ചിറ്റാരിപ്പറമ്പ് ഓട്ടോ സ്റ്റാൻഡിലേക്ക് കാർ ഇടിച്ചു കയറി മൂന്ന് ഓട്ടോ ഡ്രൈവർമാർക്ക് പരിക്ക്
ചിറ്റാരിപ്പറമ്പ്: ടൗണിലെ ഓട്ടോ സ്റ്റാന്റിലേക്ക് കാർ ഇടിച്ച് കയറി മൂന്ന് ഓട്ടോ ഡ്രൈവർമാർക്ക് പരിക്ക്. പരിക്കേറ്റ എ.കെ. ഷഹീർ (45), ഇ.കെ. നിസാർ (49), വി. പ്രജീഷ് (44) എന്നിവരെ തലശ്ശേരി സഹകരണ ആസ്പത്രിയിൽ പ്രവേശിപ്പിച്ചു. ചൊവ്വാഴ്ച രാത്രി എട്ടിനാണ് സംഭവം. അപകടത്തിൽ മൂന്ന് ഓട്ടോ റിക്ഷകൾക്കും ഒരു ജീപ്പിനും കേടുപാടുകളുണ്ടായി. കണ്ണവം ഭാഗത്ത് നിന്ന് വന്ന കർണ്ണാടക റജിട്രേഷൻ കാറാണ് സ്റ്റാന്റിൽ മുന്നിൽ ഉണ്ടായിരുന്ന ഓട്ടോയിൽ ഇടിച്ചത്. ഇടിയുടെ ആഘാതത്തിൽ മുന്നിലെ ഓട്ടോയുടെ മുൻഭാഗം പൂർണ്ണമായും തകർന്നു. ഇടി കൊണ്ട ഓട്ടോ പിന്നോട്ട് നീങ്ങി രണ്ട് ഓട്ടോയിലും സമീപത്ത് നിർത്തിയിട്ട ജീപ്പിലും ഇടിക്കുകയായിരുന്നു. സ്ത്രീകളും കുട്ടികളും ഉൾപ്പെടെയുള്ളവരായിരുന്നു കാർ യാത്രക്കാർ. ഉറങ്ങി പോയതാണന്ന് കാർ ഡ്രൈവർ പറഞ്ഞു. കണ്ണവം പോലീസ് സ്ഥലത്തെത്തി വാഹനം സ്റ്റേഷനിലേക്ക് മാറ്റി.
