ലോക ഭിന്നശേഷി ദിനാഘോഷം ഉണർവ് -2024ന്റെ ഭാഗമായി കണ്ണൂർ ജില്ലയിലെ ബഡ്സ് സ്‌കൂൾ/ബി.ആർ.സി/സ്പെഷ്യൽ സ്‌കൂൾ, മറ്റ് ഭിന്നശേഷി വിഭാഗക്കാർ എന്നിവരെ പങ്കെടുപ്പിച്ച് കായിക മത്സരങ്ങൾ നടത്തുന്നു. കണ്ണൂർ ഡി.എസ്‌.സി ഗ്രൗണ്ടിൽ ഡിസംബർ മൂന്നിന് രാവിലെ 8.30 മുതൽ സബ് ജൂനിയർ, ജൂനിയർ, സീനിയർ വിഭാഗങ്ങളിൽ മത്സരങ്ങൾ നടക്കും. നവംബർ 30 ന് വൈകീട്ട് അഞ്ച് വരെ രജിസ്ട്രേഷൻ നടത്താം. സ്പോട്ട് രജിസ്ട്രേഷൻ ഉണ്ടായിരിക്കില്ല. ആൺകുട്ടികൾക്കും പെൺകുട്ടികൾക്കും വെവ്വേറെ മത്സരം നടത്തും. ഒരു മത്സരാർഥിക്ക് രണ്ട് മത്സരയിനങ്ങളിൽ പങ്കെടുക്കാം. മത്സരയിനങ്ങളിൽ പേര് രജിസ്റ്റർ ചെയ്യുന്നതിന് സ്പെഷ്യൽ സ്‌കൂളുകൾ, മറ്റ് ഭിന്നശേഷി വിഭാഗക്കാർ എന്നിവർ കണ്ണൂർ സിവിൽസ്റ്റേഷൻ എഫ് ബ്ലോക്കിലെ ജില്ലാ സാമൂഹ്യ നീതി ഓഫീസുമായി നേരിട്ടോ, dsjokannur@gmail.com ഇ-മെയിൽ വിലാസത്തിലോ ബന്ധപ്പെടണം. പേര്, പങ്കെടുക്കുന്ന മത്സരയിനം, ഫോൺ നമ്പർ എന്നിവ സഹിതം വിശദ വിവരങ്ങൾ സമർപ്പിക്കണം. ഫോൺ: 8281999015.

കണ്ണൂർ : 2025 ജനുവരിയിൽ പ്രസിദ്ധീകരിക്കുന്ന അന്തിമ വോട്ടർ പട്ടികയിൽ പേര് ചേർക്കുന്നതിനും തിരുത്തുന്നതിനും ഇപ്പോൾ അപേക്ഷിക്കാം.അപേക്ഷിക്കുന്നതിനായി ഫോട്ടോ, പ്രായം തെളിയിക്കുന്ന രേഖ, വിലാസം തെളിയിക്കുന്ന രേഖ, പേര് തെളിയിക്കുന്ന രേഖ എന്നിവയും,വീട്ടിലെ ഒരു അംഗത്തിന്റെ വോട്ടർ ഐഡി നമ്പറും ആവശ്യമാണ്.കൂടാതെ ഉപയോഗത്തിലുള്ള ഒരു ഫോൺ നമ്പറും ആവശ്യമാണ്. കൂടുതൽ വിവരങ്ങൾക്ക് അക്ഷയ കേന്ദ്രങ്ങളുമായി ബന്ധപ്പെടുക.

തളിപ്പറമ്പ്‌:പ്രളയക്കെടുതിയിലകപ്പെട്ട ദുരിതബാധിതർക്ക്‌ കൈത്താങ്ങായി സഹകരണ വകുപ്പിന്റെ കെയർഹോം പദ്ധതി പ്രകാരം നിർമിച്ച രണ്ടാംഘട്ട ഭവന സമുച്ചയം നാടിന്‌ സമർപ്പിച്ചു. കുറുമാത്തൂരിലെ കൂനത്ത്‌ മൂന്ന്‌ ബ്ലോക്കുകളിലായി നിർമിച്ച 18 കുടുംബങ്ങൾക്ക്‌ താമസിക്കാനുള്ള വീടുകൾ മന്ത്രി വി. എൻ വാസവൻ ഉദ്‌ഘാടനം ചെയ്‌തു.എം .വി ഗോവിന്ദൻ എം.എൽ.എ ഓൺലൈനായി അധ്യക്ഷനായി. അങ്കണവാടി, റിക്രിയേഷൻ ക്ലബ് കെട്ടിടം ജില്ലാ പഞ്ചായത്ത്‌ പ്രസിഡന്റ്‌ കെ കെ രത്‌നകുമാരി ഉദ്‌ഘാടനം ചെയ്‌തു. സഹകരണസംഘം അഡീഷണൽ രജിസ്‌ട്രാർ കെ സജീവ് കർത്താ റിപ്പോർട്ട്‌ അവതരിപ്പിച്ചു. നിർമാണ പ്രവൃത്തി പൂർത്തിയാക്കിയവർക്ക്‌ തളിപ്പറമ്പ് ആർ.ഡി.ഒ ടി. വി രഞ്ജിത്ത് ഉപഹാരങ്ങൾ നൽകി. തളിപ്പറമ്പ് ബ്ലോക്ക് പഞ്ചായത്ത് പ്രസിഡന്റ് സി. എം കൃഷ്ണൻ, കുറുമാത്തൂർ പഞ്ചായത്ത് പ്രസിഡന്റ് വി എം സീന, ബ്ലോക്ക്‌ പഞ്ചായത്തം പി .പി ഷനോജ്‌, പി രാജീവൻ, പി. ലക്ഷ്‌മണൻ, പി. കെ പ്രേമലത, കെ രാജീവൻ എന്നിവർ സംസാരിച്ചു. സഹകരണ വകുപ്പ് സ്പെഷ്യൽ സെക്രട്ടറി വീണ എൻ മാധവൻ സ്വാഗതവും സഹകരണ ജോ. രജിസ്‌ട്രാർ വി രാമകൃഷ്‌ണൻ നന്ദിയും പറഞ്ഞു.
മൂന്നരക്കോടി രൂപ ചെലവിൽ രണ്ട്‌ ബെഡ്‌ റൂം, അടുക്കള ഉൾപ്പെടെ സൗകര്യങ്ങളുള്ള വീടുകളാണ്‌ ഊരാളുങ്കൽ ലേബർ കോൺട്രാക്ട് കോ ഓപ്പറേറ്റീവ് സൊസൈറ്റി നിർമിച്ചത്‌. 2018ലെ പ്രളയക്കെടുതിയിൽ ദുരിതബാധിതർക്ക് കൈത്താങ്ങായി സഹകരണ വകുപ്പ് 200 കുടുംബങ്ങൾക്ക് വീട് നിർമിച്ചുനൽകിയിരുന്നു. രണ്ടാംഘട്ടത്തിൽ വീട് നഷ്ടപ്പെട്ടവർക്കും സ്വന്തമായി വീട് നിർമിക്കാൻ സ്ഥലം ഇല്ലാത്തവർക്കുമാണ്‌ ഭവന സമുച്ചയം നിർമിച്ചത്‌.