ന്യൂഡൽഹി: വാട്‌സാപ്പിലൂടെ വിവാഹ ക്ഷണക്കത്ത് എന്ന പേരിൽ വരുന്നത് പുതിയ തട്ടിപ്പെന്ന മുന്നറിയിപ്പുമായി പോലീസ്. ഇന്നത്തെ കാലത്ത് സുഹൃത്തുക്കൾക്കും പരിചയക്കാർക്കും ഉൾപ്പെടെ വിവാഹക്കത്ത് വാട്‌സാപ്പ് വഴി അയക്കുന്നത് പതിവാണ്. എന്നാൽ, വിവാഹ ക്ഷണക്കത്തെന്ന വ്യാജേന എത്തുന്ന ചില ഫയലുകൾ തുറക്കുന്നതോടെ നിങ്ങളുടെ ഫോണിലെ വിവരങ്ങളെല്ലാം ചോർന്നേക്കുമെന്നും പണം തട്ടിയെടുക്കാനിടയുണ്ടെന്നുമാണ് പൊലീസ് നൽകിയ മുന്നറിയിപ്പ്.

വാട്‌സാപ്പ് വഴി എപികെ ഫയലുകളായാണ് വ്യാജ വിവാഹ ക്ഷണക്കത്തുകൾ എത്തുക. ഇത്തരം ഫയലുകൾ ഡൗൺലോഡ് ചെയ്യുമ്പോൾ ഫോണിൽ പ്രവേശിക്കുന്ന മാൽവെയറുകൾ അതിലെ സ്വകാര്യ വിവരങ്ങൾ ചോർത്തും. ഇതോടെ നമ്മളറിയാതെ സന്ദേശങ്ങൾ അയക്കാനും പണം ചോർത്താനും ഹാക്കർമാർക്ക് കഴിയും. പരിചയമില്ലാത്ത നമ്പറിൽ നിന്നാകും വിവാഹ ക്ഷണക്കത്ത് നിങ്ങളുടെ വാട്‌സാപ്പിലേക്ക് എത്തുക. പരിചയക്കാർ ആരെങ്കിലുമാകാം എന്ന് കരുതി സന്ദേശത്തോടൊപ്പമുള്ള വിവാഹ കത്ത് കാണാനായി ഫയൽ ഡൗൺലോഡ് ചെയ്യുന്നതോടെ ഫോണിന്റെ നിയന്ത്രണം മുഴുവൻ തട്ടിപ്പുകാരുടെ കൈകളിലെത്തും.

ഫോണിലെ കോൺടാക്‌ട് ലിസ്റ്റിലെ വിവരങ്ങൾ ഉൾപ്പെടെ തട്ടിപ്പുകാർക്ക് ലഭിക്കുന്നതോടെ അവർക്ക് സന്ദേശങ്ങൾ അയക്കാനും പണം ആവശ്യപ്പെടാനും കഴിയും. മറ്റ് സ്വകാര്യ വിവരങ്ങൾ ദുരുപയോഗിച്ച് ഇവർ ഭീഷണിപ്പെടുത്താനും സാദ്ധ്യതയുണ്ട്. ഇത്തരം കേസുകൾ ശ്രദ്ധയിൽപ്പെട്ടതായി ഹിമാചൽ പ്രദേശിലെ സൈബർ ക്രൈം ഡിപ്പാർട്ട്‌മെന്റ് ഡിഐജി മോഹിത് ചൗള പറഞ്ഞു. അപരിചിതമായ നമ്പറുകളിൽ നിന്നുള്ള തുറക്കുമ്പോൾ സൂക്ഷിക്കണം. അത് അയച്ചത് ആരാണെന്ന് ഉറപ്പാക്കിയ ശേഷം മാത്രം ഫയൽ തുറക്കണമെന്നും പൊലീസ് മുന്നറിയിപ്പ് നൽകുന്നുണ്ട്.

കണ്ണൂർ: കൊങ്കണിലെ 741 കിലോമീറ്റർ ഒറ്റപ്പാതയിൽ പാളം നവീകരിച്ചതിനെത്തുടർന്ന് തീവണ്ടികൾ 120 കി.മീ. വേഗത്തിൽ ഓടും. കേരളത്തിൽ റെയിൽപ്പാളത്തിലെ വളവാണ് തടസ്സം. പാളങ്ങൾ ബലപ്പെടുത്തി, വളവുകൾ നിവർത്തുന്ന പ്രവൃത്തി ഇവിടെ ഇഴയുകയാണ്. മംഗളൂരു-ഷൊർണൂർ സെക്ഷനിൽ 110 കി.മീ. വേഗമുണ്ട്. ഷൊർണൂർ-എറണാകുളം സെക്ഷനിലെത്തുമ്പോൾ വന്ദേഭാരതിനടക്കം 80 കി.മീ. വേഗതയേ ഉള്ളൂ. എറണാകുളം-കായംകുളം-തിരുവനന്തപുരം റൂട്ടിൽ 110-ൽ ഓടിക്കാം. എന്നാൽ എറണാകുളം-കോട്ടയം-തിരുവനന്തപുരം റൂട്ടിൽ 80-90 കിലോമീറ്ററേ പറ്റൂ.

