ആരോഗ്യവകുപ്പില്‍‌ ഡോക്ടർമാരുടെ 202 തസ്തിക സൃഷ്ടിക്കും; അഴീക്കൽ തുറമുഖ വികസനം: മന്ത്രിസഭാ തീരുമാനം

തിരുവനന്തപുരം: ആരോഗ്യവകുപ്പിലെ വിവിധ ആശുപത്രികളിൽ 202 ഡോക്ടർമാരുടെ തസ്തികകൾ സൃഷ്ടിക്കും. കാസർഗോഡ്, വയനാട് മെഡിക്കൽ കോളേജുകളിലും പുതിയ തസ്തികകൾ സൃഷ്ടിക്കാന്‍ മന്ത്രിസഭാ തീരുമാനം.

തസ്തിക

കേരള പോലീസ് അക്കാദമി, റാപ്പിഡ് റെസ്പോൺസ് ആൻഡ് റെസ്ക്യൂ ഫോഴ്സ് എന്നിവിടങ്ങളിൽ രണ്ട് ആർമറർ പോലീസ് കോൺസ്റ്റബിൾ തസ്തികകൾ വീതം ആകെ 4 തസ്തികകൾ സൃഷ്ടിച്ചു.

കായിക താരങ്ങൾക്ക് ഇൻക്രിമെൻ്റ്

ഗുജറാത്തിൽ നടന്ന 36-ാമത് ദേശീയ ഗെയിംസിൽ ഫെൻസിംഗ് ഇനത്തിൽ സ്വർണ്ണ മെഡൽ നേടിയ അവതി രാധികാ പ്രകാശിന് മൂന്നും, സ്വിമ്മിംഗ് ഇനത്തിൽ വെളളി മെഡൽ നേടിയ ഷിബിൻ ലാൽ.എസ്.എസ്-ന് രണ്ടും അഡ്വാൻസ് ഇൻക്രിമെൻ്റ് അനുവദിക്കും.

നിയമനം

ഹൈക്കോടതിയിലെ സീനിയർ ഗവൺമെൻറ് പ്ലീഡർമാരുടെ രണ്ട് ഒഴിവുകളിലേക്ക് നിലവിൽ ഗവൺമെൻറ് പ്ലീഡർമാരായ കൊച്ചി വടുതല സ്വദേശി വി എസ് ശ്രീജിത്ത്, എറണാകുളം നോർത്ത് സ്വദേശി ഒ വി ബിന്ദു എന്നിവരെ നിയമിക്കും. ശേഷിക്കുന്ന രണ്ട് സീനിയർ ഗവൺമെൻറ് പ്ലീഡർമാരുടെ ഒഴിവികളിലേക്ക് കൊച്ചി സൗത്ത് ചിറ്റൂർ സ്വദേശി എം എസ് ബ്രീസ്, കൊച്ചി തണ്ടത്തിൽ ഹൗസിലെ ജിമ്മി ജോർജ് എന്നിവരെയും നിയമിച്ചു.

ഗവൺമെൻറ് പ്ലീഡർമാരായി കൊച്ചി കടവന്ത്ര സ്വദേശി രാജി ടി. ഭാസ്കർ, മട്ടാഞ്ചേരി സ്വദേശി ജനാർദ്ദന ഷേണായ്, കൊച്ചി പവർ ഹൗസ് എക്സ്റ്റൻഷൻ റോഡിൽ താമസിക്കുന്ന എ. സി. വിദ്യ, കാക്കനാട് സ്വദേശി അലൻ പ്രിയദർശി ദേവ്, ഞാറക്കൽ സ്വദേശി ശില്പ എൻ. പി, കൊല്ലം, പുനലൂർ സ്വദേശി നിമ്മി ജോൺസൻ എന്നിവരെ നിയമിച്ചു.

ഡിജിറ്റൽ റീ സർവ്വേ പ്രവർത്തന ചെലവ് ആർ കെ ഐ വഹിക്കും

സംസ്ഥാനത്ത് നടക്കുന്ന ഡിജിറ്റൽ റീ സർവ്വേ പദ്ധതിയുടെ രണ്ടാം ഘട്ട പ്രവർത്തനങ്ങളുടെ 2026 മാർച്ച് 31 വരെയുള്ള ചെലവുകൾക്കായി 50 കോടി രൂപ റീബിൽഡ് കേരള ഇനിഷ്യേറ്റീവ് ഫണ്ടിൽ നിന്നും അനുവദിക്കും.

