പട്ടുവം വില്ലേജ് ഓഫീസ് കെട്ടിട നിര്‍മ്മാണത്തിനായി കണ്ണൂര്‍ രൂപത പത്ത് സെൻ്റ് ഭൂമി നൽകി
കണ്ണൂർ: പട്ടുവം വില്ലേജ് ഓഫീസിന്റെ കെട്ടിട നിര്‍മ്മാണത്തിനായി കണ്ണൂര്‍ രൂപത ദാനമായി നല്‍കുന്ന പത്ത് സെന്റ് വസ്തുവിന്റെ ആധാരം കണ്ണൂര്‍ രൂപത സഹായ മെത്രാന്‍ റവ: ഡോ. ഡെന്നീസ് കുറുപ്പശ്ശേരിയില്‍ നിന്നു കണ്ണൂര്‍ എഡിഎം കലാ ഭാസ്‌കര്‍ ഏറ്റുവാങ്ങി. ജില്ലക്ക് മുഴുവന്‍ പ്രയോജനകരമായ രീതിയില്‍ പൊതു നന്‍മയ്ക്കായുള്ള സഭയുടെ നിലപാട് മാതൃകാപരമാണെന്ന് എഡിഎം പറഞ്ഞു. കണ്ണൂര്‍ ബിഷപ്പ് ഹൗസില്‍ നടന്ന പരിപാടിയില്‍ ഫാ. ക്ലാരന്‍സ് പാലിയത്ത്, ഫാ. ജോര്‍ജ്ജ് പൈനാടത്ത്, ഫാദര്‍ വിപിന്‍ വില്ല്യം, ഫാ. സുദീപ് മുണ്ടയ്ക്കല്‍, മുന്‍ ആര്‍ഡിഒ ഇ പി മേഴ്‌സി, തളിപ്പറമ്പ തഹസില്‍ദാര്‍ പി സജീവന്‍, പട്ടുവം വില്ലേജ് ഓഫിസര്‍ റീജ സി, പട്ടുവം വില്ലേജ് അസിസ്റ്റന്റ് പി.വി വിനോദ് കുമാര്‍ എന്നിവര്‍ പങ്കെടുത്തു.