ഷൊർണൂർ-മംഗളൂരു സെക്ഷനിലെ 307 കിലോമീറ്ററിൽ വേഗം 110 കി.മിറ്ററിൽനിന്ന് 130 കി.മീ. ആക്കി ഉയർത്തുന്ന പ്രവൃത്തി ഇതുവരെ തുടങ്ങിയിട്ടില്ല. 288 വളവുകളാണ് നിവർത്തേണ്ടത്. ടെൻഡർ 2023 ജൂലായിലാണ് വിളിച്ചത്. എന്നാൽ പണി ഒന്നുമായില്ല. 12 മാസത്തിനുള്ളിൽ പണി പൂർത്തീകരിക്കാനായിരുന്നു നിർദേശം. കൊടും വളവുകളുടെ വൃത്തദൈർഘ്യം വർധിപ്പിച്ചും സ്ഥലമേറ്റെടുക്കാതെയുമാണ് പ്രവൃത്തി നടത്തുന്നത്.

തിരുവനന്തപുരം-ഷൊർണൂർ പാതയിൽ 76 ചെറിയ വളവുകളാണ് നിവർത്തുന്നത്. 2023 ഒക്ടോബറിൽ ടെൻഡർ വിളിച്ചു. തിരുവനന്തപുരം-കായംകുളം (22), എറണാകുളം-ആലപ്പുഴ-കായംകുളം (10), എറണാകുളം-കോട്ടയം-കായംകുളം (22) ഷൊർണൂർ-എറണാകുളം (22) സെഷനുകളിലായി 40 സെന്റീമീറ്റർ മുതൽ ഒരുമീറ്റർ വരെ നീളത്തിലുള്ള വളവുകളാണ് നിവർത്തേണ്ടത്. തീവണ്ടികളുടെ ഓട്ടം ക്രമീകരിച്ചുള്ള ‘സമയ ഇടനാഴി’ (കോറിഡോർ ബ്ലോക്ക്്) യിലാണ് അറ്റകുറ്റപ്പണി ചെയ്യേണ്ടത്. എന്നാൽ പല സെക്ഷനിലും ഇതിന്‌ സമയം കുറവാണ്.

കൊങ്കണിൽ കുതിക്കും

നേത്രാവതി, മംഗള എക്സ്‌പ്രസുകൾ ഉൾപ്പെടെ എൽ.എച്ച്.ബി. കോച്ചുകളിൽ ഓടുന്ന 45 വണ്ടികളുടെ വേഗമാണ് കൊങ്കൺപാതയിൽ വർധിപ്പിച്ചത്. ഇതിൽ ഭൂരിഭാഗവും കേരളത്തിലൂടെ ഓടുന്ന വണ്ടികളാണ്. പരമ്പരാഗത കോച്ചുകൾക്ക് വേഗം 110-ൽ കൂട്ടാനാകില്ല. കൊങ്കൺ പാതയിലെ മൺസൂൺ വേഗം 40-75 കിലോമീറ്ററാണ്. നവംബർ ഒന്നുമുതൽ ജൂൺ 10 വരെ 100-110 കിലോമീറ്ററിലോടും. ഇതാണ് വർധിപ്പിച്ചത്.

പെരിന്തല്‍മണ്ണ: മണ്‍സൂണ്‍ കഴിഞ്ഞാല്‍ കൊടികുത്തി മലയിലെ പ്രധാന ടൂറിസ്റ്റ് സീസണ്‍ കോടപുതഞ്ഞ് കിടക്കുന്ന ഈ നവംബര്‍ – ഡിസംബര്‍ കാലമാണ്. ഋതുക്കള്‍ക്കൊപ്പം കൊടികുത്തി മലയും തണുപ്പിനെ പുണര്‍ന്നുതുടങ്ങുമ്പോള്‍ സഞ്ചാരികളും ഇവിടേക്ക് ഒഴുകിയെത്തും. രാവിലെ എട്ടിന് സന്ദര്‍ശന സമയം തുടങ്ങുമ്പോള്‍ത്തന്നെ എത്തുന്നവരെ കാത്ത് തണുപ്പും കോടയും കാത്തിരിപ്പുണ്ട് ഈ പുല്‍മേട്ടില്‍. വൈകീട്ടാണെങ്കില്‍ അസ്തമയ സൂര്യനും അനന്തമായ ദൂരക്കാഴ്ചകളും.

