കണ്ണൂർ:കേരളത്തിലെ ഏക മുസ്ലിംരാജവംശമായ അറക്കലിന്റെയും പൗരാണിക തുറമുഖപട്ടണമായ സിറ്റിയുടെയും അവിസ്മരണീയ ചരിത്രത്തിന്റെ ഭാഗമാണ് അറക്കൽകെട്ടിലെ മണി. ആലിരാജയും അറക്കൽ ബീവിയും അറക്കൽകെട്ടുമെല്ലാം ജ്വലിക്കുന്ന ഓർമകളാകുമ്പോൾ അറയ്ക്കൽ മ്യൂസിയത്തിലും സിറ്റിയിലുമെത്തുന്ന പുതുതലമുറയ്‌ക്ക്‌ അറക്കൽ കെട്ടിലെ മണി ചരിത്രത്തിലേക്കുള്ള മടക്കയാത്രയാണ്‌. മണിമുഴക്കം നിലച്ചെങ്കിലും സഞ്ചാരികളും ചരിത്രവിദ്യാർഥികളും മണി കാണാനും ഫോട്ടോ പകർത്താനും ഇന്നും ഇവിടെയെത്താറുണ്ട്.
കണ്ണൂർ സിറ്റി അറക്കൽകെട്ടിലെ മണിഗോപുരത്തിൽ 1,600 കാലയളവിലാണ് ഈ മണി സ്ഥാപിച്ചതെന്ന് ചരിത്രരേഖകൾ സാക്ഷ്യപ്പെടുത്തുന്നു. വിദേശികളുടെ ആക്രമണസാധ്യത മുന്നറിയിപ്പ്, അപായ സൂചന, കടലാക്രണം, പ്രദേശത്തെ പ്രധാന വിവരങ്ങൾ, നിസ്‌കാര സമയം, മരണ അറിയിപ്പ്‌ എന്നിവയെക്കുറിച്ച്‌ ജനങ്ങൾക്ക് വിവരം നൽകാനായിരുന്നു ഇത്‌. ക്ലോക്ക്, ലൗഡ് സ്പീക്കർ എന്നിവ ഇല്ലാതിരുന്ന കാലത്ത് സിറ്റിയുടെ സ്പന്ദനം നിയന്ത്രിച്ചിരുന്നത് നിസ്‌കാര സമയം അറിയിച്ചുള്ള അറക്കൽ കെട്ടിലെ മണിമുഴക്കമായിരുന്നു. മണി അടിച്ച് കഴിഞ്ഞാൽ ജോലി നിർത്തിയും കടകളടച്ചും പ്രദേശവാസികളാകെ പള്ളിയിലേക്കെത്തും.
അറക്കൽ രാജവംശത്തിലെ ആരെങ്കിലും മരിച്ചാലും മണിമുഴക്കാറുണ്ടായിരുന്നു. പതിറ്റാണ്ടുകൾ കഴിഞ്ഞിട്ടും ഈ സമ്പ്രദായം മുടക്കമില്ലാതെ ഏതാനും നാളുകൾക്ക് മുമ്പുവരെ തുടർന്നിരുന്നു. രണ്ട് വർഷംമുമ്പുവരെ നിസ്കാര സമയം ഓർമപ്പെടുത്തിയും അഞ്ച് നേരം മണിമുഴക്കി. സിറ്റിയിലെ വ്യാപാരി പി റാഷിദാണ് നേരത്തെ മണി മുഴക്കികൊണ്ടിരുന്നത്.

