കണ്ണൂർ : യുണൈറ്റഡ് മർച്ചന്റ്സ് ചേംബർ പേരാവൂർ യൂണിറ്റ് സംഘടിപ്പിക്കുന്ന രണ്ടാമത് പേരാവൂർ മിഡ്നൈറ്റ് മാരത്തൺ നവംബർ 23-ന് നടക്കും. രാത്രി 11-ന് പേരാവൂർ പഴയ ബസ്സ്റ്റാൻഡിൽ നിന്ന് ആരംഭിച്ച് ചെവിടിക്കുന്ന്, തൊണ്ടിയിൽ, തെറ്റുവഴിയിലൂടെ പഴയ ബസ് സ്റ്റാൻഡിൽ സമാപിക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. ഏഴ് കിലോമീറ്റർ മാരത്തണിൽ നാല് പേരടങ്ങുന്ന ടീമുകൾക്ക് മത്സരിക്കാം.

ആദ്യ മൂന്ന് സ്ഥാനങ്ങളിലെത്തുന്ന പുരുഷ, വനിതാ ടീമുകൾക്ക് യഥാക്രമം 15,000, 10,000, 5000 രൂപ വീതമാണ് കാഷ് പ്രൈസ്. ഓട്ടം പൂർത്തിയാക്കുന്നവർക്ക് മെഡലും സർട്ടിഫിക്കറ്റും നൽകും. 50 വയസ്സിന് മുകളിലുള്ള നാല് വനിതാ മത്സരാർഥികൾക്കും 60 വയസ്സിന് മുകളിലുള്ള നാല് മത്സരാർഥികൾക്കും പ്രോത്സാഹന സമ്മാനം നൽകും. നാലുമുതൽ 10 വരെ സ്ഥാനത്തെത്തുന്ന ടീം അംഗങ്ങൾക്കും പ്രോത്സാഹന സമ്മാനമുണ്ട്. ഒളിമ്പ്യൻ ടിന്റു ലൂക്കയാണ് ഇവൻ്റ് അംബാസഡർ. ആരോഗ്യമുള്ള തലമുറ, മാലിന്യമുക്ത കേരളം എന്ന ആശയം ഉയർത്തിപ്പിടിച്ചാണ് മാരത്തൺ സംഘടിപ്പിക്കുന്നത്. നാലുപേരടങ്ങുന്ന ടീമിന് 1200 രൂപയാണ് രജിസ്ട്രേഷൻ ഫീസ്. അല്ലാതെ മത്സരത്തിൽ പങ്കെടുക്കുന്ന ഒരാൾക്ക് 300 രൂപയാണ് രജിസ്ട്രേഷൻ ഫീസ്. രജിസ്ട്രേഷന് 9947537486, 9946532852.

പത്രസമ്മേളനത്തിൽ ചെയർമാൻ സൈമൺ മേച്ചേരി, യൂണിറ്റ് പ്രസിഡൻ്റ് ഷിനോജ് നരിതൂക്കിൽ, ജനറൽ സെക്രട്ടറി വി.കെ. രാധാകൃഷ്ണൻ, ഖജാൻജി നാസർ ബറാക്ക, യൂണിറ്റ് രക്ഷാധികാരി കെ.എം. ബഷീർ എന്നിവർ പങ്കെടുത്തു.

പേരാവൂർ: സി.പി.എം പേരാവൂർ ഏരിയക്ക് കീഴിലെ ലോക്കൽ കമ്മിറ്റികളുടെ സമ്മേളനം പൂർത്തിയായി. ഇതിൽ അഞ്ച് ലോക്കൽ കമ്മിറ്റികളിൽ ഔദ്യോഗിക പാനലിനെതിരെ മത്സരം നടന്നു.ചിലയിടങ്ങളിൽ ഔദ്യോഗിക പാനലിലുള്ളവർ തോറ്റപ്പോൾ ചിലയിടങ്ങളിൽ പാനലിനെതിരെ മത്സരിച്ചവരും തോറ്റു.

പേരാവൂർ ഏരിയാ കമ്മിറ്റിക്ക് കീഴിൽ കൊട്ടിയൂർ, കേളകം, അടക്കാത്തോട്, കണിച്ചാർ, കൊളക്കാട്, മണത്തണ, പേരാവൂർ, കാക്കയങ്ങാട്, മുഴക്കുന്ന്, നിടുംപൊയിൽ, കോളയാട് എന്നിങ്ങനെ11 ലോക്കൽ കമ്മിറ്റികളാണുള്ളത്. ഇതിൽ കൊട്ടിയൂർ, കേളകം, അടക്കാത്തോട്, കാക്കയങ്ങാട് ലോക്കൽ കമ്മിറ്റികളിലാണ് ഔദ്യോഗിക പാനലിനെതിരെ മത്സരമുണ്ടായത്. മുഴക്കുന്ന് ലോക്കലിൽ സെക്രട്ടറി സ്ഥാനത്തേക്കും മത്സരം നടന്നു.

കൊട്ടിയൂരിൽ ഔദ്യോഗിക പാനലിൽ മത്സരിച്ച പി.വി.ഹരിലാൽ തോറ്റപ്പോൾ എതിരെ മത്സരിച്ച എമിൽ മാത്യു വിജയിച്ചു. കേളകത്ത് ഔദ്യോഗിക പാനലിലെ ബീന ഉണ്ണിയാണ് പരാജയമറിഞ്ഞത്. ഇവിടെ ജോർജ് കറുകപ്പള്ളി, രാജേഷ്, സുമേഷ് തത്തുപാറ, എൻ.ബി.ബെസ്റ്റിൻ എന്നിവർ എതിരായി മത്സരിക്കുകയും സുമേഷ് തത്തുപാറ വിജയിക്കുകയും ചെയ്തു.അടക്കാത്തോടിൽ ഔദ്യോഗിക പാനലിനെതിരെ മത്സരിച്ച തമ്പി എന്ന തോമസിന് വിജയിക്കാനായില്ല.

