തലശ്ശേരി: നൂറ്റാണ്ട് പഴക്കമുള്ള തലശ്ശേരി-മൈസൂർ റെയില്‍പാതയെന്ന സ്വപ്നത്തിന് തുരങ്കം വെക്കുന്ന തരത്തില്‍ തലശ്ശേരിയില്‍ റെയില്‍വേയുടെ കണ്ണായ ഇടത്തെ 2.63 ഏക്കർ സ്വകാര്യ സ്ഥാപനത്തിന് ലീസിന് നല്‍കാൻ ഗൂഢ നീക്കം. പാലക്കാട് റെയില്‍വേ ഡിവിഷൻ കേന്ദ്രീകരിച്ച്‌ 45 വർഷത്തേക്ക് ഈ സ്ഥലം ലീസിന് നല്‍കാനുള്ള നീക്കമാണ് നടക്കുന്നത്.തലശ്ശേരിയില്‍ റെയില്‍വേക്ക് 50 ഏക്കർ സ്ഥലമാണുള്ളത്. ഷോർണൂർ കഴിഞ്ഞാല്‍ മലബാറില്‍ റെയില്‍വേയ്ക്ക് ഏറ്റവും കൂടുതല്‍ സ്ഥലം ഇവിടെയാണ്. തലശ്ശേരി -മൈസൂരു റെയില്‍പാത യാഥാർത്ഥ്യമാകാനുള്ള നീക്കം നടക്കുമ്പോഴെല്ലാം ഇതില്ലാതാക്കാൻ ഇത്തരം ഗൂഢ നീക്കങ്ങള്‍ നടത്താറുള്ളതാണ്. ബ്രിട്ടീഷുകാർ തലശ്ശേരി -മൈസൂരു പാത വിഭാവനം ചെയ്തത് 1907ലാണ്.

ലോക മഹായുദ്ധം അടക്കമുള്ള കാരണങ്ങളാല്‍ ഇത് നടന്നില്ല. മൈസൂരിലേക്ക് 295 കി.മി ദൂരമുണ്ടെന്ന തരത്തില്‍ സർവേ നടത്തി ചിലവിന്റെ പേരില്‍ പദ്ധതി തള്ളാനുള്ള ശ്രമവും നടന്നിരുന്നു.ഇരിട്ടി ആസ്ഥാനമായി പ്രവർത്തിച്ചിരുന്ന ആക്ഷൻ കമ്മിറ്റി ജിയോളജിക്കല്‍ സർവ്വേ ഓഫ് ഇന്ത്യയുടെ സഹകരണത്തോടെ നടത്തിയ ജനകീയ സർവ്വേ പ്രകാരം തലശ്ശേരി, കൂത്തുപറമ്പ്, മട്ടന്നൂർ, ഇരിട്ടി, കുടകിലെ തിത്തിമത്തി, പൊന്നം പേട്ട്, ഹുൻസൂർ വഴി മൈസൂരിലേക്ക് വെറും 145.5 കി.മി ദൂരം മാത്രമേയുള്ളുവെന്ന കണ്ടെത്തല്‍ ഈ വാദത്തെ പൊളിച്ചു.പിന്നീട് മാനന്തവാടി വഴി മൈസൂരിലേക്ക് പാത പരിഗണിക്കണമെന്ന തരത്തില്‍ സംസ്ഥാന സർക്കാരില്‍ നിന്നുള്ള നിർദ്ദേശവും ഉയർന്നു വന്നു.

ഒരുങ്ങുന്നു ഒന്നര മണിക്കൂറില്‍ മൈസൂരു-ചെന്നൈ യാത്ര

ഒന്നര മണിക്കൂർ യാത്രയില്‍ മൈസൂരു-ചെന്നൈ അതിവേഗ പാത ഒരുങ്ങുമ്പോള്‍ തലശ്ശേരി മൈസൂരു ലൈനിന് ഏറെ പ്രാധാന്യമുണ്ട്. നിലവില്‍ തലശ്ശേരിയില്‍ നിന്ന് ചെന്നൈയിലേക്ക് 14 മണിക്കൂറാണ് ട്രെയിൻ യാത്ര. ജനകീയ സർവേ പ്രകാരം കണ്ടെത്തിയ ലൈനില്‍ പാത യാഥാർത്ഥ്യമായാല്‍ പരമാവധി രണ്ടര മണിക്കൂർ കൊണ്ട് മൈസൂരിലെത്താനാകും. അവിടെ നിന്ന് അതിവേഗ പാത വഴി ബംഗളൂരുവിലേക്കും ചെന്നൈയിലേക്കും അതിവേഗ പാതയും പ്രയോജനപ്പെടുത്താം.

