കൂത്തുപറമ്പ്: ബെംഗളൂരുവിൽ ഐ.ടി. മേഖലയിൽ പ്രവർത്തിക്കുന്ന കൂത്തുപറമ്പ് സ്വദേശിനിയുടെ മരണത്തിൽ ദുരൂഹതയാരോപിച്ച് ബന്ധുക്കൾ രംഗത്ത്. മൂര്യാട് അടിയറപ്പാറയിലെ സ്നേഹാലയത്തിൽ എ.സ്നേഹ രാജൻ(35) കഴിഞ്ഞ ദിവസമാണ് ബെംഗളൂരുവിൽ മരിച്ചത്.സ്നേഹ മരിച്ച വിവരം തിങ്കളാഴ്ചയാണ് ഭർത്താവ് പത്തനംതിട്ട സ്വദേശിയായ ഹരി എസ്.പിള്ള സ്നേഹയുടെ വീട്ടുകാരെ വിളിച്ച് അറിയിക്കുന്നത്. പ്രത്യേകിച്ച് അസുഖങ്ങളൊന്നും സ്നേഹയ്ക്ക് ഉണ്ടായിരുന്നില്ലെന്ന് ബന്ധുക്കൾ പറയുന്നു. മരണത്തിൽ ദുരൂഹതയാരോപിച്ച് ബന്ധുക്കൾ നൽകിയ പരാതിയിൽ സർജാപുർ പോലീസ് കേസെടുത്തു.

വർഷങ്ങളായി ബെംഗളൂരൂവിലാണ് സ്നേഹ താമസിക്കുന്നത്. ഭർത്താവ് ഹരിയും ഐ.ടി. മേഖലയിലാണ് ജോലിചെയ്യുന്നത്. മകൻ ശിവാങ്ങും ഇവർക്കൊപ്പമുണ്ട്. തിങ്കളാഴ്ച പുലർച്ചെ അമിതമായ ഛർദീയെ തുടർന്ന് സ്നേഹയെ ആസ്പത്രിയിൽ പ്രവേശിപ്പിക്കുകയായിരുന്നെന്നും തുടർന്ന് മരണപ്പെട്ടെന്നും പറഞ്ഞ് ഹരി സ്നേഹയുടെ ബന്ധുക്കളെ ഫോണിൽ വിളിക്കുകയായിരുന്നു. എന്നാൽ, മരണത്തിൽ സംശയം തോന്നിയ ബന്ധുക്കൾ സർജാപുർ പോലീസിൽ പരാതി നൽകുകയായിരുന്നു.സ്നേഹയും ഹരിയും തമ്മിൽ ഇടയ്ക്കിടെ വാക്‌തർക്കമുണ്ടാവാറുണ്ടെന്ന് ബന്ധുക്കൾ പറയുന്നു. കുടുംബാംഗങ്ങൾ ഇടപെട്ട് ഒത്തുതീർപ്പാക്കിയ സംഭവങ്ങളും ഉണ്ടായിട്ടുണ്ട്. കഴിഞ്ഞ ദിവസം ഭർത്താവുമായുണ്ടായ വഴക്ക് സംബന്ധിച്ച് സ്നേഹ മരണത്തിന് തലേ ദിവസം ബന്ധുക്കളെ അറിയിച്ചിരുന്നെന്നും പറയുന്നു.

വിമുക്തഭടൻ രാജൻ ആലക്കാട്ടിന്റെയും സുലോചനയുടേയും മകളാണ് സ്നേഹ. മഡിവാള മെഡിക്കൽ കോളേജിൽ പോസ്റ്റ്മോർട്ടത്തിന് ശേഷം ബുധനാഴ്ച പുലർച്ചെ വീട്ടിൽ എത്തിച്ച സ്നേഹയുടെ മൃതദേഹം രാവിലെ വീട്ടുവളപ്പിൽ സംസ്കരിച്ചു.പോസ്റ്റ്മോർട്ടം റിപ്പോർട്ട് ലഭിച്ചതിനുശേഷം തുടർനടപടികളുമായി മുന്നോട്ടുപോകാനുള്ള ഒരുക്കത്തിലാണ് സ്നേഹയുടെ ബന്ധുക്കൾ.

