പേരാവൂർ: മാലൂരിൽ നിന്ന് വഴി തെറ്റി പേരാവൂരിനു സമീപം പെരുമ്പുന്നയിലെത്തിയ വയോധികയെ പോലീസിന്റെ ഇടപെടലിലൂടെ വീട്ടിൽ തിരികെയെത്തിച്ചു. മാലൂർ അരിങ്ങോട്ട് വയൽ സ്വദേശിനി അരയാലിൻ കീഴിൽ നാണിയെയാണ് (75) പേരാവൂർ പോലീസ് ജീപ്പിൽ വീട്ടിലെത്തിച്ചത്. വെള്ളിയാഴ്ച ഉച്ചയോടെയാണ് നാണി പെരുമ്പുന്നയിലെ പുത്തൻപുരയിൽ ഡെയ്‌സിയുടെ വീട്ടിൽ വഴി തെറ്റിയെത്തിയത്. സംഭവ സമയത്ത് ഡെയ്‌സിയും കുടുംബവും വീട്ടിലുണ്ടായിരുന്നില്ല.

വീട്ടുമുറ്റത്തിരിക്കുന്ന വയോധികയെ അയൽവാസികൾ കാണുകയും വിവരങ്ങൾ അന്വേഷിച്ചപ്പോൾ പരസ്പര ബന്ധമില്ലാതെ സംസാരിക്കുകയുമായിരുന്നു. സമീപവാസികൾ വാർഡ് മെമ്പർ വി.എം. രഞ്ജുഷയെ വിവരമറിയിച്ചു. സ്ഥലത്തെത്തിയ രഞ്ചുഷ പേരാവൂർ പോലീസിനെ വിളിച്ചുവരുത്തി വയോധികയോട് സംസാരിച്ചെങ്കിലും വ്യക്തമായ മറുപടി ലഭിച്ചില്ല.

പോലീസിന്റെ ചോദ്യങ്ങൾക്ക് മറുപടി പറയുന്ന കൂട്ടത്തിൽ മാലൂർ എന്ന് പറഞ്ഞതോടെ വയോധികയുടെ ചിത്രം പകർത്തി മാലൂർ പോലീസിന് കൈമാറി. തുടർന്ന് നടത്തിയ അന്വേഷണത്തിലാണ് മാലൂർ അരിങ്ങോട്ടുവയൽ സ്വദേശിയാണെന്ന് മനസിലായത്. ഓർമ്മക്കുറവുള്ള ഇവർ എങ്ങനെയാണ് ഇവിടെ എത്തിയതെന്നറിയില്ല. ഒടുവിൽ പേരാവൂർ ഇൻസ്‌പെക്ടർ എം.ജി. ശ്യാമിന്റെ നേതൃത്വത്തിൽ അസി.സബ് ഇൻസ്‌പെക്ടർ ഇ.എച്ച്. മുഹമ്മദ് റഷീദ്, സീനിയർ സി.പി.ഒ.മാരായ കെ.ടി. ലിഷ, ടി. പ്രവീൺ എന്നിവർ നാണിയെ മാലൂരിലെ വീട്ടിൽ തിരികെയെത്തിക്കുകയായിരുന്നു.

പേരാവൂർ: കുനിത്തല ഗവ.എൽ.പി സ്‌കൂളിൽ വ്യത്യസ്തമായ ഉച്ചഭക്ഷണ പദ്ധതിയുമായി അധ്യാപക-രക്ഷാകർതൃ സമിതി. എല്ലാ ബുധനാഴ്ചയും ഇനി പി.ടി.എയുടെ വക കുട്ടികൾക്ക് വിഭവസമൃദ്ധമായ ഉച്ചഭക്ഷണം ലഭ്യമാക്കും. ‘മൊഞ്ചുള്ള ലഞ്ച്’ എന്ന പദ്ധതി ബഷീർ ദിനത്തിൽ പേരാവൂർ പഞ്ചായത്ത് പ്രസിഡന്റ് പി.പി. വേണുഗോപാലൻ ഉദ്ഘാടനം ചെയ്തു. വാർഡംഗം സി. യമുന അധ്യക്ഷത വഹിച്ചു.

പ്രഥമാധ്യാപിക കുമാരി, പി.ടി.എ പ്രസിഡന്റ് പി.വി. ജയേഷ്, വൈസ് പ്രസിഡന്റ് സി. സനീഷ്, മദർ പി.ടി. എ. പ്രസിഡന്റ് ശ്രീഷ ശ്രീജിത്ത്, മദർ പി.ടി.എ. വൈസ് പ്രസിഡന്റ് ശ്രുതി റെജിൻ, കെ.കെ. വിശ്വനാഥൻ, പി. പുരുഷോത്തമൻ എന്നിവർ സംസാരിച്ചു.

പേരാവൂർ : കണ്ണൂർ ജില്ലാ ചെസ്സ് ഓർഗനൈസിങ് കമ്മിറ്റി സംഘടിപ്പിക്കുന്ന ജില്ലാ സീനിയർ ഓപ്പൺ സെലക്ഷൻ ചെസ്സ് ചാമ്പ്യൻഷിപ്പ് ജൂലൈ ഏഴ് (ഞായറാഴ്ച) രാവിലെ 10 മുതൽ പേരാവൂർ റോബിൻസ് ഓഡിറ്റോറിയത്തിൽ നടക്കും. ജില്ലാ നിവാസികളായ എല്ലാവർക്കും പ്രായഭേദമന്യേ പങ്കെടുക്കാം. ആദ്യ നാല് സ്ഥാനം നേടുന്നവർ സംസ്ഥാന ചാമ്പ്യൻഷിപ്പിലേക്ക് യോഗ്യത നേടും. വിശദവിവരങ്ങൾക്ക് ഫോൺ : 9846879986, 9400712673, 9388775570.