‘അന്നും ഇന്നും എന്നും കോൺഗ്രസ് പ്രവർത്തക’; അഗളി പഞ്ചായത്ത് പ്രസിഡന്റ് സ്ഥാനം രാജിവെച്ച് മഞ്ജു, LDFന് തിരിച്ചടി
പാലക്കാട്: അട്ടപ്പാടിയില് വീണ്ടും എല്ഡിഎഫിന് തിരിച്ചടി. അഗളി പഞ്ചായത്ത് പ്രസിഡന്റ് സ്ഥാനം മഞ്ജു രാജിവെച്ചു. അഗളി പഞ്ചായത്തില് യുഡിഎഫ് അംഗമായി വിജയിച്ച മഞ്ജു എല്ഡിഎഫ് പഞ്ചായത്ത് അധ്യക്ഷ സ്ഥാനാര്ത്ഥിയായി മത്സരിച്ച് വിജയിക്കുകയായിരുന്നു.വന് പ്രതിഷേധമാണ് മഞ്ജുവിനെതിരെ അഗളിയില് ഉയര്ന്നത്. സിറോ മലബാര് സഭ വൈദികന് ഉള്പ്പെടെ മഞ്ജുവിനെതിരെ രംഗത്തെത്തിയിരുന്നു. മഞ്ജുവിനെതിരെ ശക്തമായ നടപടിയിലേക്ക് കോണ്ഗ്രസ് കടക്കാന് ഇരിക്കവെയാണ് നടപടി. ഇന്ന് വൈകുന്നേരം വരെ മഞ്ജുവിന് തിരുത്താന് സമയം നല്കുമെന്ന് പാലക്കാട് ഡിസിസി അധ്യക്ഷന് എ തങ്കപ്പന് അറിയിച്ചിരുന്നു.
അഗളി പഞ്ചായത്തിലെ 20-ാം വാര്ഡായ ചിന്നപറമ്പില് നിന്നുള്ള യുഡിഎഫ് അംഗമായ മഞ്ജു കൂറുമാറിയത് വലിയ വിവാദമായിരുന്നു. തനിക്ക് പാര്ട്ടിയുടെ വിപ്പ് കിട്ടിയില്ല എന്നായിരുന്നു സംഭവത്തില് മഞ്ജുവിന്റെ പ്രതികരണം.
സംഭവത്തിന് പിന്നാലെ മഞ്ജുവിനെ അയോഗ്യയാക്കണമെന്ന് ആവശ്യപ്പെട്ട് കോണ്ഗ്രസ് തെരഞ്ഞെടുപ്പ് കമ്മീഷനെ സമീപിച്ചിരുന്നു. മഞ്ജുവിനെതിരെ നിയമപോരാട്ടം നടത്താനാണ് കോണ്ഗ്രസിന്റെ തീരുമാനം. കൂറുമാറ്റ നിരോധന നിയമപ്രകാരം മഞ്ജുവിനെതിരെ നടപടി ആവശ്യപ്പെട്ട് ഹൈക്കോടതിയെ സമീപിക്കുമെന്ന് കോണ്ഗ്രസ് അറിയിച്ചിരുന്നു.
