ആസ്‌പത്രികളിൽ ജോലിക്കു ഹാജരാകാത്ത 1194 ഡോക്ടർമാർ ഉൾപ്പെടെ രണ്ടായിരത്തോളം ജീവനക്കാരെ പിരിച്ചുവിടാനുള്ള നടപടികൾ ആരംഭിച്ചു. ആരോഗ്യ ഡയറക്ടറേറ്റിന്റെ നിയന്ത്രണത്തിലുള്ള പ്രാഥമികാരോഗ്യ കേന്ദ്രം മുതൽ ജില്ല, ജനറൽ ആസ്‌പത്രികൾ വരെയുള്ള സ്ഥാപനങ്ങളിലെ 859 ഡോക്ടർമാരാണു പിരിച്ചുവിടൽ പട്ടികയിലുള്ളത്. ഈ ആസ്‌പത്രികളിലെ 252 നഴ്സുമാരെയും പിരിച്ചുവിടും. കൂടാതെ ലാബ് ടെക്നീഷ്യന്മാരും ഹെൽത്ത് ഇൻസ്പെക്ടർമാരും റേഡിയോഗ്രഫർമാരും ഉൾപ്പെടെ മുന്നൂറിലേറെ ജീവനക്കാരും പുറത്താക്കൽ പട്ടികയിൽ ഇടംപിടിച്ചിട്ടുണ്ട്. മെഡിക്കൽ കോളജുകളിൽ നിയമനം നടത്തുന്ന മെഡിക്കൽ വിദ്യാഭ്യാസ ഡയറക്ടറേറ്റിലെ 335 ഡോക്ടർമാർക്കെതിരെയാണ് നടപടി. ഇതിൽ 251 പേർക്ക് നോട്ടിസ് നൽകി. ഡിഎച്ച്എസിന് കീഴിൽ ആകെ 6000 ഡോക്ടർമാരും ഡിഎംഇയിൽ ആകെ 2500 ഡോക്ടർമാരാണുള്ളത്. ഡി.എച്ച്എസി‍ലെ ഡോക്ടർമാരിൽ 412 പേർ പ്രബേഷൻ പൂർത്തിയാക്കാതെയാണു മുങ്ങിയത്. പിരിച്ചുവിടുന്നതിനു മുന്നോടിയായി നോട്ടിസ് നൽകിത്തുടങ്ങി. പലരും കൈപ്പറ്റുന്നില്ല. അതിനാൽ വീടിനു മുന്നിൽ പതിക്കും. നോട്ടിസ് ലഭിച്ച 72 പേർ തിരികെ ജോലിയിൽ പ്രവേശിക്കാൻ സന്നദ്ധത അറിയിച്ചിട്ടുണ്ട്.

പെരുമ്പാവൂര്‍: അല്ലപ്ര വാഴപ്പിള്ളിമാലില്‍ വി.കെ. അജി (51) അന്തരിച്ചു. മാതൃഭൂമി മുന്‍ സീനിയര്‍ ഫോട്ടോഗ്രാഫറാണ്. അമ്മ: കാര്‍ത്തു. അച്ഛന്‍: പരേതനായ കണ്ണന്‍. ഭാര്യ: ഒ.എം. മഞ്ജു. മക്കള്‍: നൃപന്‍ കണ്ണന്‍ (ഡിഗ്രി വിദ്യാര്‍ത്ഥി, ഇരിങ്ങാലക്കുട ക്രൈസ്റ്റ് കോളേജ്), ഇതള്‍ മൊഴി (എട്ടാം ക്ലാസ് വിദ്യാര്‍ത്ഥിനി, ബത്‌ലഹേം ദയറ എച്ച്.എസ്.എസ്., ഞാറള്ളൂര്‍). സംസ്കാരം ബുധനാഴ്ച വൈകിട്ട് പെരുമ്പാവൂർ ശാന്തിവനം ശ്മശാനത്തിൽ.

മലപ്പുറം: മലപ്പുറത്ത് കാട്ടാന ആക്രമണത്തില്‍ ആദിവാസി യുവതി കൊല്ലപ്പെട്ടു. എടക്കരയിലാണ് വീട്ടമ്മ ആനയുടെ ആക്രമണത്തില്‍ മരിച്ചത്.11മണിയോടെയാണ് സംഭവം. മുത്തേടത്ത് ഉച്ചക്കുളം നഗറിലെ നീലിയാണ് അക്രമത്തില്‍ കൊല്ലപ്പെട്ടത്. പ്രദേശത്ത് തന്നെ ദിവസങ്ങള്‍ക്ക് മുമ്പ് ആനയുടെ ആക്രമണത്തില്‍ ഒരാള്‍ മരിച്ചിരുന്നു. തുടര്‍ന്നാണ് വീണ്ടും കാട്ടാന ആക്രമണത്തില്‍ ഒരു ജീവന്‍ കൂടി നഷ്ടമായത്. നിലമ്പൂര്‍ കരുളായിലായിരുന്നു കഴിഞ്ഞ ദിവസം മണി എന്ന ആദിവാസി യുവാവ് ആന ആക്രമണത്തില്‍ മരിച്ചത്.

മലയോര മേഖലയില്‍ വന്യജീവി അക്രമണം വലിയ ചര്‍ച്ചയായിരിക്കെയാണ് വീണ്ടും മരണം തുടര്‍ക്കഥയാകുന്നത്. വനവിഭവങ്ങള്‍ ശേഖരിക്കാന്‍ സ്ഥിരം പോകുന്ന വ്യക്തിയാണ് നീലി. എന്നാല്‍ ഉള്‍ക്കാട്ടിലേക്ക് അധികം പോകാതെ തന്നെ ആന ആക്രമിക്കുകയായിരുന്നു.വിറക് ശേഖരിക്കാന്‍ പോയ വഴിയാണ് ആനയുടെ ആക്രമണം. ഗുരുതരമായി പരിക്കേറ്റ ഇവരെ നിലമ്പൂര്‍ ജില്ലാ ആസ്‌പത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. കാട്ടില്‍ നിന്നും ചുമന്ന് പുറത്തെത്തിച്ച് തുടര്‍ന്ന് വാഹനത്തില്‍ ആസ്‌പത്രിയിലേക്ക് കൊണ്ടുപോവുകയായിരുന്നു.