പേരാവൂർ : ജില്ലാ ചെസ് ഓർഗനൈസിങ് കമ്മിറ്റി സംഘടിപ്പിക്കുന്ന ജില്ലാ അണ്ടർ ഒൻപത്, ഓപ്പൺ ആൻഡ് ഗേൾസ് സെലക്ഷൻ ചെസ് ചാമ്പ്യൻഷിപ് ശനിയാഴ്ച രാവിലെ 9.30 മുതൽ കണ്ണൂർ സെയ്ന്റ് മൈക്കിൽസ് സ്കൂളിൽ നടക്കും. മത്സരാർത്ഥികൾ ജനന സർട്ടിഫിക്കറ്റ് കോപ്പി അല്ലെങ്കിൽ ആധാർ കാർഡ് കോപ്പി, രണ്ട് സ്റ്റാമ്പ് സൈസ് ഫോട്ടോ എന്നിവ ഹാജരാക്കണം. ഇരു വിഭാഗങ്ങളിലായി ആദ്യ രണ്ട് സ്ഥാനം നേടുന്നവർ സംസ്ഥാന ചാമ്പ്യൻഷിപ്പിലേക്ക് യോഗ്യത നേടും.ഫോൺ : 9846879986, 9605001010, 9377885570.

പേരാവൂർ : കുനിത്തല സ്വാശ്രയസംഘത്തിന്റെ ആഭിമുഖ്യത്തിൽ നാമത്ത് ബാലൻ, പി.കെ.രാജു, നന്ത്യത്ത് അശോകൻ എന്നിവരുടെ സ്മ‌രണാർത്ഥമുള്ള നാലാമത് പേരാവൂർ വോളി ഫെസ്റ്റ് ഏപ്രിൽ 5,6,(ശനി, ഞായർ) ദിവസങ്ങളിൽ കുനിത്തല വോളിബോൾ ഗ്രൗണ്ടിൽ നടക്കും. കായികമാണ് ലഹരി എന്ന സന്ദേശമുയർത്തി യുവ തലമുറയുടെ കായികവാസനയെ വളർത്തുക എന്ന ലക്ഷ്യത്തോടെയും വോളിബോളിലേക്ക് യുവതലമുറയെ ആകർഷിക്കുക എന്ന ഉദ്ദേശത്തോടെയുമാണ് മത്സരം സംഘടിപ്പിക്കുന്നത്. ഏപ്രിൽ അഞ്ചിന് (ശനി) പ്രദേശത്തെ മുൻകാല വോളിബോൾ കളിക്കാരെ ആദരിക്കുന്നു. തുടർന്ന് മാസ്റ്റേഴ്‌സ് വോളിബോൾ (40 വയസ്സിന് മുകളിലുള്ളവരുടെ മത്സരം).

വിജയികൾക്ക് നന്ത്യത്ത് അശോകൻ സ്‌മാരക ട്രോഫിയും മന്ദൻ മൂപ്പൻ മകൻ വാസുവിൻ്റെ സ്‌മരണയ്ക്കായിട്ടുള്ള 3000 രൂപയും ലഭിക്കും. രണ്ടാം സ്ഥാനത്ത് എത്തുന്ന ടീമിന് കോഴിപ്പുറത്ത് കുഞ്ഞിംമാത സ്‌മാരക എവറോളിംഗ് ട്രോഫിയും ആവണി മധുസുദനൻ്റെ സ്‌മരണയ്ക്കായി നൽകുന്ന 2000 രൂപയുടെ ക്യാഷ് പ്രൈസും ലഭിക്കും. ഏപ്രിൽ ആറിന് വോളിബോൾ മത്സരം. വിജയികൾക്ക് നാമത്ത് ബാലൻ സ്‌മാരക എവറോളിംഗ് ട്രോഫിയും ഈക്കിലിശ്ശേരി കണ്ണൻ, കല്ലു എന്നിവരുടെ സ്മരണയ്ക്കായി നൽകുന്ന 10,000 രൂപയും ലഭിക്കും. രണ്ടാം സ്ഥാനത്ത് എത്തുന്ന ടീമിന് പി.കെ. രാജു സ്‌മാരക എവറോളിംഗ് ട്രോഫിയും കോഴിപ്പുറത്ത് കുഞ്ഞിംമാതയുടെ സ്മരണയ്ക്കായി കുടുംബാംഗങ്ങൾ നൽകുന്ന 5000 രൂപ ക്യാഷ് പ്രൈസും.

പേരാവൂർ : മുരിങ്ങോടിയില്‍ പഞ്ചായത്ത് അനുമതിയില്ലാതെ മാര്‍ബിള്‍ സൂക്ഷിക്കുകയും അനധികൃതമായി കെട്ടിടം നിര്‍മ്മിക്കുകയും ചെയ്ത നാദാപുരം സ്വദേശി മാന്തോട്ടത്തിൽ അസീസ് ഖാന് കെട്ടിടം പൊളിച്ച് മാറ്റാനും മാര്‍ബിളുകള്‍ നീക്കം ചെയ്യാനും പേരാവൂര്‍ പഞ്ചായത്ത് സെക്രട്ടറി ബാബു തോമസ് നോട്ടീസ് നല്‍കി. ഇയാള്‍ക്ക് മറ്റൊരു സ്ഥലത്ത് മാര്‍ബിള്‍, ടൈല്‍സ്, ഗ്രാനൈറ്റ് മുതലായവ വില്‍പന നടത്തുന്നതിനുള്ള ഓഫീസിനായി പഞ്ചായത്ത് ലൈസന്‍സ് നല്‍കിയിരുന്നു. ഈ ലൈസൻസിന്റെ മറവിൽ റവന്യു രേഖയില്‍ നഞ്ച വിഭാഗത്തില്‍പ്പെട്ട സ്ഥലത്ത് മാര്‍ബിള്‍ സൂക്ഷിക്കുകയും അനധികൃതമായി കെട്ടിടം നിർമ്മിക്കുകയും ചെയ്തതിനാണ് നടപടി.