കാക്കയങ്ങാട് ലോക്കലിലാണ് ശക്തമായ മത്സരം നടന്നത്. നിലവിലെ ലോക്കൽ കമ്മിറ്റിയംഗങ്ങളായ ബാബു ജോസഫിനെയും എൻ.ഗംഗാധരനെയും ഔദ്യോഗിക പാനലിൽ നിന്നൊഴിവാക്കിയെങ്കിലും ഇരുവരും മത്സരിക്കുകയും ബാബു ജോസഫ് ഏറ്റവുമധികം വോട്ടുകൾ നേടി വിജയിക്കുകയും ചെയ്തു. എന്നാൽ ഗംഗാധരൻ പരാജയപ്പെട്ടു. കൂടാതെ ഔദ്യോഗിക പാനലിനെതിരെ മത്സരിച്ച കെ.രഞ്ജിത്ത്, കെ.പി.ബീന, എ.രഞ്ജിത്ത് എന്നിവരും വിജയിച്ചു. ഔദ്യോഗിക പാനലിലെ കെ.ഉണ്ണിക്കൃഷ്ണൻ, വി.വി.റാഫി, ജഗതി ബിജു എന്നിവരാണ് പരാജയമറിഞ്ഞത്.

സി.പി.എമ്മിന്റെ ഉറച്ച കോട്ടയായ മുഴക്കുന്ന് ലോക്കലിലെ ഔദ്യോഗിക പാനലിൽ സെക്രട്ടറി സ്ഥാനത്തേക്ക് പരിഗണിച്ച എൻ.സനോജിനെതിരെ മത്സരിച്ച സി.ഗോപാലനാണ് പരാജയപ്പെട്ടത്. മുൻ ലോക്കൽ സെക്രട്ടറി കൂടിയാണ് സി.ഗോപാലൻ. നവംബർ 22 മുതൽ 25 വരെ കോളയാടിലാണ് പേരാവൂർ ഏരിയാ സമ്മേളനം നടക്കുക.

കുടുംബശ്രീ എ.ഡി.എസ്, സി.ഡി. എസ് അംഗങ്ങൾക്കുള്ള ശില്പശാല പഞ്ചായത്ത് പ്രസിഡന്റ് പി.പി. വേണുഗോപാലൻ ഉദ്ഘാടനം ചെയ്യുന്നു

പേരാവൂർ: മാലിന്യമുക്തം നവകേരളം ജനകീയ ക്യാമ്പയിന്റെ ഭാഗമായി പേരാവൂർ പഞ്ചായത്തിലെ കുടുംബശ്രീ അയൽക്കൂട്ടങ്ങൾ ഹരിതമാകും.2025 മാർച്ച് 31 ന് ശുചിത്വകേരളം പ്രഖ്യാപനത്തിന് മുന്നോടിയായാണ് 100% അയൽക്കൂട്ടങ്ങൾ ഹരിതമായി പ്രഖ്യാപിക്കുക.16 വാർഡിലായി 207 അയൽക്കൂട്ടങ്ങളാണ് പഞ്ചായത്തിലുള്ളത്. ഖര മാലിന്യങ്ങൾ തരംതിരിച്ച് ഹരിതകർമസേനക്ക് കൈമാറിയും ജൈവ-ദ്രവ മാലിന്യങ്ങൾ ശാസ്ത്രീയമായി സംസ്‌കരിച്ചും ജല സ്രോതസ്സുകൾ വൃത്തിയാക്കിയും അയൽകൂട്ടപരിധിയിലെ പാതയോരങ്ങളും പൊതുസ്ഥാപനങ്ങളും സൗന്ദര്യവത്കരിച്ചുമാണ് “ഹരിത അയൽകൂട്ടങ്ങൾ” സൃഷ്ടിക്കുക. സർവേ നടത്തുന്നതിനുള്ള മാർഗരേഖയും വിതരണം ചെയ്തു.

കുടുംബശ്രീ എ.ഡി.എസ്, സി.ഡി. എസ് അംഗങ്ങൾക്കുള്ള ശില്പശാല പഞ്ചായത്ത് പ്രസിഡന്റ് പി. പി. വേണുഗോപാലൻ ഉദ്ഘാടനം ചെയ്തു.വൈസ് പ്രസിഡന്റ് നിഷ ബാലകൃഷ്ണൻ അധ്യക്ഷയായി. ഹരിതകേരളം മിഷൻ ജില്ലാ റിസോഴ്സ് പേഴ്സൺ നിഷാദ് മണത്തണ പരിശീലനം നൽകി. സ്ഥിരം സമിതി അധ്യക്ഷരായ കെ. വി. ശരത്, റീന മനോഹരൻ, പഞ്ചായത്ത് അംഗങ്ങളായ റജീന സിറാജ്, ബേബി സോജ, വി. എം.രഞ്ജുഷ,സി. ഡി.എസ്. ചെയർപേഴ്സൺ ഷാനി ശശീന്ദ്രൻ, കെ.രേഷ്മ, പി.സിനി, ദിവ്യ രാഘവൻ എന്നിവർ സംസാരിച്ചു.