ഉച്ചയ്ക്ക് 12.30 -ഓടെയാണ് പാലക്കാട് കൽപ്പാത്തിയിൽ ഓവുചാലിനുള്ളിൽ ഒരു നായക്കുട്ടി കുടുങ്ങിക്കിടക്കുന്നതായി പാലക്കാട് ഫയർ സ്റ്റേഷനിലേക്ക് ഫോൺ വരുന്നത്. കൽപ്പാത്തി സ്വദേശി ​ഗോപാലകൃഷ്ണനാണ് നായക്കുട്ടി ഓടയ്ക്കുള്ളിൽ കുടുങ്ങിയത് വിളിച്ചറിയിച്ചത്. ഉടനെതന്നെ സീനിയർ ഫയർ ആന്റ് സേഫ്റ്റി ഓഫീസർ ജോജി എം.ജോയിയുടെ നേതൃത്വത്തിലുള്ള സംഘം സംഭവസ്ഥലത്തേക്ക് പുറപ്പെട്ടു. ഫയർഓഫീസർമാരായ കെ.എം.അശോകൻ, നവാസ് ബാബു, സജി, ശിവദാസൻ എന്നിവരാണ് സംഘത്തിലുണ്ടായിരുന്നത്. 

സംഭവസ്ഥലത്തെത്തി നടത്തിയ പരിശോധനയിൽ നായക്കുട്ടി വെള്ളം കടന്നുപോകുന്ന ഓടയ്ക്കുള്ളിൽ അല്പം ഉള്ളിലായി ഒരു കല്ലിന് മുകളിൽ നിലയുറപ്പിച്ചിരിക്കുകയായിരുന്നെന്ന് ഫയർ ഓഫീസർ അശോകൻ പറയുന്നു. വെള്ളത്തിൽ ഇറങ്ങാനുള്ള ഭയം കാരണം എന്തു ചെയ്യണമെന്നറിയാതെ നിൽക്കുകയായിരുന്നു നായക്കുട്ടി. 

ഓടയ്ക്ക് പുറത്തു നിന്നുകൊണ്ട് തന്നെ നായയെ രക്ഷിക്കാനുള്ള ശ്രമം അ​ഗ്നിരക്ഷാസേന ഉദ്യോ​ഗസ്ഥർ നടത്തിയെങ്കിലും ഫലവത്തായില്ല. തുടർന്ന് ഇളക്കി മാറ്റാനാകുന്ന ഒരു സ്ലാബ് നീക്കിയ ശേഷം ഫയർ ഓഫീസർ കെ.എം.അശോകൻ ഓടയ്ക്കുള്ളിലിറങ്ങി ചെളിവെള്ളം കെട്ടിനിൽക്കുന്ന ചാലിൽക്കിടന്നുകൊണ്ട് നായയെ രക്ഷിക്കാനുള്ള ശ്രമം ആരംഭിക്കുകയായിരുന്നു. 

ഏക​ദേശം പതിനഞ്ച് മിനിറ്റ് നീണ്ട പരിശ്രമത്തിന് ശേഷം നായക്കുട്ടിയെ പരിക്കുകളൊന്നും കൂടാതെ പുറത്തെടുക്കാനായെന്നും ഫയർ ഓഫീസർ അശോകൻ മാതൃഭൂമി ഡോട്ട് കോമിനോട് പറഞ്ഞു. പുറത്തെടുത്ത നായക്കുട്ടി അതിന്റെ അമ്മയോടൊപ്പം പോകുന്നത് കണ്ട് സന്തേഷം തോന്നിയെന്നും അദ്ദേഹം പറഞ്ഞു.  കൃത്യസമയത്ത് ഫയർ സ്റ്റേഷനിലേക്ക് വിളിച്ച ​ഗോപാലകൃഷണന്റെയും അ​ഗ്നിരക്ഷാസേനയുടെയും കൃത്യമായ ഇടപെടലിലാണ് നായക്കുട്ടിയെ രക്ഷിക്കാൻ സാധിച്ചത്.

മാതൃഭൂമി ഫോട്ടോ​ഗ്രാഫർ ഇ.എസ്.അഖിൽ പകർത്തിയ നായക്കുട്ടിയെ രക്ഷിക്കാൻ ഓടയ്ക്കുള്ളിലെ ചെളിവെള്ളത്തിൽ കിടന്നുകൊണ്ട് പരിശ്രമിക്കുന്ന അ​ഗ്നിരക്ഷാസേന ഉദ്യോ​ഗസ്ഥൻ കെ.എം.അശോകന്റെ ചിത്രം ഏറെ ശ്രദ്ധിക്കപ്പെട്ടിരുന്നു.