പെരിന്തല്‍മണ്ണയില്‍ നിന്ന് 10 കിലോമീറ്റര്‍ ചുറ്റളവിലുള്ള കൊടികുത്തിമല നഗര പരിധിയില്‍ വരുന്ന അപൂര്‍വം ഹില്‍സ്റ്റേഷനുകളിലൊന്നാണ്. രണ്ടു വര്‍ഷം കൊണ്ട് രണ്ടര ലക്ഷത്തിലേറെ സഞ്ചാരികളെത്തുകയും മൂന്നു വര്‍ഷം കൊണ്ട് ടിക്കറ്റ് വില്‍പ്പനയിലൂടെ ഒരു കോടിയിലേറെ വരുമാനം കണ്ടെത്തുകയുംചെയ്തു എന്നത് കൊടികുത്തി മലയുടെ ജനപ്രീതി വ്യക്തമാക്കുന്നു.

പെരിന്തല്‍മണ്ണയില്‍നിന്ന് പാലക്കാട് റോഡില്‍ അഞ്ച് കിലോമീറ്റര്‍ സഞ്ചരിച്ചാല്‍ അമ്മിനിക്കാട് ടൗണില്‍ എത്താം. അമ്മിനിക്കാടു നിന്ന് ഇടത്തോട്ട് വീണ്ടും അഞ്ചു കിലോമീറ്റര്‍ യാത്രചെയ്താല്‍ താഴേക്കോട് പഞ്ചായത്തിലെ കൊടികുത്തിമല ഇക്കോ ടൂറിസം കേന്ദ്രത്തിലെത്താം. പ്രവേശന കവാടത്തിനോടു ചേര്‍ന്നുള്ള ടിക്കറ്റ് കൗണ്ടറില്‍നിന്ന് ഒന്നരക്കിലോമീറ്റര്‍ കാല്‍നടയായ് വേണം മുകളിലെത്താന്‍. ശുദ്ധവായു ശ്വസിച്ച് പ്രകൃതിഭംഗി ആസ്വദിച്ചുള്ള ഈ നടത്തം നല്ലൊരു വ്യായാമം കൂടിയാണ്. ഓരോ ചുവടിലും എത്ര കലോറി ഉപയോഗിക്കപ്പെട്ടു എന്ന് കാണിക്കുന്ന ബോര്‍ഡും വഴി നീളെ കാണാം എന്നത് കൊടികുത്തിമല യാത്രയിലെ കൗതുകങ്ങളിലൊന്നാണ്. വിശ്രമിക്കാനുള്ള ഇരിപ്പിടങ്ങളും മരത്തണലും ആവോളം ഉള്ളതിനാല്‍ സമയമെടുത്ത് പതുക്കെ മല കയറിയാല്‍ മതിയാവും.

മുകളിലെത്തിയാല്‍ മലനിരകളും പുഴയും ജനവാസ കേന്ദ്രങ്ങളും കടലുമെല്ലാം കാഴ്ചയില്‍ തെളിയുന്ന സുന്ദര നിമിഷമാണ്. 360 ഡിഗ്രി കാഴ്ച പ്രദാനം ചെയ്യുന്ന വാച്ച് ടവര്‍ തന്നെയാണ് മലമുകളിലെ പ്രധാന ആകര്‍ഷണം. വനം വകുപ്പും നാട്ടുകാരും ചേര്‍ന്നുള്ള വന സംരക്ഷണസമിതിയാണ് ഇക്കോ ടൂറിസ്റ്റ് കേന്ദ്രത്തിന്റെ നടത്തിപ്പും പരിപാലനവും. തിങ്കളാഴ്ച ഒഴികെ മറ്റെല്ലാ ദിവസവും പ്രവര്‍ത്തിക്കുന്ന ഇവിടെ അവധി ദിവസങ്ങളില്‍ 500-700 വരെ സഞ്ചാരികളെത്തുന്നുണ്ട്. പ്ലാസ്റ്റിക് നിരോധനം മികച്ച രീതിയില്‍ നടപ്പാക്കപ്പെടുന്ന ഒരു കേന്ദ്രം കൂടിയാണിത്. കോടമഞ്ഞ് വെഞ്ചാമര വര്‍ണം വിതറുന്ന ഈ തണുപ്പുകാല സീസണില്‍ മല കയറി വരാന്‍ പോവുന്ന സഞ്ചാരികള്‍ക്കുള്ള കാത്തിരിപ്പിലാണ് കൊടികുത്തി മല.