കൂത്തുപറമ്പ്:പഠനത്തിന്റെ ഇടവേളയിൽ ആറാംക്ലാസുകാരൻ സഹപാഠികൾക്കൊപ്പം പാടിപ്പറഞ്ഞ റാപ് സോങ് ഏറ്റെടുത്ത് സമൂഹ മാധ്യമങ്ങൾ. മെരുവമ്പായി എംയുപി സ്‌കൂളിലെ വിദ്യാര്‍ഥി മുഹമ്മദ് യാസീൻ സിനോജാണ് വ്യത്യസ്ത ശൈലിയിലൂടെ മലയാളികളുടെ ഹൃദയം കീഴടക്കിയത്.‘പഠിക്കുന്നത് വല്യേതോ സ്ഥലത്താണ് ‘ എന്നു തുടങ്ങി… കൽക്കണ്ടക്കനിയേ കരളിന്റെ കഷ്‌ണേ എന്നടക്കമുള്ള 45 സെക്കന്റ് നീളുന്ന ബീവി റാപ് സോങ്ങാണ് സമൂഹ മാധ്യമത്തിൽ തരംഗമായത്. 45 സെക്കൻഡ്‌ നീളുന്ന റാപ് സംഗീതം നാലുദിവസംകൊണ്ട് കണ്ടത് എട്ടു മില്യനിലേറെ ആളുകൾ.വിദ്യാഭ്യാസമന്ത്രി വി ശിവൻകുട്ടി ഉൾപ്പെടെയുള്ളവർ പാട്ട് ഫേയ്‌സ്ബുക്ക് പേജിൽ ഷെയർ ചെയ്‌തു. സിനോജ് പാടിയത് ക്ലാസധ്യാപിക എം ദൃശ്യയാണ് ചിത്രീകരിച്ച് സ്കൂൾ ഇൻസ്റ്റഗ്രാം പേജിൽ പോസ്റ്റ് ചെയ്തത്.ടീച്ചറുടെ പ്രോത്സാഹനവും ചങ്കുകളുടെ കട്ടസപ്പോർട്ടും കൂടിയായപ്പോൾ മുഹമ്മദ് യാസീൻ സിനോജ് തകർത്തു.സഹപാഠികളായ കെകെ മുഹമ്മദ് സെയ്ൻ, സി നിസാമുദ്ദീൻ എന്നിവർ ബെഞ്ചിൽ താളം കൊട്ടി പിന്തുണ നൽകിയതോടെ പാട്ടിന്റെ ലെവൽ മാറി. ബീവി റാപ് സോങ്ങ് പാടിയ എൻ.കെ റിഷും വിദ്യാർഥികൾക്ക് പിന്തുണയുമായെത്തി. നേരത്തെ മെരുവമ്പായി എം.യു.പി സ്‌കൂളിലെ വിദ്യാർഥികളായ കെ മുഹമ്മദ് സ്വാലിഹ്,എംപി മുഹമ്മദ് സഹീദ്, മുഹമ്മദ് അഫ് ലഹ് എന്നിവർ ചേർന്ന് പാടിയ ഹിന്ദി സോങ് സ്കൂളിലെ ഇൻസ്റ്റഗ്രാം പേജിലൂടെ വൈറലായിരുന്നു. നാലുകോടിയിലേറെ പേരാണ് ആ വീഡിയോ കണ്ടത്. ദൃശ്യയായിരുന്നു ഈ വീഡിയോയും പകർത്തിയത്.

കൂത്തുപറമ്പ്:ജീവിതത്തിന്റെ വസ‌ന്തകാലത്ത് കുടുംബത്തിനും സമൂഹത്തിനുംവേണ്ടി ഏറെ വിയർപ്പൊഴുക്കിയവരാണ്‌ വയോജനങ്ങൾ. അവരുടെ പ്രശ്നങ്ങൾ പരിഹരിക്കുകയെന്നത്‌ സമൂഹത്തിന്റെ ബാധ്യതയാണെന്ന്‌ തിരിച്ചറിഞ്ഞ്‌ വയോജന സൗഹൃദ ഗ്രാമമാകാൻ പാട്യം പഞ്ചായത്ത്‌. വയോജനങ്ങളുടെ പരിരക്ഷ ഉറപ്പുവരുത്താനും സമൂഹത്തിൽ അവരുടെ പ്രാധാന്യം ഉറക്കെ പ്രഖ്യാപിക്കുന്നതിനുമുള്ള പദ്ധതികൾ നടപ്പാക്കുകയാണ്‌ പഞ്ചായത്ത്‌. വാർഡുതല അയൽക്കൂട്ടങ്ങളുടെ സഹായത്തോടെ സർവേ നടത്തിയാണ് അർഹരെ കണ്ടെത്തുക. 50 വീടുകൾക്ക് ഒരു വയോജന അയൽക്കൂട്ടം രൂപീകരിക്കും. പഞ്ചായത്ത്, വാർഡ്തല ക്ലബ്ബുകൾ രൂപീകരിച്ചാണ് പ്രവർത്തനം ഏകോപിപ്പിക്കുക. പഞ്ചായത്ത്തലത്തിൽ വിപുലമായ പദ്ധതികൾ തയ്യാറാക്കുന്നതോടൊപ്പം ആരോഗ്യ കാർഡുകൾ വിതരണം ചെയ്യും. ആരോഗ്യ ക്യാമ്പുകളും സംഘടിപ്പിക്കും. വയോജന സൗഹൃദ പഞ്ചായത്താക്കുന്നതിന്റെ ഭാഗമായുള്ള ശിൽപ്പശാല ഗ്രാമപഞ്ചായത്ത് അസോസിയേഷൻ ചീഫ് എക്സിക്യൂട്ടീവ് ഓഫീസർ കെ ബി മദൻമോഹൻ ഉദ്ഘാടനംചെയ്തു. പഞ്ചായത്ത് പ്രസിഡന്റ് എൻ. വി ഷിനിജ അധ്യക്ഷയായി. വൈസ് പ്രസിഡന്റ് കെ. പി പ്രദീപ് കുമാർ, കെ. ലീല,വി. രാജൻ, ടി സുജാത, ശോഭ കോമത്ത്, മുഹമ്മദ് ഫായിസ്, അസി.സെക്രട്ടറി എൻ. ഉഷ, സി വസന്ത എന്നിവർ സംസാരിച്ചു.