മണ്ണിടിച്ചില്‍ മൂലം മഴക്കാലത്ത് ക്ലേശകരമാകുന്ന കൊങ്കണിനെ ആശ്രയിക്കാതെ ഉത്തരേന്ത്യയിലേക്ക് എളുപ്പത്തില്‍ ഏത്താമെന്ന സൗകര്യവും നിർദ്ദിഷ്ട മൈസൂരു-തലശ്ശേരി പാതയ്ക്കുണ്ട്.ഭാവിയില്‍ തലശ്ശേരിയെ റെയില്‍വേ ജംഗ്ഷനാക്കി മാറ്റിയെടുക്കാനുള്ള സാദ്ധ്യത മുന്നിലുള്ളപ്പോഴാണ് കണ്ണായ സ്ഥലം റെയില്‍വേ സ്വകാര്യ സ്ഥാപനത്തിന് പാട്ടത്തിന് നല്‍കുന്നത്. തലശ്ശേരിയിലെ ഒരു സെന്റ് സ്ഥലം പോലും റെയില്‍വേ കൈമാറരുത്. രണ്ടര ഏക്കറിലേറെ കണ്ണായ സ്ഥലം പോയാല്‍ പിന്നെ തലശ്ശേരി-മൈസൂർ റെയില്‍ പാത മാത്രമല്ല, തലശ്ശേരിയുടെ മുഴുവൻ റെയില്‍വേ വികസന സ്വപ്നങ്ങളും ഇല്ലാതാകും-കെ.വി.ഗോകുല്‍ ദാസ് (പ്രസിഡന്റ്, തലശ്ശേരി വികസന വേദി)

നേരത്തെയും ലീസിന് നല്‍കി

പുതിയ ബസ്സ് സ്റ്റാൻഡിനോട് ചേർന്നുളള ഫുട്ട് ഓവർ ബ്രിഡ്ജിന് താഴെ ഇടതു ഭാഗത്ത് സ്വകാര്യ വ്യക്തിക്ക് നല്‍കിയ ലീസിന്റെ കാലാവധി വർഷങ്ങള്‍ക്ക് മുമ്പേ കഴിഞ്ഞതാണ്. ഇവിടം മാലിന്യ നിക്ഷേപ കേന്ദ്രമാണിന്ന്. സ്റ്റേറ്റ് വേർ ഹൗസ്, സ്വകാര്യ പെട്രോള്‍ പമ്പ്, പഴയ തീവണ്ടിക്കുളം, പച്ചക്കറി മാർക്കറ്റ് പ്രദേശമെല്ലാം റെയില്‍വേ 40 വർഷത്തേക്ക് ലീസിന് നല്‍കിയതാണ്.

തലശേരി : ജില്ലാ ചെസ്സ് ഓർഗനൈസിങ് കമ്മിറ്റി സംഘടിപ്പിച്ച ജില്ലാ അണ്ടർ 11 ഓപ്പൺ ആൻഡ് ഗേൾസ് സെലക്ഷൻ ചെസ്സ് ചാമ്പ്യൻഷിപ്പിൽ ആദേശ് കൊമ്മേരി രജനീഷും പാർവതി രജിനും ജേതാക്കളായി. ഓപ്പൺ വിഭാഗത്തിൽ ശ്രീദർഷ് സുഷിൽ (കണ്ണൂർ ), കൃഷ്ണ.കെ. പൊതുവാൾ (പയ്യന്നൂർ), ആർ.റിഷിക് (ചിത്താരി,പയ്യന്നൂർ ) എന്നിവരും ഗേൾസ് വിഭാഗത്തിൽ സിയാ ലക്ഷ്മി (തളിപ്പറമ്പ), എസ്.പ്രകൃതി ,(രാമന്തളി, പയ്യന്നൂർ ), പാർവതി വിനോദ് എന്നിവരും രണ്ട് മുതൽ നാല് വരെ സ്ഥാനങ്ങൾ കരസ്ഥമാക്കി. ഇരു വിഭാഗങ്ങളിലും ആദ്യ രണ്ട് സ്ഥാനം നേടിയവർ സംസ്ഥാന ചാമ്പ്യൻഷിപ്പിൽ ജില്ലയെ പ്രതിനിധീകരിക്കും.

ബ്രണ്ണൻ കോളേജ് പ്രിൻസിപ്പാൾ ഇൻചാർജ് വിനോദ് നാവത്ത് ഉദ്ഘാടനം ചെയ്തു. ജില്ലാ ചെസ്സ്‌ ഓർഗനൈസിങ് കമ്മിറ്റി കൺവീനർ വി. യു. സെബാസ്റ്റ്യൻ അധ്യക്ഷനായി. എ. പി.സുജീഷ് , കെ.മഞ്ജുഷ എന്നിവർ സംസാരിച്ചു. ബ്രണ്ണൻ കോളേജ് ജൂനിയർ സൂപ്രണ്ട് സി. സി.രേഖ സമ്മാനദാനം നിർവഹിച്ചു.

