കണ്ണൂർ: ആത്മീയ ചൂഷണത്തിന്റെയും അന്ധവിശ്വാസത്തിന്റെയും മറവിൽ കോടികളുടെ തട്ടിപ്പ് നടത്തിയതായ പരാതിയിൽ ടൗൺ പോലീസ് കേസെടുത്തു. ഹിമാലയൻ തേർഡ് ഐ ട്രസ്റ്റിന്റെ പേരിൽ നടത്തുന്ന ക്ലാസുകളിൽ പങ്കെടുത്താൽ വ്യക്തികൾക്ക് ആത്മീയതയിലൂടെ സാമ്പത്തികമായ നേട്ടമുണ്ടാവുമെന്നും മറ്റും പറഞ്ഞ് നവമാധ്യമങ്ങൾ വഴി പ്രചരണം നടത്തി തട്ടിപ്പ് നടത്തിയെന്ന പരാതിയിൽ ഡോ. അഷ്റഫ്, കെ.എസ് പണിക്കർ,അനിരുദ്ധൻ, വിനോദ്കുമാർ, സനൽ, ഡോ. അഭിന്ദ് കാഞ്ഞങ്ങാട്ട് എന്നിവർക്കെതിരെയാണ് മമ്പറത്തെ പ്രശാന്ത് മാറോളിയുടെ പരാതിയിൽ പോലീസ് കേസെടുത്തത്.

കേരളത്തിലുടനീളമായി സംഘടിപ്പിച്ച ക്ലാസുകൾ വഴിയും വിവിധ സ്ഥലങ്ങളിൽ യാത്രകൾ സംഘടിപ്പിച്ചും പലരിൽ നിന്നുമായി 12കോടി 75 ലക്ഷത്തോളം രൂപ തട്ടിയെടുത്തതായാണ് പരാതിയിൽ പറയുന്നത്. ക്ലാസിൽ പങ്കെടുത്താൽ ഏതൊരു കാര്യമാണോ ഉദ്ദേശിക്കുന്നത് അതിൽ ഉന്നതിയിലെത്തുമെന്നും കുട്ടികൾക്കാണെങ്കിൽ വിദ്യാഭ്യാസ കാര്യത്തിൽ അധികം പ്രയത്നിക്കാതെ മുന്നിലെത്താമെന്നുമുള്ള അന്ധവിശ്വാസ പ്രചരണത്തിലാണ്പലരും കുടുങ്ങിയത്. കണ്ണൂരിലും ഈയടുത്ത മാസങ്ങളിൽ പ്രശസ്ത ഹോട്ടലുകളിൽ ഇത്തരം ക്ലാസുകൾ നടത്തിയിരുന്നു.

