തലശ്ശേരി, തളിപറമ്പ റവന്യൂ ഡിവിഷണല്‍ ഓഫീസുകളില്‍ ടെക്‌നിക്കല്‍ അസിസ്റ്റന്റ് തസ്തികയില്‍ കരാര്‍ വ്യവസ്ഥയില്‍ ഒരു വര്‍ഷകാലയളവിലേക്ക് ഉദ്യോഗാര്‍ഥികളെ നിയമിക്കുന്നു. പ്രായം: 18-35.
അംഗീകൃത സര്‍വകലാശാല ബിരുദം, വേര്‍ഡ് പ്രോസസിങ്ങില്‍ സര്‍ക്കാര്‍ അംഗീകൃത കമ്പ്യൂട്ടര്‍ കോഴ്‌സ്, മലയാളം, ഇംഗ്ലീഷ് ടൈപ്പ് റൈറ്റിങ്്, എം.എസ് ഡബ്ല്യു യോഗ്യതയുള്ളവര്‍ക്ക് മുന്‍ഗണന, മുതിര്‍ന്ന പൗരന്മാരുടെ സംരക്ഷണ മേഖലയിലുള്ള പ്രവൃത്തി പരിചയം അികാമ്യം. ഇന്റര്‍വ്യൂവും സര്‍ട്ടിഫിക്കറ്റ് പരിശോധനയും ജൂലൈ 10ന് രാവിലെ 10 മണിക്ക് ജില്ലാ സാമൂഹ്യ നീതി ഓഫീസറുടെ കാര്യാലയത്തില്‍ നടക്കും. മലയാളം ടൈപ്പിങ് പ്രായോഗിക പരിശോധനയും ഉണ്ടാകും. തുടര്‍ന്ന് അസിസ്റ്റന്റ് കലക്ടറുടെ ചേമ്പറില്‍ നടക്കുന്ന വാക് ഇന്‍ ഇന്റര്‍വ്യൂവിന് തിരിച്ചറിയല്‍ രേഖ, ആധാര്‍, പാസ് പോര്‍ട്ട് സൈസ് ഫോട്ടോ, വയസ്, വിദ്യാഭ്യാസ യോഗ്യത എന്നിവ തെളിയിക്കുന്ന സര്‍ട്ടിഫിക്കറ്റുകളുടെ അസ്സലും പകര്‍പ്പുമായി നേരിട്ട് ഹാജരാകണം.

തലശേരി: സംസ്ഥാന ചെസ്സ് ടെക്‌നിക്കൽ കമ്മിറ്റിയും ജില്ലാ ഓർഗനൈസിംഗ് ചെസ്സ് കമ്മിറ്റിയും സംഘടിപ്പിച്ച ജില്ലാഅണ്ടർ 19 ഗേൾസ് ചെസ്സിൽ നജ ഫാത്തിമ ജേതാവായി. ഇസബെൽ ജുവാന കാതറിൻ (പയ്യന്നൂർ), പി.പി. ശിവപ്രിയ (ചെറുകുന്ന്), പി. കീർത്തിക (ഏഴോം) എന്നിവർ യഥാക്രമം രണ്ട് മുതൽ നാല് വരെ സ്ഥാനങ്ങൾ നേടി.

തലശ്ശേരി എഞ്ചിനീയറിംഗ് കോളേജിൽ പ്രിൻസിപ്പൽ ഡോ. പി. രാജീവ് മത്സരം ഉദ്ഘാടനം ചെയ്തു. ഓർഗനൈസിംഗ് കമ്മിറ്റി കൺവീനർ വി.യു. സെബാസ്റ്റ്യൻ അധ്യക്ഷത വഹിച്ചു. എ.പി. സുജീഷ് , ഡോ. ഉസ്മാൻ കോയ, സുഗുണേഷ് ബാബു, എം. സജീവൻ എന്നിവർ സംസാരിച്ചു. ആദ്യ നാല് സ്ഥാനക്കാർക്ക് സംസ്ഥാന ചാമ്പ്യൻഷിപ്പിൽ മത്സരിക്കാം.

