പ്ലസ് വണ്‍ പ്രവേശനം: ഇതുവരെ ലഭിക്കാത്തവര്‍ക്ക് അപേക്ഷിക്കാം
തിരുവനന്തപുരം: പ്ലസ് വണ്‍ പ്രവേശനത്തിന് വിവിധ അലോട്‌മെൻ്റിൽ അപേക്ഷിച്ചിട്ടും ഇതുവരെ ലഭിക്കാത്തവര്‍ക്ക് വീണ്ടും അപേക്ഷിക്കാന്‍ അവസരം. ചൊവ്വാഴ്ച രാവിലെ 10 മുതല്‍ ബുധനാഴ്ച വൈകീട്ട് നാല് വരെ ഹയര്‍ സെക്കന്‍ഡറി വകുപ്പിന്റെ പ്രവേശന വെബ്‌സൈറ്റ് www.hscap.kerala.gov.in ല്‍ അപേക്ഷിക്കാം. ഓരോ സ്‌കൂളിലെയും ബാക്കിയുള്ള സീറ്റിന്റെ വിശദാംശം ചൊവ്വാഴ്ച രാവിലെ വെബ്സൈറ്റില്‍ പ്രസിദ്ധീകരിക്കും. അത് പരിശോധിച്ച് വേണം ഓപ്ഷന്‍ നല്‍കാന്‍. എത്ര ഓപ്ഷന്‍ നല്‍കുന്നതിനും തടസ്സമില്ല. ലഭിക്കുന്ന അപേക്ഷകള്‍ കേന്ദ്രീകൃതമായി പരിഗണിച്ച് മെറിറ്റ് അടിസ്ഥാനത്തില്‍ റാങ്ക് പട്ടിക തയ്യാറാക്കും. ഇത് വ്യാഴാഴ്ച രാവിലെ ഒന്‍പതിന് സൈറ്റില്‍ പ്രസിദ്ധീകരിക്കും. അപേക്ഷകര്‍ പ്രവേശന സാധ്യത കൂടുതലുള്ള സ്‌കൂളില്‍ രാവിലെ 10-നും ഉച്ചക്ക് 12 മണിക്കും ഇടയില്‍ രക്ഷിതാവിനൊപ്പം എത്തണം. യോഗ്യത സര്‍ട്ടിഫിക്കറ്റ്, ടിസി, സ്വഭാവ സര്‍ട്ടിഫിക്കറ്റ് തുടങ്ങിയവയും ബോണസ് പോയിൻ്റിന് ആധാരമാകുന്ന മറ്റ് രേഖകളും കരുതണം.
