ഓണം സ്പെഷ്യല്‍ ട്രെയിനുകൾക്ക് ചെറുവത്തൂരിലും മഞ്ചേശ്വരത്തും അധിക സ്റ്റോപ്പ്
ചെറുവത്തൂർ: ഓണക്കാലത്ത് യാത്രക്കാരുടെ വർധിച്ച തിരക്ക് കണക്കിലെടുത്ത്, രണ്ട് സ്പെഷ്യല്‍ ട്രെയിനുകള്‍ക്ക് മഞ്ചേശ്വരം, ചെറുവത്തൂർ സ്റ്റേഷനുകളില്‍ അധിക സ്റ്റോപ്പ് അനുവദിച്ചു. മംഗളൂരു ജംഗ്ഷൻ – തിരുവനന്തപുരം നോർത്ത് ദ്വൈവാര എക്സ്പ്രസ് സ്പെഷ്യല്‍ ട്രെയിൻ നമ്പർ 06041/06042-നാണ് ഈ പുതിയ സ്റ്റോപ്പുകള്‍. പാലക്കാട് റെയില്‍വേ ഡിവിഷൻ ആണ് ഇക്കാര്യം അറിയിച്ചത്. ഈ മാറ്റം ഓഗസ്റ്റ് 21-ന് പ്രാബല്യത്തില്‍ വരുമെന്നും റെയില്‍വേ വ്യക്തമാക്കി.
പുതിയ സമയക്രമം
ട്രെയ്ൻ നമ്പർ 06041 മംഗളൂരു ജംഗ്ഷൻ – തിരുവനന്തപുരം നോർത്ത് എക്സ്പ്രസ് സ്പെഷ്യല്‍ ട്രെയിൻ എല്ലാ വ്യാഴാഴ്ചകളിലും, ശനിയാഴ്ചകളിലും രാത്രി 7:30-ന് മംഗളൂരു ജംഗ്ഷനില്‍നിന്ന് യാത്ര പുറപ്പെടും. ഈ ട്രെയ്ൻ രാത്രി 7:52-ന് മഞ്ചേശ്വരത്ത് എത്തിച്ചേർന്ന്, ഒരു മിനിറ്റ് നിർത്തിയ ശേഷം 7:53-ന് യാത്ര തുടരും. തുടർന്ന് ചെറുവത്തൂർ സ്റ്റേഷനില്‍ രാത്രി 8:54-ന് എത്തി, 8:55-ന് പുറപ്പെടും. മറുവശത്ത്, ട്രെയിൻ നമ്പർ 06042 തിരുവനന്തപുരം നോർത്ത് – മംഗളൂരു ജംഗ്ഷൻ എക്സ്പ്രസ് സ്പെഷ്യല്‍ ട്രെയിൻ എല്ലാ ശനിയാഴ്ചകളിലും തിങ്കളാഴ്ചകളിലുമായി രാവിലെ 6:30-ന് മംഗളൂരു ജംഗ്ഷനില്‍ എത്തിച്ചേരും.
ഈ ട്രെയിൻ തിരുവനന്തപുരം നോർത്തില്‍ നിന്ന് എല്ലാ വെള്ളിയാഴ്ചകളിലും ഞായറാഴ്ചകളിലുമായി വൈകുന്നേരം 5:15-നാണ് പുറപ്പെടുക. ഈ ട്രെയിൻ ചെറുവത്തൂരില്‍ പുലർച്ചെ 4:31-ന് എത്തി, 4:32-ന് പുറപ്പെടും. മഞ്ചേശ്വരത്ത് രാവിലെ 5:31-ന് എത്തി 5:32-ന് യാത്ര തുടരും. ഈ അധിക സ്റ്റോപ്പുകള്‍ അനുവദിച്ചെങ്കിലും തിരുർ മുതല്‍ തിരുവനന്തപുരം നോർത്ത് വരെയുള്ളതും, തിരുവനന്തപുരം നോർത്ത് മുതല്‍ കണ്ണൂർ വരെയുള്ളതുമായ സ്റ്റേഷനുകളിലെ സമയക്രമത്തില്‍ യാതൊരു മാറ്റവും വരുത്തിയിട്ടില്ലെന്ന് റെയില്‍വേ അറിയിച്ചു. ഓണത്തിന് നാട്ടിലേക്ക് പോകുന്ന യാത്രക്കാർക്ക് പുതിയ സ്റ്റോപ്പുകള്‍ ഏറെ സൗകര്യപ്രദമാകുമെന്നാണ് പ്രതീക്ഷ.
