ട്രൂകോളർ കുറച്ച് റെസ്റ്റെടുക്കൂ! കോളർ ഐഡി സംവിധാനത്തിന് ട്രായ് അനുമതി
ന്യൂഡൽഹി: ട്രൂകോളർ പോലുള്ള തേർഡ് പാർട്ടി ആപ്പുകളെ ആശ്രയിക്കാത്ത കോളർ ഐഡിയുടെ ഔദ്യോഗിക പതിപ്പ് പുറത്തിറക്കാനൊരുങ്ങി ഇന്ത്യ. സ്വീകർത്താവിന്റെ ഫോൺ സ്‌ക്രീനിൽ വിളിക്കുന്നയാളുടെ പേര് പ്രദർശിപ്പിക്കുന്നതാണ് പുതിയ സംവിധാനം. ടെലികമ്മ്യൂണിക്കേഷൻ വകുപ്പിന്റെ (DoT) ഈ നിർദ്ദേശത്തിന് ടെലികോം റെഗുലേറ്ററി അതോറിറ്റി ഓഫ് ഇന്ത്യ (TRAI) അംഗീകാരം നൽകി. കോളിംഗ് നെയിം പ്രസന്റേഷൻ (CNAP) എന്നറിയപ്പെടുന്ന ഈ സേവനം എല്ലാ ഉപഭോക്താക്കൾക്കും ലഭ്യമാക്കാനാണ് തീരുമാനം. ഈ സംവിധാനം നിലവിൽ വരുന്നതോടെ ഒരു ഫോൺകോൾ വന്നാൽ വിളിക്കുന്നയാളുടെ പേര് സ്വീകർത്താവിന്റെ ഫോൺസ്ക്രീനിൽ തെളിയും. സിം എടുക്കാനുപയോഗിക്കുന്ന തിരിച്ചറിയൽ കാർഡ് ഉടമയുടെ പേരാകും ഇത്തരത്തിൽ കാണിക്കുക. ടെലിക്കോം കമ്പനികളുടെ ഔദ്യോഗിക ഡാറ്റാബേസ് ഇതിനായി പ്രയോജനപ്പെടുത്തും. സർക്കാർ പിന്തുണയുള്ള ഒരു കോളർ ഐഡി സംവിധാനമായാകും ഇത് പ്രവർത്തിക്കുക. രാജ്യത്തെ എല്ലാ ഉപഭോക്താക്കളിലും ഈ സംവിധാനം ഉപയോഗത്തിൽ വരും. ഫീച്ചർ ആവശ്യമില്ലാത്തവർ ടെലികോം സേവന ദാതാക്കളെ അറിയിക്കണം.
