കണ്ണൂർ: കണ്ണൂർ കാൽടെക്സ് പരിസരത്ത് ദേശീയ പാതയുടെ നടുക്കുള്ള വൃക്ഷങ്ങൾ ഗതാഗതക്കുരുക്കിന് കാരണമാകുന്നു. ഈ മരങ്ങൾ സുരക്ഷിതമായി പിഴുതെടുത്ത് മറ്റൊരിടത്ത് വളർത്തണമെന്ന ചർച്ചകൾ ഉയരുന്നു. ദേശീയപാതാ വികസനത്തിന്റെ ഭാഗമായി മുറിച്ചുമാറ്റാൻ തീരുമാനിച്ച പിലാത്തറ ടൗണിലെ വലിയ ആൽമരം വൃക്ഷസ്നേഹികൾ ജെ.സി.ബി.ഉപയോഗിച്ച് പിഴുതെടുത്ത് രണ്ട് കിലോമീറ്റർ അകലെയുള്ള പൂത്തൂർ ഗ്രാമത്തിൽ നട്ട് സംരക്ഷിക്കുന്ന വാർത്തയറിഞ്ഞതോടെയാണ് ഈ മരവും അത്തരത്തിൽ മാറ്റി നട്ട് സംരക്ഷിക്കണമെന്ന ചർച്ചകൾ ഉയരുന്നത്.

കണ്ണൂർ നഗരത്തിൽ ഏറ്റവും രൂക്ഷമായി ഗതാഗതക്കുരുക്ക് അനുഭവപ്പെടുന്ന സ്ഥലമാണ് ഈ മരങ്ങൾ വളർന്നു നിൽക്കുന്ന സ്ഥലം. ഏഴ് മീറ്ററോളം ഉയരത്തിൽ വളർന്നിരിക്കുന്ന നാല് മരങ്ങൾ കല്ല് കെട്ടി കോൺക്രീറ്റ് ചെയ്ത് സംരക്ഷിച്ചിട്ടുണ്ട്. ഔഷധഗുണമുള്ള അങ്കോലം എന്ന വൃക്ഷമാണിത്. പത്തു മീറ്ററോളം ഉയരത്തിൽ വളരുന്ന ഈ മരങ്ങൾ നിർദിഷ്ട ഫ്ലൈ ഓവർ നിർമാണത്തിന് തടസ്സമാവും. ഈ മരങ്ങൾ കേട് കൂടാതെ ജെ.സി.ബി.ഉപയോഗിച്ച് പിഴുതെടുത്ത് യൂണിവേഴ്സിറ്റി വളപ്പിലോ ട്രെയിനിങ്ങ് സ്കൂൾ പരിസരത്തോ നട്ട് സംരക്ഷിക്കാം. മരത്തിന്റെ പ്രധാനവേരുകൾ മുറിയാതെ മാറ്റിനട്ടാൽ സംരക്ഷിക്കാൻ സാധിക്കുമെന്ന് വിദഗ്ധർ പറയുന്നു.

കെ.എസ്.ആർ.ടി.സി. ഡിപ്പോയിൽ നിന്ന് പുറപ്പെട്ട് വടക്കോട്ട് പോകുന്ന ബസ്സുകൾ തിരിച്ചെടുക്കുന്നതിന് മരങ്ങൾ തടസ്സമാണെന്ന് ജീവനക്കാർ പറയുന്നു. മരത്തിന്റെ അരികുപറ്റി സ്വകാര്യ വാഹനങ്ങൾ പാർക്ക് ചെയ്യുന്നതും പതിവായിട്ടുണ്ട്. താണ ഭാഗത്തു നിന്ന് വരുന്ന വാഹനങ്ങൾ കളക്ടറേറ്റിന്റെ മുൻ ഭാഗത്തേക്കും വടക്കുഭാഗത്തേക്കും തിരിയുന്ന സ്ഥലമായതിനാൽ ഗതാഗതക്കുരുക്ക് ഏറ്റവും കൂടുതൽ അനുഭവപ്പെടുന്നതും ഇവിടെയാണ്.