തലശേരി: സംസ്ഥാനത്തെ സഹകരണ മേഖലയിലെ പ്രഥമ വനിതാ ഹോസ്‌റ്റൽ രജതജൂബിലി നിറവിൽ. തലശേരി കോ–-ഓപ്പറേറ്റീവ്‌ റൂറൽ ബാങ്ക്‌ വർക്കിങ്‌ വനിതാ ഹോസ്‌റ്റലാണ്‌ സേവനത്തിന്റെ 25 വർഷം പൂർത്തിയാക്കുന്നത്‌. രജതജൂബിലി ആഘോഷം വ്യാഴം പകൽ മൂന്നിനു റൂറൽ ബാങ്ക്‌ ഇ. നാരായണൻ ബാങ്ക്വറ്റ്‌ ഹാളിൽ റിട്ട. ജില്ലാ ജഡ്‌ജി ടി. ഇന്ദിര ഉദ്‌ഘാടനംചെയ്യും. കോ–-ഓപ്പറേറ്റീവ്‌ ടൗൺ ബാങ്കിന്റെ സുവർണജൂബിലി ആഘോഷത്തോടനുബന്ധിച്ചാണ്‌ വനിതാ ഹോസ്‌റ്റൽ നിർമിക്കാൻ അന്നത്തെ പ്രസിഡന്റ്‌ ഇ നാരായണന്റെ നേതൃത്വത്തിലുള്ള ഭരണസമിതി തീരുമാനിച്ചത്‌. 1996 നവംബർ മൂന്നിനു അന്നത്തെ വൈദ്യുതിമന്ത്രി പിണറായി വിജയൻ കല്ലിട്ടു. 2000 മാർച്ച്‌ 11ന്‌ സഹകരണ മന്ത്രി എസ്‌ ശർമ ഉദ്‌ഘാടനംചെയ്‌തു. സംസ്ഥാനത്തിന്റെ വിവിധ ഭാഗങ്ങളിൽനിന്ന്‌ ജോലിക്കും പഠനത്തിനുമായി തലശരിയിലെത്തുന്ന സ്‌ത്രീകൾക്ക്‌ സുരക്ഷിത താമസത്തിനുള്ള ഇടമാണിന്ന്‌ വനിതാ ഹോസ്‌റ്റൽ. 135 പേർക്ക്‌ സ്ഥിരംതാമസ സൗകര്യമുണ്ട്‌.

പരീക്ഷക്കും അഭിമുഖത്തിനും മറ്റുമായി എത്തുന്നവർക്ക്‌ രണ്ടും മൂന്നും ദിവസവും താമസിക്കാം. 25 വർഷത്തിനിടയിൽ ആയിരക്കണക്കിന്‌ വനിതകൾ ഹോസ്‌റ്റൽ സൗകര്യം പ്രയോജനപ്പെടുത്തിയിട്ടുണ്ട്‌. പരാതികളില്ലാതെ സേവനത്തിന്റെ കാൽനൂറ്റാണ്ട്‌ പൂർത്തിയാക്കാനായെന്നത്‌ സഹകരണ മേഖലക്കാകെ അഭിമാനകരമാണ്‌. രജതജൂബിലിയോടനുബന്ധിച്ച്‌ എയർകണ്ടീഷൻ സൗകര്യമുള്ള മുറികൾകൂടി ഹോസ്‌റ്റലിൽ ആരംഭിക്കാൻ ഉദ്ദേശിക്കുന്നതായി ബാങ്ക്‌ പ്രസിഡന്റ്‌ പി ഹരീന്ദ്രൻ വാർത്താസമ്മേളനത്തിൽ പറഞ്ഞു. കാൽനൂറ്റാണ്ടിനിടെ ഇവിടെ താമസിച്ച അന്തേവാസികളുടെ ഒത്തുചേരൽകൂടിയായി രജതജൂബിലി ആഘോഷം മാറും. ഹോസ്‌റ്റൽ ഇൻമേറ്റ്‌സും ബാങ്ക്‌ വനിതാ ജീവനക്കാരും അവതരിപ്പിക്കുന്ന കലാപരിപാടികളുമുണ്ടാവും. ബാങ്ക്‌ ഡയറക്ടർ ആമിന മാളിയേക്കൽ, ജനറൽ മാനേജർ സി.എം സന്തോഷ്‌കുമാർ എന്നിവരും പങ്കെടുത്തു.