തലശ്ശേരി : പുതിയ ബസ്‌ സ്റ്റാൻഡിൽ ട്രാഫിക് ക്രമീകരണം ഏർപ്പെടുത്താൻ നഗരസഭാ ചെയർപേഴ്സൺ കെ.എം. ജമുനാറാണിയുടെ അധ്യക്ഷതയിൽ നടന്ന ട്രാഫിക് റെഗുലേറ്ററി കമ്മിറ്റി യോഗം തീരുമാനിച്ചു. കോഴിക്കോട് ഭാഗത്തുനിന്ന്‌ വരുന്ന ദീർഘദൂര ബസുകൾ ലോഗൻസ് റോഡ് വഴി-മണവാട്ടി കവലയിലൂടെ സ്റ്റാൻഡിനകത്ത് പ്രവേശിക്കാതെ പഴയ ട്രാഫിക് ഐലൻഡിനു സമീപം നിർത്തി ആളുകളെ കയറ്റിയശേഷം ഓട്ടോ സ്റ്റാൻഡിന്‌ സമീപത്തുകൂടി ഒ.വി. റോഡിലൂടെ പോകണം. കണ്ണൂരിലേക്ക് പോകുന്ന ഓർഡിനറി ബസുകൾ നിലവിലുള്ളതുപോലെ സ്റ്റാൻഡിൽനിന്ന്‌ ആളുകളെ കയറ്റി തിരുവങ്ങാട് വില്ലേജ് ഓഫീസിന്‌ മുൻവശത്തുകൂടി പുറത്തേക്ക്‌ പോകണം.

മമ്പറം -അഞ്ചരക്കണ്ടി-അണ്ടലൂർ ബസുകൾ ലോഗൻസ് റോഡ്- മണവാട്ടി കവല വഴി പച്ചക്കറി സ്റ്റാൻഡിനടുത്തുള്ള സിറ്റി ബസ്‌സ്റ്റാൻഡിൽ പ്രവേശിക്കണം.ഈ ബസുകൾ എൻ.സി.സി റോഡ് വഴി സ്റ്റാൻഡിൽ കയറരുത്. പച്ചക്കറി സ്റ്റാൻഡിനടുത്ത് ബസുകൾക്കും പൊതുജനങ്ങൾക്കും ബുദ്ധിമുട്ടുണ്ടാക്കുന്ന രീതിയിലുള്ള പഴം-പച്ചക്കറി കച്ചവടം നിയന്ത്രിക്കും. കോഴിക്കോട് ഭാഗത്തേക്ക്‌ പോകുന്ന ദീർഘദൂര ബസുകൾക്കുവേണ്ടി വടകര ബസ് ലോബിക്ക് സമീപം ഒരു പുതിയ ബസ് ലോബി നിർമിക്കും. എൻ.സി.സി. റോഡിൽനിന്ന്‌ ബസ്‌സ്റ്റാൻഡിൽ കയറുന്ന ഭാഗത്ത് ബസുകളുടെ വേഗം നിയന്ത്രിക്കാൻ സ്പീഡ് ബ്രേക്കർ സ്‌ഥാപിക്കും. ബസ് സ്റ്റാൻഡിൽ വാഹനങ്ങളുടെ ടയർ മാറ്റുന്നതുൾപ്പെടെ അറ്റകുറ്റപ്പണി നടത്താൻ പാടില്ല. കടൽപ്പാലത്തിനുസമീപം വൈകിട്ട് മൂന്ന് മുതൽ പുലർച്ചെ മൂന്ന് വരെ വാഹനഗതാഗതം നിരോധിക്കാൻ യോഗം ശുപാർശചെയ്തു. പഴയ ബസ്‌സ്റ്റാൻഡിലെ പാർക്കിങ് ഏരിയ ക്രമപ്പെടുത്തും.