ശമ്പള പരിഷ്ക്കരണം

കേരള ലാൻഡ് ഡെവലപ്പ്‌മെൻ്റ് കോർപ്പറേഷൻ ലിമിറ്റഡിലെ ജീവനക്കാർക്ക് പത്താം ശമ്പള പരിഷ്കരണ ആനുകൂല്യങ്ങൾ 2016 ഏപ്രിൽ ഒന്ന് പ്രാബല്യത്തിൽ അനുവദിക്കും.

കെൽട്രോണിലെ എക്സിക്യൂട്ടിവ്, സൂപ്പർവൈസറി ക്യാറ്റഗറി ജീവനക്കാരുടെ ശമ്പള പരിഷ്ക്കരണം 2017 ഏപ്രിൽ ഒന്ന് പ്രാബല്യത്തിൽ നടപ്പാക്കും.

പുനഃസംഘടിപ്പിച്ചു

മുന്നാക്ക വിഭാഗങ്ങളിലെ സാമ്പത്തികമായി പിന്നാക്കം നിൽക്കുന്ന വിഭാഗങ്ങൾക്കു വേണ്ടിയുള്ള കേരള സംസ്ഥാന കമ്മീഷൻ പുനഃസംഘടിപ്പിച്ചു. ചെയർമാനായി ഹൈക്കോടതി റിട്ട. ജഡ്‌ജ് സി.എൻ. രാമചന്ദ്രൻ നായർ, അംഗങ്ങളായി തൃശൂർ സ്വദേശി സെബാസ്റ്റ്യൻ ചൂണ്ടൽ, കൊട്ടാരക്കര സ്വദേശി ജി.രതികുമാർ എന്നിവരെ ഉൾപ്പെടുത്തി.

പുനർനിയമനം

സുപ്രീം കോടതി സ്റ്റാൻറിംഗ് കൗൺസിലർമാരായി സി കെ ശശി, നിഷെ രാജൻ ഷോങ്കർ എന്നിവരെ 2025 ജൂലൈ 23 മുതൽ മൂന്ന് വർഷ കാലയളവിലേക്ക് പുനർനിയമിച്ചു.

സേവന കാലാവധി ദീർഘിപ്പിച്ചു

കേരള റബ്ബർ ലിമിറ്റഡിന്റെ ചെയർപേഴ്സൺ ആൻഡ് മാനേജിംഗ് ഡയറക്ടറായ ഷീല തോമസ് ഐ.എ.എസ് (റിട്ട.)ന്റെ സേവന കാലാവധി, 09-09-2025 മുതൽ ഒരു വർഷത്തേയ്ക്ക് കൂടി ദീർഘിപ്പിച്ചു.

ഓയിൽ പാം ഇന്ത്യാ ലിമിറ്റഡിന്റെ ഡയറക്ടർ ബോർഡ് അംഗമായും മാനേജിംഗ് ഡയറക്ടറായുമുള്ള ജോൺ സെബാസ്റ്റ്യൻ്റെ സേവന കാലാവധി ദീർഘിപ്പിച്ചു.

ഭേദഗതി

അഴീക്കൽ തുമറമുഖ വികസനത്തിനായി മലബാർ ഇൻ്റർനാഷണൽ പോർട്ട് & സെസ് ലിമിറ്റഡ് സമർപ്പിച്ച, ഡി.പി.ആറിനും Centre for Management Development (CMD) തയ്യാറാക്കി സമർപ്പിച്ച സാമ്പത്തിക ഘടന റിപ്പോർട്ടിനും അംഗീകാരം നൽകിയ 22-08-2024 ഉത്തരവിലെ നിബന്ധനകൾ ധന വകുപ്പിൻറെ അനുമതിക്ക് വിധേയമായി ഭേദഗതി ചെയ്യും.

സർക്കാർ ഗ്യാരൻറി

സംസ്ഥാന വനിതാ വികസന കോർപ്പറേഷന് 300 കോടി രൂപയ്ക്കുള്ള അധിക സർക്കാർ ഗ്യാരൻറി 15 വർഷത്തേയ്ക്ക് വ്യവസ്ഥകൾക്ക് വിധേയമായി അനുവദിയ്ക്കും.

പാട്ടത്തിന് നൽകും

ഇടുക്കി ആർച്ച് ഡാമിനോട് ചേർന്ന് രണ്ട് ഏക്കർ ഭൂമി തീയേറ്റർ സമുച്ചയം നിർമ്മിക്കുന്നതിന് കെഎസ്എഫ്ഡിസിക്ക് പാട്ടത്തിന് നൽകും.പ്രതിവർഷം ആർ ഒന്നിന് 100 രൂപ നിരക്കിലാണ് 10 വർഷത്തിന് പാട്ടത്തിന് നൽകുകയെന്നും മന്ത്രിസഭാ യോ​ഗം തീരുമാനിച്ചു.