മണത്തണ: ആയുർവേദ മർമ്മ ചികിൽസ വിദഗ്ദനും രാഷ്ട്രീയ സാമൂഹ്യ മേഖലകളിൽ ശ്രദ്ധേയനുമായ മണത്തണയിലെ വി.കെ. രാഘവൻ വൈദ്യരെ ശിഷ്യൻമാർ ആദരിച്ചു.

മലയോരത്ത് ആദ്യമായി 1972-ൽ കളരി ,ജിംനാസ്റ്റിക്ക് പരിശീലന കേന്ദ്രം മണത്തണയിൽ സ്ഥാപിച്ചത് രാഘവൻ വൈദ്യരാണ്.നൂറുകണക്കിന് യുവാക്കൾക്ക് കായിക-ആയോധന കലാ പരിശീലനം നല്കി. ഇതിന് വഴിയൊരുക്കിയ അദ്ദേഹത്തിന്റെ മണത്തണ ഫിസിക്കൽ ആൻഡ് കൾച്ചറൽ ഇൻസ്റ്റിറ്റ്യൂട്ടിലെ ആദ്യ കാല ശിഷ്യന്മാർ മണത്തണയിൽ വൈദ്യരുടെ വസതിയിൽ ഒത്തുചേരുകയായിരുന്നു.

ആയൂർവേദ മർമ്മ ചികിത്സകൻ , സി.പി.ഐ ജന സേവാദൾ സംസ്ഥാന ക്യാപ്റ്റൻ ,പേരാവൂർഗ്രാമപ്പഞ്ചായത്ത് വൈസ് പ്രസിഡൻ്റ് , മണത്തണ ഹയർ സെക്കൻഡറി സ്കൂൾ പി.ടി.എ പ്രസിഡൻ്റ് എന്നീ നിലകളിൽ പ്രവർത്തിച്ച വി.കെ രാഘവൻ വൈദ്യർ ഏറെ ജനകീയനുമാണ്.

1970 കളിലും 1980 കളിലും ജില്ലാ, സംസ്ഥാന തല ഗുസ്തി മത്സരങ്ങളിൽ ജേതാക്കളായ ഒട്ടേറെ താരങ്ങളെ വാർത്തെടുത്തു.സ്നേഹാദരവ് പരിപാടിയിൽ വി. പദ്മനാഭൻ അധ്യക്ഷനായി. നടുവത്താനി ചെറിയാൻ, വി.കെ. പ്രഭാകരൻ എന്നിവർ ഉപഹാരം കൈമാറി.നാരായണൻ കുഞ്ഞിക്കണ്ണോത്ത് , നാമത്ത് ശ്രീധരൻ , കോക്കാട്ട് ജോസഫ് , കെ. രാമകൃഷ്ണൻ , കെ. സതീശൻ , കുരുവൻപ്ലാക്കൽ സെബാസ്റ്റ്യൻ , സി. ജെ.മാത്യു ,പി. പി.മാധവൻ, എം. ഭാസ്കരൻ തുടങ്ങിയവർ സംസാരിച്ചു.

മുരിങ്ങോടി: മുസ്ലിം ജമാഅത്ത്,എസ്. വൈ. എസ്, എസ്‌.എസ്‌.എഫ്‌, സ്വാന്തനം മുരിങ്ങോടി എന്നിവ അലിഫ്‌ ക്യാമ്പസിൽ വെച്ച്‌ നിർധരരായ കുടുംബങ്ങൾക്ക് റമദാൻ കിറ്റുകൾ നല്കി. എസ്. വൈ. എസ്. ഇരിട്ടി സോൺ മുൻ പ്രസിഡന്റ് അബ്ദുൽ സലീം അമാനി ഉദ്ഘാടനം ചെയ്തു. കേരള മുസ്ലിം ജമാഅത്ത്‌ യൂണിറ്റ്‌ പ്രസിഡന്റ് യു.കെ ഇബ്രാഹിം ഹാജി അധ്യക്ഷനായി. എസ്. വൈ. എസ്. മുരിങ്ങോടി യൂണിറ്റ്‌ സെക്രട്ടറി ജാബിർ ഹാജി ‌, എസ്. വൈ. എസ് മുരിങ്ങോടി യൂണിറ്റ്‌ ഭാരവാഹികളായ സക്കരിയ, സാദിഖ്‌, മുനീർ എന്നിവർ പങ്കെടുത്തു. മുരിങ്ങോടി യൂണിറ്റ്‌ പരിധിയിലെ നിർധരരായ 100-ഓളം കുടുംബങ്ങൾക്കാണ്‌ റമദാൻ കിറ്റുകൾ നൽകിയത്.

പേരാവൂർ: മഹല്ലിലെ നിർധന കുടുംബങ്ങൾക്ക് മഹല്ല് കമ്മറ്റിയുടെ നേതൃത്വത്തിൽ റമദാൻ കിറ്റ് വിതരണം നടന്നു. മഹല്ല് ഖത്തീബ് മൂസ മൗലവിയിൽ നിന്ന് മഹല്ല് ഭാരവാഹികൾ കിറ്റുകൾ ഏറ്റുവാങ്ങി വിതരണം ചെയ്തു. മഹല്ല് പ്രസിഡൻറ് യു.വി.റഹീം അധ്യക്ഷനായി. സെക്രട്ടറി കെ.പി.അബ്ദുൾ റഷീദ്, ഖജാഞ്ചി നാസർ വട്ടൻ പുരയിൽ, വി.കെ.സാദിഖ്, അരിപ്പയിൽ മജീദ്, എ.എം. ലത്തീഫ്, ഉമ്മർ പൊയിൽ, ഹംസ കീഴ്പ്പട, ബഷീർ കായക്കൂൽ, എൻ.ആർ മുഹമ്മദ് തുടങ്ങിയവർ സംസാരിച്ചു. മഹല്ലിലെ വിവിധയാളുകളിൽ നിന്ന് മഹല്ല് കമ്മറ്റി സമാഹരിച്ച റമദാൻ കിറ്റുകളാണ് നിർധനർക്ക് കൈമാറിയത്.