പേരാവൂർ : അമ്പെയ്ത്ത് അസോസിയേഷൻ നടത്തുന്ന ജില്ല അമ്പെയ്ത്ത് ചാമ്പ്യൻഷിപ്പ് വെള്ളി , ശനി ദിവസങ്ങളിൽ പേരാവൂർ ജിമ്മി ജോർജ് സ്റ്റേഡിയത്തിൽ നടക്കും. മത്സരാർഥികൾ വെള്ളിയാഴ്ച രാവിലെ ഏഴിന് സ്റ്റേഡിയത്തിൽ റിപ്പോർട്ട് ചെയ്യണം. സീനിയർ വിഭാഗത്തിൽ പങ്കെടുക്കുന്നവർ ശനിയാഴ്ച രാവിലെ ഏഴിനാണ് എത്തേണ്ടത്. രണ്ട് ഫോട്ടോയും വയസ് തെളിയിക്കുന്ന രേഖയും കരുതണം. ബുധനാഴ്ച വൈകുന്നേരത്തിനകം രജിസ്ട്രർ ചെയ്യണം. ഫോൺ. 9447936455, 9400045729.

പേരാവൂർ : പെൻഷൻ കുടിശിക തീർത്ത് മാസാമാസം വിതരണം ചെയ്യാനും പേരാവൂർ താലൂക്കാസ്പത്രി കെട്ടിട നിർമാണം ത്വരിതപ്പെടുത്താനും എ.കെ.ടി.എ പേരാവൂർ യൂണിറ്റ് സമ്മേളനം ആവശ്യപ്പെട്ടു. ജില്ലാ ജോ.സെക്രട്ടറി കെ.വി.പുഷ്പജൻ ഉദ്ഘാടനം ചെയ്തു. ഇ.നിഷ അധ്യക്ഷയായി. പി.കെ. ഓമന, പി.കെ.ബിന്ദു , മധുസുദനൻ , കെ.വി.സുധ, വി.പി.ബേബി ,കെ.ജിതേഷ് എന്നിവർ സംസാരിച്ചു. ഫിദാ ഷെറിൻ ചികിത്സാ സഹായം 10,000 രൂപ ചികിത്സ സഹായ കമ്മിറ്റിക്ക് കൈമാറി.

പേരാവൂർ: ചിത്ര, ശില്പ , കലാപ്രവർത്തകരുടെയും കരകൗശല കലാകാരന്മാരുടെയും ഒത്തുചേരൽ വേദിയായ ലാ ആർട്ട്‌ഫെസ്റ്റ് ചിത്രകലാ ക്യാമ്പും ചിത്രപ്രദർശനവും സംഘടിപ്പിക്കുന്നു. മണത്തണ കോട്ടക്കുന്നിലാണ് മുതിർന്ന ചിത്രകാരൻ ജോയ് ചാക്കോയുടെ 50 വർഷത്തെ കലാജീവിതത്തെ അടയാളപ്പെടുന്ന ചിത്രപ്രദർശനവും ഇരുപതോളം മുഖ്യധാരാ ആർട്ടിസ്റ്റുമാരുടെ ചിത്രകലാ ക്യാമ്പും ജനുവരി നാല് ,അഞ്ച് തീയതികളിൽ നടക്കുക.1989-ലെ ലളിതകലാ അക്കാദമി അവാർഡ് ജേതാവായജോയ് ചാക്കോ 50 വർഷത്തിലേറെയായി തുടരുന്ന കലാജീവിതത്തെ ആദരിക്കാനാണ് സുഹൃത്തുക്കളും അഭ്യുദയ കാംക്ഷികളും ചേർന്ന് ചിത്രപ്രദർശനം ഒരുക്കുന്നത്.വരും വർഷങ്ങളിൽ എല്ലാ കലാ മേഖലകളിൽ നിന്നുമുള്ള കലാപ്രവർത്തകർക്ക് ലാ ഫെസ്റ്റിൽ അവസരങ്ങൾ നൽകുമെന്നും സംഘാടകർ പറഞ്ഞു. പത്രസമ്മേളനത്തിൽ ആർട്ടിസ്റ്റ് ജയിൻ, സി.എം.ജെ മണത്തണ, എം.സുനിൽകുമാർ , തോമസ് കളപ്പുര, ജോസ് ജോസഫ്, എം.വി.മാത്യു എന്നിവർ സംബന്ധിച്ചു.