കണ്ണൂർ: കേരള പോലീസ് വകുപ്പിൽ പോലീസ് കോൺസ്റ്റബിൾ ഡ്രൈവർ/വനിതാ പോലീസ് കോൺസ്റ്റബിൾ ഡ്രൈവർ (കാറ്റഗറി നമ്പർ 416/2023), പോലീസ് കോൺസ്റ്റബിൾ ഡ്രൈവർ (എക്സ് സർവീസ്മെൻ മാത്രം-കാറ്റഗറി നമ്പർ 583/2023) എക്സൈസ് വകുപ്പിൽ സിവിൽ എക്സൈസ് ഓഫീസർ (ട്രെയിനി-പുരുഷൻ, വയനാട്, കാസർകോട്, കണ്ണൂർ ജില്ലകൾ-കാറ്റഗറി നമ്പർ 307/2023) എന്നീ തസ്തികകളുടെ ചുരുക്കപ്പട്ടികയിൽ ഉൾപ്പെട്ട കണ്ണൂർ ജില്ലയിലേക്ക് അലോട്ട് ചെയ്ത പുരുഷ ഉദ്യോഗാർഥികൾക്കായുള്ള കായിക ക്ഷമതാ പരീക്ഷ ഡിസംബർ മൂന്ന് മുതൽ 10 വരെ (ശനി,ഞായർ ദിനങ്ങൾ ഒഴികെ) ആറ് ദിവസങ്ങളിലായി മാങ്ങാട്ടുപറമ്പ് സർദാർ വല്ലഭായി പട്ടേൽ സ്പോർട്സ് കോപ്ലക്സ് ഗ്രൗണ്ടിൽ രാവിലെ 5.30 മുതൽ നടക്കും.ഇതു സംബന്ധിച്ച് ഉദ്യോഗാർഥികൾക്ക് എസ്.എം.എസ് പ്രൊഫൈൽ മെസേജ് എന്നിവ മുഖേന അറിയിപ്പ് നൽകിയിട്ടുണ്ട്. ഉദ്യോഗാർഥികൾ പ്രൊഫൈലിൽ നിന്നും ഡൗൺലോഡ് ചെയ്തെടുത്ത അഡ്മിഷൻ ടിക്കറ്റിലെ നിർദ്ദേശ പ്രകാരം കായിക ക്ഷമതാ പരീക്ഷയ്ക്ക് ഹാജരാകണം. ഫോൺ: 0497 2700482.

പറശ്ശിനിക്കടവ്: തീർഥാടന കേന്ദ്രങ്ങളെ ഉൾപ്പെടുത്തി നടപ്പാക്കുന്ന പിൽഗ്രിം ടൂറിസം പദ്ധതിയുടെ പ്രധാന കേന്ദ്രമായ പറശ്ശിനിക്കടവിലെ ഫ്ലോട്ടിങ് റസ്റ്ററൻ്റ് തുറക്കാനുള്ള നടപടികൾക്ക് വേഗം കൂടി. സംരംഭകരെ ക്ഷണിച്ച് കൊണ്ടുള്ള ടെൻഡർ തുടങ്ങി. സഞ്ചാരികൾക്ക് വിശ്രമിക്കുന്നതിനും രുചികരമായ വിഭവങ്ങൾ ആസ്വദിക്കുന്നതിനുള്ള ഫ്ലോട്ടിങ് റസ്റ്ററന്റ്‌ ആണ് പറശ്ശിനിക്കടവ് ബോട്ട് ജെട്ടിയോട് ചേർന്ന് വരുന്നത്.ടെൻഡർ നടപടികളുമായി തളിപ്പറമ്പ് ടൂറിസം ഡെസ്റ്റിനേഷൻ മാനേജ്‌മെന്റ് കൗൺസിലാണ് മുന്നോട്ടുപോകുന്നത്. ആറുകോടി ചെലവഴിച്ചാണ് പറശ്ശിനി പാലത്തിന് താഴെ ഫ്ലോട്ടിങ് റസ്റ്ററന്റ് സജ്ജമാക്കിയത്. പ്രകൃതിസൗന്ദര്യം ആസ്വദിച്ച് ഒഴിവ് സമയം ചെലവഴിക്കുന്നതിനും രുചികരമായ ഭക്ഷ്യവിഭവങ്ങൾ ലഭ്യമാക്കുന്നതിന് അവസരം ഒരുക്കുകയും ചെയ്യുന്ന ഫ്ലോട്ടിങ് റസ്റ്ററന്റ് സഞ്ചാരികൾക്ക് നവ്യാനുഭവം ഒരുക്കുമെന്നാണ് പ്രതീക്ഷ.40 പേർക്ക് ഒരേസമയം ഭക്ഷണം കഴിക്കാവുന്ന സൗകര്യം ഇവിടെ ഒരുക്കിയിട്ടുണ്ട്. പ്രാദേശിക വിഭവങ്ങളും വിദേശ രുചികളും അടുത്തറിയാനും അവസരം ഉണ്ടാകും.