കണ്ണൂർ: മംഗളൂരു-തിരുവനന്തപുരം പാതയിൽ വന്ദേ ഭാരത് സ്ലീപ്പർ അനുവദിക്കണമെന്ന ആവശ്യം ശക്തമാകുന്നു. രണ്ടാം വന്ദേസ്ലീപ്പർ ദക്ഷിണറെയിൽവേക്കാണെന്ന സൂചന വന്നതോടെയാണ്‌ ഈ പാതയിൽ വേണമെന്ന ആവശ്യമുയരുന്നത്‌.പകൽ ഓടുന്ന വന്ദേഭാരതിൽ ഇരുന്ന്‌ യാത്രയ്ക്ക്‌ മാത്രമാണ്‌ സൗകര്യമുള്ളത്‌. കിടന്നുറങ്ങി യാത്രചെയ്യാനാകുന്ന സ്ലീപ്പർ ഈ പാതയിൽ വന്നാൽ ഒരു പകൽ പാഴാകുന്നത് ഒഴിവാക്കാനാകുമെന്നാണ് അഭിപ്രായം. രാജ്യത്ത് സർവീസ് നടത്തുന്ന 51 വന്ദേഭാരതുകളിൽ യാത്രക്കാരുടെ എണ്ണത്തിൽ മുന്നിൽ കേരളത്തിലേ തീവണ്ടിയാണ്. വന്ദേസ്ലീപ്പറിന്‌ അതിലുംകൂടുതൽ സ്വീകാര്യത ലഭിക്കുമെന്നാണ് വിലയിരുത്തൽ.

നിലവിൽ മംഗളുരു-തിരുവനന്തപുരം റൂട്ടിൽ മൂന്നു രാത്രിവണ്ടികൾ മാത്രമാണ് ഓടുന്നത്. മാവേലി, മലബാർ, തിരുവനന്തപുരം എക്സ്‌പ്രസ് (16348) എന്നിവ. മൂന്നു വണ്ടികളിലും എന്നും റിസർവേഷൻ വെയിറ്റിങ്ങിലാണ്. ഉത്സവസീസണിൽ ഒരു മാസംമുമ്പ് ബർത്ത് നിറയും. മലബാർ എക്സ്‌പ്രസ് വൈകീട്ട് 6.15-ന് മംഗളൂരു വിട്ടാൽ രാത്രി തിരുവനന്തപുരത്തേക്ക് വണ്ടിയില്ല. ശേഷം വന്ദേസ്ലീപ്പർ ഓടിച്ചാൽ റൂട്ടിൽ മറ്റു ഗതാഗത തടസ്സങ്ങളുണ്ടാകില്ലെന്നാണ്‌ അഭിപ്രായം. ജനറൽ കോച്ചുമാത്രമുള്ള തിരുവനന്തപുരം-മംഗളൂരു അന്ത്യോദയ തീവണ്ടി ആഴ്ചയിൽ രണ്ടുദിവസം മാത്രമാണ്‌ സർവീസ്‌ നടത്തുന്നത്‌.

16 കോച്ചിലായി 823 ബർത്ത്‌

ഭാരത് എർത്ത് മൂവേഴ്‌സ് ലിമിറ്റഡ് (ബി.ഇ.എം.എൽ.) രൂപകല്പനചെയ്ത വണ്ടിയിൽ 16 കോച്ചിലായി 823 ബർത്ത്‌ ഉണ്ട്. മുഴുവൻ ശീതീകരിച്ച കോച്ചുകളാണ്. ഇടത്തരക്കാർക്ക് താങ്ങാനാവുന്ന യാത്രാനിരക്കായിരിക്കുമെന്ന് റെയിൽവേ വ്യക്തമാക്കിയിരുന്നു.

കണ്ണൂർ:മലബാർ കാൻസർ കെയർ സൊസൈറ്റിയും തിരുവനന്തപുരം റീജനൽ കാൻസർ സെന്ററും ചേർന്ന് നടത്തുന്ന കാൻസർ ഫോളോ അപ് ക്ലിനിക് 28-ന് രാവിലെ 9 മുതൽ കണ്ണൂർ ഏർലി കാൻസർ ഡിറ്റക്‌ഷൻ സെന്ററിൽ നടത്തും.ആർ.സി.സിയിലെ ഡോ. എ.എൽ ലിജീഷ്, ഡോ. അശ്വിൻ കുമാർ എന്നിവർ നേതൃത്വം നൽകും.ആർ.സി. സിയിൽ ചികിത്സ പൂർത്തിയാക്കി പുന:പരിശോധന നിർദേശിച്ചവർക്കും പരിശോധന ആവശ്യമുള്ളവർക്കും ഫോളോ അപ് ക്ലിനിക്കിൽ പങ്കെടുക്കാം.കണ്ണൂർ, കോഴിക്കോട്, വയനാട്, കാസർകോട് ജില്ലകളിൽ നിന്നുള്ള പങ്കെടുക്കാൻ ആഗ്രഹിക്കുന്നവർ 25-ന് വൈകിട്ട് 4 മണിക്ക് മുൻപ് റജിസ്റ്റർ ചെയ്യണം. ഫോൺ: 0497 2705309, 0497-2703309.

പരിയാരം:കണ്ണൂർ ഗവണ്മെൻ്റ് ആയുർവേദ കോളേജിൽ സ്ത്രീകളുടെയും കുട്ടികളുടെയും ആശുപത്രിയിൽ ദിവസ വേതന അടിസ്ഥാനത്തിൽ ഡ്രൈവറെ നിയമനത്തിന് അപേക്ഷ ക്ഷണിച്ചു.എസ്.എസ്.എൽ.സി വിജയം, എച്ച്.ഡി.വി ലൈസൻസ്, അഞ്ച് വർഷത്തിൽ കുറയാത്ത പ്രവൃത്തി പരിചയം എന്നിവ അഭികാമ്യം.ആംബുലൻസ്, ബസ് എന്നിവ ഓടിക്കുന്നതിന് പ്രാവീണ്യം വേണം. പ്രായം 50 കവിയരുത്. അഭിമുഖം 23-ന് പകൽ 11-ന് ആസ്പത്രി സൂപ്രണ്ട് ഓഫീസിൽ.