സംഗീത സംവിധായകൻ ലാലോ ഷിഫ്രിൻ അന്തരിച്ചു; വിടപറഞ്ഞത് മിഷൻ ഇംപോസിബിളിന് തീം സോങ് ഒരുക്കിയ പ്രതിഭ
മിഷൻ ഇംപോസിബിൾ സിനിമയുടെ തീം സോങ് ചിട്ടപ്പെടുത്തിയ സംഗീതസംവിധായകൻ ലാലോ ഷിഫ്രിൻ(93) അന്തരിച്ചു. സിനിമയ്ക്കും ടെലിവിഷനും വേണ്ടി നൂറിലധികം സംഗീതം ചിട്ടപ്പെടുത്തിയ സംഗീതസംവിധായകനാണ് ലോകത്തോട് വിടപറഞ്ഞിരിക്കുന്നത്. വ്യാഴാഴ്ചയായിരുന്നു അന്ത്യം.ന്യുമോണിയ സംബന്ധമായ സങ്കീർണ്ണതകളെത്തുടർന്നായിരുന്നു അദ്ദേഹത്തിന്റെ മരണം എന്ന് മകൻ റയാൻ അറിയിച്ചു. ലോസ് ആഞ്ജലിസിലെ വീട്ടിൽ വെച്ചായിരുന്നു മരണമെന്നും ഈ സമയത്ത് അടുത്ത കുടുംബാംഗങ്ങൾ ഒപ്പമുണ്ടായിരുന്നുവെന്നും അദ്ദേഹം അറിയിച്ചു.നാല് ഗ്രാമി അവാർഡുകൾ സ്വന്തമാക്കിയ സംഗീത സംവിധായകനാണ് ലാലോ ഷിഫ്രിൻ. ആറ് ഓസ്കർ പുരസ്കാരങ്ങൾക്ക് നാമനിർദ്ദേശം ചെയ്യപ്പെടുകയും ചെയ്തിട്ടുണ്ട് ഇദ്ദേഹം. ഇതിൽ, “കൂൾ ഹാൻഡ് ലൂക്ക്,” “ദി ഫോക്സ്,” “വോയേജ് ഓഫ് ദ ഡാംഡ്,” “ദി അമിറ്റിവില്ലെ ഹൊറർ,” “ദി സ്റ്റിംഗ് II” എന്നീ ചിത്രങ്ങളുടെ ഒറിജിനൽ സ്കോറിനായിരുന്നു അദ്ദേഹം നാമനിർദേശം ചെയ്യപ്പെട്ടത്.
