കൈതേരി : വട്ടപ്പാറയിൽ സ്വകാര്യ ബസ് നിർത്തിയിട്ട ടൂറിസ്റ്റ് ബസിലിടിച്ച് 15 പേർക്ക് പരിക്കേറ്റു. പേരാവൂരിൽനിന്നും തലശ്ശേരി ഭാഗത്തേക്ക് പോകുന്ന സ്വകാര്യ ബസാണ് നിയന്ത്രണംവിട്ട് സമീപത്ത് റോഡരികിൽ നിർത്തിയിട്ടിരുന്ന ടൂറിസ്റ്റ് ബസിലിടിച്ചത്. സ്വകാര്യ ബസിലുണ്ടായിരുന്ന പേരാവൂർ മലബാർ ട്രെയിനിങ് കോളേജ് വിദ്യാർഥികളായ കൃഷ്ണാഞ്ജന (21), ആയിത്തറ മമ്പറം, ഹർഷിയ (23) വേറ്റുമ്മൽ, അനഘ (18) പെരളശേരി, അഥീന (18) പാനൂർ, മറ്റ് യാത്രക്കാരായ കയ്യാലകത്ത് ജമീല (62), ധനഞ്ജയൻ (50), ആഷ്‌ന (21), ചന്ദ്രിക (52), ദേവനന്ദ (22), ചന്ദ്രൻ (60), ലോറൻസ് (54), ലിജിനി (39) എന്നിവർ കൂത്തുപറമ്പ് താലൂക്ക് ആസ്പത്രിയിൽ ചികിത്സ തേടി. സാരമായി പരിക്കേറ്റ രണ്ടുപേരെ കണ്ണൂരിലെ സ്വകാര്യ ആസ്പത്രിയിലും പ്രവേശിപ്പിച്ചു. വ്യാഴാഴ്ച വൈകിട്ട് നാലു മണിയോടെയായിരുന്നു അപകടം.

കൂത്തുപറമ്പ്: ഗ്ലോബൽ ട്രേഡിങ്‌ കമ്പനിയുടെ ലിങ്കിലേക്ക് പണം നിക്ഷേപിച്ച യുവാവിന് മൂന്നരലക്ഷത്തോളം രൂപ നഷ്ടമായി. ലാഭം തിരികെ നൽകാമെന്ന് വിശ്വസിപ്പിച്ചാണ് പൂക്കോട് സ്വദേശിയായ യുവാവ് ഓൺലൈനായി പണം നിക്ഷേപിച്ചത്. വിവിധ സമയങ്ങളിലായി ഗ്ലോബൽ ട്രേഡിങ്‌ കമ്പനിയുടെ ലിങ്കിലേക്ക് ഓൺലൈനായി യുവാവ് 3,45,900 രൂപ നിക്ഷേപിക്കുകയായിരുന്നു. പിന്നീട് നിക്ഷേപിച്ച തുകയോ ലാഭമോ ലഭിക്കാതെ വന്നപ്പോഴാണ് തട്ടിപ്പിനിരയായതായി മനസിലായത്. യുവാവിന്റെ പരാതിയിൽ കൂത്തുപറമ്പ് പൊലീസ് അന്വേഷണം തുടങ്ങി.

കണ്ണൂർ: കൂത്തുപറമ്പ് സമര പോരാളി പുഷ്പൻ്റെ നിര്യാണത്തിൽ അനുശോചിച്ച് നാളെ കൂത്തുപറമ്പ്, തലശ്ശേരി അസംബ്ലി മണ്ഡലങ്ങളില്‍ ഹര്‍ത്താല്‍ ആചരിക്കും. ഹര്‍ത്താലില്‍ നിന്ന് വാഹനങ്ങളെ ഒഴിവാക്കും. പുഷ്പന്‍റെ മൃതശരീരം കോഴിക്കോട് ബേബി മെമ്മോറിയല്‍ ഹോസ്പിറ്റലില്‍ നിന്ന് നാളെ രാവിലെ 8 മണിക്ക് വിലാപയാത്രയായി പുറപ്പെടും. റോഡിന്‍റെ  ഇരുഭാഗങ്ങളിലുള്ളവര്‍ക്കും കാണുന്ന തരത്തിലുള്ള വാഹനത്തിലാണ് മൃതദേഹം കൊണ്ടുവരുന്നത്. കോഴിക്കോട്, എലത്തൂർ, പൂക്കാട്, കൊയിലാണ്ടി, നന്തി, വടകര, നാദാപുരം റോഡ്, മാഹി, മാഹി പാലം, പുന്നോല്‍ വഴി 10 മണിക്ക് തലശ്ശേരി ടൗണ്‍ ഹാളില്‍ എത്തിക്കും. 10 മുതല്‍ 11.30 വരെ തലശ്ശേരി ടൗണ്‍ ഹാളില്‍ പൊതു ദര്‍ശനത്തിന് ശേഷം പള്ളൂര്‍ വഴി ചൊക്ലി രാമവിലാസം സ്കൂളില്‍ എത്തിക്കും. 12 മണി മുതല്‍ വൈകുന്നേരം 4.30 വരെ ചൊക്ലി രാമവിലാസം ഹയര്‍ സെക്കന്‍ററി സ്കൂളില്‍ പൊതുദര്‍ശനത്തിന് ശേഷം വൈകുന്നേരം 5 മണിക്ക് ചൊക്ലി മേനപ്രം വീട്ടു പരിസരത്ത് സംസ്കരിക്കും.