്ങണമെന്ന് തിരുവിതാംകൂർ ദേവസ്വംബോർഡ് നിർദേശം നൽകി.

ആനയെ എഴുന്നള്ളിക്കാൻ വനംവകുപ്പിന്റെ അനുമതി ആവശ്യമാണ്. പൊതുചടങ്ങുകൾക്ക് തുറന്നവേദിയിൽ 200, ഓഡിറ്റോറിയങ്ങളിൽ 100 എന്നിങ്ങനെയാണ് പങ്കെടുക്കാവുന്നവരുടെ എണ്ണം. ഉത്സവങ്ങൾക്കും പെരുന്നാളുകൾക്കും എത്രപേർക്കുവരെ പങ്കെടുക്കാമെന്ന് സർക്കാർ ഇതുവരെ പ്രത്യേകമായി നിർദേശിച്ചിട്ടില്ലാത്തതിനാൽ 200 പേരിൽക്കൂടുതൽ ഇപ്പോഴത്തെ സാഹചര്യത്തിൽ അനുവദിക്കാനിടയില്ല.

കളക്ടർ അധ്യക്ഷനായ ജില്ലാ ദുരന്തനിവാരണ അതോറിറ്റിയുടെ നിലപാടാകും നിർണായകം. ആചാരപരമായ ചടങ്ങുകൾ നടത്താൻ വിലക്കില്ലെങ്കിലും ആൾക്കൂട്ടം പാടില്ലെന്നാണ് വ്യവസ്ഥ. നിയന്ത്രണം കടുപ്പിച്ചാൽ ഇപ്പോൾത്തന്നെ കഷ്ടപ്പാടിലും ദാരിദ്ര്യത്തിലുമായ കലാകാരന്മാരുടെ അവസ്ഥ പരിതാപകരമാകും.

സാമ്പത്തികപ്രതിസന്ധി രൂക്ഷമായ സാഹചര്യത്തിൽ മിതത്വം പാലിക്കണമെന്നും ആർഭാടം ഒഴിവാക്കി ആചാരപരമായ ചടങ്ങുകൾ ലളിതമാക്കണമെന്നും ഭരണസമിതികൾക്കും ദേവസ്വം ഉദ്യോഗസ്ഥർക്കും നിർദേശം നൽകി. ഉത്സവനടത്തിപ്പിന് സംഭാവന സ്വീകരിക്കാൻ ഉപദേശകസമിതികൾക്ക് ദേവസ്വംബോർഡ് കൂപ്പൺ സീൽചെയ്ത് നൽകും. കൂപ്പൺതുകയുടെ അഞ്ചുശതമാനം ദേവസ്വംഫണ്ടിൽ ഒടുക്കണം. പിരിക്കുന്ന പണം ജോയന്റ് അക്കൗണ്ടിൽ നിക്ഷേപിക്കുകയും വേണം.