തദ്ദേശ സ്വയം ഭരണ തെരഞ്ഞെടുപ്പ് ഡിസംബര്‍ ഒന്‍പത്,11 തീയതികളില്‍; വോട്ടെണ്ണല്‍ 13ന്
തിരുവനന്തപുരം: സംസ്ഥാനത്തെ 1199 തദ്ദേശ സ്വയം ഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് രണ്ടുഘട്ടങ്ങളിലായി നടക്കും. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളില്‍ ഡിസംബര്‍ ഒന്‍പതിന് ചൊവ്വാഴ്ചയും തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ ഡിസംബര്‍ 11നു വ്യാഴാഴ്ചയുമാണ് തെരഞ്ഞടുപ്പ്. ഭരണസമിതിയുടെ കാലാവധി പൂര്‍ത്തിയാവാത്തതിനാല്‍ മട്ടന്നൂര്‍ നഗരസഭയിലേക്കുള്ള തെരഞ്ഞെടുപ്പ് പിന്നീട് നടക്കും. രാവിലെ 7 മുതല്‍ വൈകിട്ട് 6 വരെയാണ് വോട്ടെടുപ്പ്. മാതൃകാ പെരുമാറ്റചട്ടം നിലവില്‍ വന്നതായി സംസ്ഥാന തെരഞ്ഞെടുപ്പ് കമ്മിഷണര്‍ വാര്‍ത്താസമ്മേളനത്തില്‍ അറിയിച്ചു. വോട്ടെണ്ണല്‍ ഡിസംബര്‍ 13നു നടക്കും.