ധർമശാല:യുവതലമുറയുടെ ആത്മമിത്രങ്ങളാകാൻ പുതിയകാലത്ത്‌ യന്ത്രമനുഷ്യരാണ്‌ വേണ്ടതെന്ന കാഴ്‌ചപ്പാട്‌ തുറന്നുകാട്ടുകയാണ്‌ കണ്ണൂർ ഗവ. എൻജിനിയറിങ്‌ കോളേജിൽ നടക്കുന്ന അഖിലേന്ത്യ ടെക്‌ഫെസ്റ്റ് എക്സ്പ്ലോർ 24. ദേശീയതലത്തിൽ നടന്ന റോബോഫെസ്റ്റിൽ രാജ്യത്തിലെ വിവിധ ഐഐടികളെ പിന്തള്ളി ഒന്നാംസ്ഥാനം നേടിയ കണ്ണൂർ ഗവ. എൻജിനിയറിങ്‌ കോളേജിലെ വിദ്യാർഥികൾ ഒരുക്കിയ ആക്സിസ് പ്രൊ റോബോട്ടിന്റെ പ്രകടനം എല്ലാവരെയും അതിശയപ്പെടുത്തി. രണ്ട് ചക്രമുള്ള റോബോട്ട് നിശ്ചിതസ്ഥലത്ത്‌ നിശ്‌ചിത രേഖയിലൂടെ ഒരുലിറ്റർ വെള്ളവുമെടുത്ത്‌ തുളുമ്പിമറിയാതെ സഞ്ചരിച്ച്‌ ലക്ഷ്യം പൂർത്തിയാക്കി. റോബോട്ടിന്റെ സഞ്ചാരവും പ്രവൃത്തിയും കാണാനെത്തിയ വിദ്യാർഥികളെ ആശ്ചര്യപ്പെടുത്തുകയും ചിന്തിപ്പിക്കുകയും ചെയ്‌തു. കോളേജിലെ അവസാന വർഷ ബിരുദ വിദ്യാർഥികളായ ഹേമന്ത് കൃഷ്‌ണൻ, സി വി സായുജ്, ജെ വേദശ്രീ, കെ അശ്വിൻ എന്നിവരടങ്ങുന്ന സംഘമാണ് രണ്ട്ചക്രം മാത്രമുള്ള റോബോട്ടിനെ നിർമിച്ചത്. കർഷകരെ സഹായിക്കാൻ തൃക്കരിപ്പൂർ പോളിടെക്‌നിക്‌ വിദ്യാർഥികൾ തയ്യാറാക്കിയ സ്‌മാർട്ട്‌ ഫീഡ്‌ ശ്രദ്ധേയമാണ്‌. കൃഷിയിടത്തിന്റെ പ്രത്യേകത, ഭൂമിയിലെ വെള്ളത്തിന്റെ അളവ്‌, മണ്ണിന്റെ രാസ- ഭൗതിക -ജൈവ സ്വഭാവം നിർണയിക്കുന്നതിനും കാർഷിക ആവശ്യങ്ങൾക്കുള്ള ഭൂമിയിൽ വിളപരിപാലനത്തിനുതകുന്ന വിവരങ്ങൾ സ്‌മാർട്ട്‌ ഫീഡ്‌ പ്രൊജക്ടിൽ വിശദീകരിക്കുന്നുണ്ട്‌. വിദ്യാർഥികൾ വരച്ച നൂറുകണക്കിന്‌ ചിത്രങ്ങളുടെ ആർട്ട്‌ ഗ്യാലറിയും എക്‌സ്‌പ്ലോറിലുണ്ട്‌. പോസ്‌റ്റർ കളറിൽവച്ച ചിത്രങ്ങൾമുതൽ മ്യൂറൽ പെയിന്റിങ്ങുകൾവരെ ഒരുക്കിയിട്ടുണ്ട്‌. പ്രദർശനത്തിനൊപ്പം നിയോൺ ഫുട്‌ബോൾ കളിക്കാനും അവസരമുണ്ട്‌. ഓരോമണിക്കൂർ ഇടവിട്ട്‌ ഡ്രോൺ ഷോയും നടക്കുന്നുണ്ട്‌. വെള്ളി രാത്രി സൺ ബേൺ കാമ്പസ് ലൈവ് ഡിജെ ഷോ അരങ്ങേറി. ശനിയാഴ്‌ച റെട്രോ ഡാൻസ്‌, കളരിപ്പയറ്റ്‌, വിവിധ മത്സരങ്ങൾ എന്നിവ നടക്കും. പകൽ മൂന്നിന്‌ സമാപനസമ്മേളനം ജില്ലാ പഞ്ചായത്ത് പ്രസിഡന്റ്‌ അഡ്വ. കെ കെ രത്നകുമാരി ഉദ്‌ഘാടനംചെയ്യും. രാത്രി വിവിധ പരിപാടികളോടെ എക്സ്പ്ലോർ സമാപിക്കും.

പയ്യന്നൂർ:കെ.എസ്.ആർ.ടി.സി പയ്യന്നൂർ യൂണിറ്റ് ബജറ്റ് ടൂറിസം സെല്ലിന്റെ നേതൃത്വത്തിൽ ഫെബ്രുവരി 14 ന് ഗവിയിലേക്ക് വിനോദയാത്ര സംഘടിപ്പിക്കുന്നു. 14 ന് വൈകുന്നേരം നാല് മണിയോടെ പയ്യന്നൂരിൽ നിന്നും പുറപ്പെട്ട് ഫെബ്രുവരി 17 ന് രാവിലെ ആറിന് തിരിച്ചെത്തുന്ന വിധത്തിലാണ് യാത്ര ക്രമീകരിച്ചിരിക്കുന്നത്. ഗവി, അടവി കുട്ടവഞ്ചി യാത്ര, കുമളി, കമ്പം മുന്തിരിപ്പാടം, തേക്കടി, സപൈസസ് ഗാർഡൻ, രാമക്കൽ മേട് എന്നീ സ്ഥലങ്ങളാണ് യാത്രയിൽ ഉൾപ്പെടുത്തിയിരിക്കുന്നത്. ഫോൺ : 8075823384, 9745534123.