മട്ടന്നൂർ : മട്ടന്നൂർ കിൻഫ്ര വ്യവസായ പാർക്കിന്റെ നിർമാണത്തിന് മാസ്റ്റർ പ്ലാൻ തയ്യാറാക്കുന്നു. വെള്ളിയാംപറമ്പിൽ 150 ഏക്കറോളം സ്ഥലമാണ് വ്യവസായ വികസനത്തിനായി കിൻഫ്ര ഏറ്റെടുക്കുന്നത്. ഇവിടെ വെള്ളവും വൈദ്യുതിയും ഉൾപ്പെടെ അടിസ്ഥാന സൗകര്യങ്ങൾ ഏർപ്പെടുത്തുന്നതിനുള്ള നടപടികൾ പുരോഗമിക്കുകയാണ്.

പാർക്കിൽ 110 കെ.വി. സബ്സ്റ്റേഷൻ, അഡ്മിനിസ്ട്രേറ്റീവ് ബ്ലോക്ക് എന്നിവയുടെ തറക്കല്ലിടൽ അടുത്തമാസം നടത്തുമെന്ന് കെ.കെ.ശൈലജ എം.എൽ.എ. അറിയിച്ചിരുന്നു. വൈദ്യുതി സബ് സ്റ്റേഷൻ നിർമ്മിക്കുന്നതിനായി നൽകേണ്ട തുക കിൻഫ്ര കെ.എസ്.ഇ.ബി.ക്ക് അടച്ചിട്ടുണ്ട്. ഏഴരക്കോടി രൂപയാണ് കിൻഫ്രയുടെ വിഹിതമായി നൽകിയിട്ടുള്ളത്. 15 കോടി രൂപ ചെലവഴിച്ച് നിർമ്മിക്കുന്ന സബ് സ്റ്റേഷന്റെ നിർമ്മാണം ഒരു വർഷത്തിനകം പൂർത്തിയാക്കാനാണ് ഉദ്ദേശിക്കുന്നത്. 

അഡ്മിനിസ്ട്രേറ്റീവ്‌ ബ്ലോക്ക് കെട്ടിടത്തിന്റെ ഭാഗമായി കോൺഫറൻസ് ഹാൾ, ഐ.ടി. സൊല്യൂഷൻ സെൻറർ, ഫുഡ് കോർട്ട് തുടങ്ങിയ സൗകര്യങ്ങളുണ്ടാകും. 12 കോടി രൂപയാണ് കിൻഫ്ര കെട്ടിട നിർമ്മാണത്തിനായി മാറ്റിവെക്കുന്നത്. പാർക്കിലെത്തുന്ന സംരംഭകർക്ക് ചർച്ചകൾ നടത്താനും മറ്റുമുള്ള സൗകര്യങ്ങൾ ഏർപ്പെടുത്തും. 

പ്രാദേശികമായി കൂടുതൽ പേർക്ക് തൊഴിൽ ലഭ്യമാകുന്ന പദ്ധതികൾ പാർക്കിൽ കൊണ്ടുവരാനാണ് ഉദ്ദേശിക്കുന്നത്. ഐ.ടി., ഭക്ഷ്യസംസ്കരണ-കാർഷിക മേഖലയുമായി ബന്ധപ്പെട്ട പദ്ധതികൾ നടപ്പാക്കും. കൺസ്യൂമർ ഗുഡ്സ് പാർക്ക്, ഭക്ഷ്യ സംസ്കരണ യൂണിറ്റ് തുടങ്ങിയ സംരംഭങ്ങൾ തുടങ്ങും. ഇതെക്കുറിച്ച് ചർച്ചചെയ്യാനായി കെ.കെ.ശൈലജ എം.എൽ.എ.യുടെ ആവശ്യപ്രകാരം വ്യവസായ മന്ത്രി പി.രാജീവ് തിരുവനന്തപുരത്ത് പ്രത്യേക യോഗം വിളിച്ചു ചേർത്തിരുന്നു. 

കിൻഫ്ര വ്യവസായ പാർക്കിനായി 127 ഏക്കർ സ്ഥലം സർക്കാർ ഏറ്റെടുത്തിട്ടുണ്ട്. 50 ഏക്കറോളം സ്ഥലം ഏറ്റെടുക്കുന്ന നടപടി അന്തിമഘട്ടത്തിലാണ്.