ബെംഗളൂരു: ബനാർഗട്ടയിലുണ്ടായ ബൈക്കപകടത്തിൽ പരിക്കേറ്റ തോലമ്പ്ര സ്വദേശിയും മരിച്ചു.
തോലമ്പ്ര തൃക്കടാരിപ്പൊയിൽ നാരായണീയത്തിൽ റിഷ്ണു ശശീന്ദ്രനാണ് (23) മരിച്ചത്. റിഷ്ണുവിന്റെ സുഹൃത്ത് പെരുന്തോടിയിലെ കെ.എസ്.മുഹമ്മദ് സഹദും (20) അപകടത്തിൽ മരിച്ചിരുന്നു.തൃക്കടാരിപ്പൊയിൽ നാരായണീയത്തിൽ പരേതനായ ശശീന്ദ്രൻ്റെയും ഷാജി ശശീന്ദ്രന്റെയും മകനാണ് റിഷ്ണു.സഹോദരങ്ങൾ : അജന്യ, വിഷ്ണു.പെരുന്തോടി അത്തൂരിലെ കല്ലംപറമ്പിൽ ഷംസുദ്ധീൻ്റെയും ഹസീനയുടെയും മകനാണ് സഹദ്.സഹോദരൻ : പരേതനായ യസീദ്.

ഉരുവച്ചാൽ :മാലിന്യമുക്തം നവകേരളം ജനകീയ ക്യാമ്പയിന്റെ ഭാഗമായി മാലൂർ പഞ്ചായത്തിലെ “പാലുകാച്ചിപ്പാറ” വിനോദസഞ്ചാര കേന്ദ്രം ഹരിത-ശുചിത്വമാക്കുന്നതിനായി അവലോകനയോഗം ചേർന്നു.മാലൂർ ഗ്രാമ പഞ്ചായത്ത് പ്രസിഡന്റ് വി. ഹൈമാവതിയുടെ അധ്യക്ഷതയിൽ നടന്ന യോഗത്തിൽ വാർഡ് മെമ്പർ ടി.പി സിറാജ് മാസ്റ്റർ സ്വാഗതം പറഞ്ഞു. ഹരിതകേരളം മിഷൻ ജില്ലാ കോർഡിനേറ്റർ ഇ. കെ സോമശേഖരൻ പദ്ധതി വിശദീകരിച്ചു. പാലുകാച്ചിപ്പാറയിൽ എത്തുന്ന വിനോദ സഞ്ചാരികൾ ഉൽപാദിപ്പിക്കാൻ സാധ്യതയുള്ള അജൈവ മാലിന്യങ്ങൾ ശേഖരിക്കാൻ ബിന്നുകൾ, ജൈവ മാലിന്യങ്ങൾ സംസ്ക്കരിക്കാൻ “തുമ്പൂർമുഴി”, ബോട്ടിൽ ബൂത്തുകൾ ഉൾപ്പെടെ സ്ഥാപിക്കും. കൂടാതെ ബോധവൽക്കരണ-സൂചന ബോർഡുകൾ ഉൾപ്പെടെ സ്ഥാപിക്കും. ജനകീയ ശുചീകരണം നടത്തും. പാലുകാച്ചിപ്പാറ വിനോദസഞ്ചാരകേന്ദ്രം സംരക്ഷിക്കുന്നതിനായി ജനകീയ സംരക്ഷണ സമിതിയും രൂപീകരിച്ചു. നവംബർ പകുതിയോടെ “ഹരിതടൂറിസംകേന്ദ്രം” ആയി പ്രഖ്യാപനം നടത്തും. സ്ഥിര സമിതി അധ്യക്ഷരായ കൊയിലോടൻ രമേശൻ, രേഷ്മ സജീവൻ, പഞ്ചായത്ത് അംഗങ്ങളായ പലയത്ത് ചന്ദ്രമതി, എൻ. സഹദേവൻ, കെ. ഗോപി, എ.ആർ ഭവദാസ്,കെ പ്രമോദ് തുടങ്ങിയവർ സംസാരിച്ചു.

മാലൂർ : ചെള്ളുപനി ബാധിച്ച് മധ്യവയസ്ക്കൻ മരിച്ചു. മാലൂർ പഞ്ചായത്തിലെ പുരളിമല കോളനിയിലെ കായലോടൻ കുമാരൻ(50)ആണ് മരിച്ചത്. ഒരു മാസം മുമ്പ് പനി ബാധിച്ച് രോഗം ഭേദപ്പെട്ട കുമാരന് ഒരാഴ്ച്ച മുമ്പാണ് വീണ്ടും പനി വന്നത്. തുടർന്നുള്ള പരിശോധനയിൽ ചെള്ളുപനിയാണെന്ന് വ്യക്തമായതോടെ കണ്ണൂർ ഗവ.മെഡിക്കൽ കോളേജിലേക്ക് മാറ്റുകയായിരുന്നു. അന്നുമുതൽ തന്നെ വെന്റിലേറ്ററിൽ കഴിയുകയായിരുന്ന കുമാരൻ ഇന്നലെ രാത്രിയോടെയാണ് മരിച്ചത്. ഭാര്യ. എൻ.കെ.ഗീത. മക്കൾ: അതുൽകുമാർ, ആദർശ്,അഞ്ജിമ, സഹോദരങ്ങൾ: തങ്ക, ഗിരീഷ്, വിനീഷ്.