കണ്ണൂർ:ചിറക്കലിൽ ചെറുശ്ശേരി മ്യൂസിയം നിർമാണത്തിനുള്ള പ്രവർത്തനങ്ങൾ വേഗത്തിലായി. ഇതിനുമുന്നോടിയായി മ്യൂസിയം സ്ഥാപിക്കാനുദ്ദേശിച്ച മലബാറിലെ ഏറ്റവും പഴക്കമുള്ള ക്ഷേത്രമായ കിഴക്കേക്കര മതിലകം ക്ഷേത്രം സാംസ്കാരിക വകുപ്പ് അഡീഷണൽ ചീഫ് സെക്രട്ടറി രാജൻ എൻ ഖോബ്രഗഡെ സന്ദർശിച്ചു. മ്യൂസിയം നിർമിക്കാനുള്ള രൂപരേഖ തയ്യാറായിട്ടുണ്ട്‌. വാസ്തുവിദ്യാ ഗുരുകുലമാണ് ഡിപിആർ തയ്യാറാക്കിയത്. ഓപ്പൺ ഓഡിറ്റോറിയം, വൃന്ദാവനം, മുഴുവൻ സമയവും കൃഷ്ണഗാഥ ശ്രവിക്കാവുന്ന ശബ്ദ സംവിധാനം, കൃഷ്ണഗാഥയുടെയും ചെറുശേരിയുടെയും ചരിത്ര പ്രാധാന്യം ചിത്രീകരിക്കുന്ന മ്യൂസിയം എന്നിവയാണ് ഒരുക്കുക. കെ വി സുമേഷ് എംഎൽഎയുടെ ഇടപെടലിലാണ് സംസ്ഥാന സർക്കാർ മ്യൂസിയത്തിന്‌ രണ്ടുകോടി രൂപ അനുവദിച്ചത്. മതിലകം ക്ഷേത്രത്തിന് 1,200 വർഷത്തിലേറെ പഴക്കമുണ്ട്. കൃഷ്ണഗാഥയിലെ ശ്രീകൃഷ്ണന്റെ ജനനം മുതൽ കംസവധം വരെയുള്ള ഭാഗങ്ങൾ ഗോപുരത്തിൽ മനോഹരമായ കൊത്തുപണിയായി അടയാളപ്പെടുത്തിയിട്ടുണ്ട്. ചരിത്രാന്വേക്ഷകർക്കും ചരിത്ര വിദ്യാർഥികൾക്കും മ്യൂസിയം ഉപയോഗപ്രദമാകുമെന്നും സാങ്കേതിക നടപടികൾ വേഗത്തിലാക്കി പ്രവൃത്തി ആരംഭിക്കുമെന്നും എംഎൽഎ പറഞ്ഞു.

കണ്ണൂർ: ജില്ലയിലെ എട്ട്‌ വിനോദ സഞ്ചാര കേന്ദ്രങ്ങൾക്ക്‌ ഹരിത പദവി. വിനോദ സഞ്ചാര കേന്ദ്രങ്ങളെ വൃത്തിയും ശുചിത്വവുമുള്ള സ്ഥലങ്ങളായി നിലനിർത്തുന്ന ഹരിത ടൂറിസം പ്രവർത്തനങ്ങളുടെ അടിസ്ഥാനത്തിലാണ്‌ ആദ്യ ഘട്ടത്തിൽ എട്ട്‌ കേന്ദ്രങ്ങളെ തെരഞ്ഞെടുക്കുന്നത്‌.

പുല്ലൂപ്പി കടവ് (നാറാത്ത്), ചാൽ ബീച്ച് (അഴീക്കോട്), വയലപ്ര (ചെറുതാഴം), ജബ്ബാർ കടവ് (പായം), പാലുകാച്ചി മല (കേളകം), പാലുകാച്ചി പാറ (മാലൂർ), ഏലപ്പീടിക (കണിച്ചാർ), ഏഴരക്കുണ്ട് വെള്ളച്ചാട്ടം (ഏരുവേശി) എന്നിവയാണ് എട്ട് കേന്ദ്രങ്ങൾ. ജില്ലയിലാകെ 59 ടൂറിസ്റ്റ് കേന്ദ്രങ്ങളാണ് ഉള്ളത്. മാലിന്യ മുക്തം നവകേരളം ജനകീയ ക്യാമ്പയിൻ ഭാഗമായാണ് വിനോദ സഞ്ചാര കേന്ദ്രങ്ങളെ ഹരിത ടൂറിസം കേന്ദ്രങ്ങളാക്കുന്നത്.

മാലിന്യ സംസ്കരണത്തിന് സ്ഥിരം സംവിധാനങ്ങൾ, ശുദ്ധമായ കുടിവെള്ള ലഭ്യത, ജല സ്രോതസ്സുകളുടെ സംരക്ഷണം, ഊർജ സംരക്ഷണത്തിന് സംവിധാനങ്ങൾ തുടങ്ങിയ വിവിധ ഘടകങ്ങൾ പരിഗണിച്ചാണ് ഹരിത ടൂറിസം കേന്ദ്രം പദവി സമ്മാനിക്കുന്നത്. പ്രാദേശിക ജനങ്ങളുടെ തൊഴിൽ സാധ്യത വർധിപ്പിക്കാനും ജീവിത നിലവാരം ഉയർത്താനും ഉള്ള പദ്ധതികൾ തുടങ്ങുന്നതും ഹരിത ടൂറിസം പ്രവർത്തനങ്ങളുടെ മാനദണ്ഡങ്ങളിൽ ഉൾപ്പെടും.

കണ്ണൂർ: ജില്ലാ സ്പോർട്സ് കരാട്ടെ അസോസിയേഷന്റെ ജില്ലാ കരാട്ടെ മത്സരം ഡിസംബർ ഒന്നിന് മുണ്ടയാട് ഇൻഡോർ സ്റ്റേഡിയത്തിൽ നടക്കും. ഈ മാസം 31ന് ഒന്നിന് മുൻപ് റജിസ്റ്റർ ചെയ്യണം. ഫോൺ: 9526152158.